Qazaxda aktiv koronavirus xəstələrinə edilən zəngin məqsədi vətəndaşlara göstərilən qayğıdır
Bu gün təəssüf hissi ilə qeyd edə
bilərik ki, son günlər ölkəmizdə koronavirusa yoluxma hallarında mənfi
tendensiya müşahidə olunur. Belə ki, COVID-19-a yoluxanların sayı həmin
xəstəlikdən sağalanların sayını üstələyir. Son statistikaya
görə, artıq yoluxma sayı dördrəqəmli ədədlərlə ifadə olunur. Belə
ki, fevralın 9-da COVID-19-a 7779 yeni yoluxma faktı qeydə
alınıb. Ölkə Prezidenti cənab
İlham Əliyevin birbaşa rəhbərliyi altında Nazirlər Kabineti yanında Operativ
Qərargah tərəfindən Ümumdünya Səhiyyə Təşkilatının tələb və tövsiyələrinə uyğun
olaraq ölkəmizdə koronavirus infeksiyasının yayılmasının qarşısının alınması
istiqamətində görülən zəruri işlər bu gün də uğurla davam etdirilir. Pandemiya
ilə mübarizədə ən effektiv vasitənin vaksinasiya olduğunu nəzərə alan
dövlətimiz ilk gündən bu sahədə məqsədyönlü işlər görür. Bütün dünya
dövlətlərində olduğu kimi, Azərbaycanda da qorxulu pandemiyadan yeganə xilas
yolunun vaksinasiya olduğunu nəzərə alaraq bu sahədə aparılan işlər daim
diqqətdə saxlanılır. Son günlər yoluxma sayında olan artım da bir daha onu
söyləməyə əsas verir ki, bu bəladan xilas olmağın tək və yeganə yolu məhz
vaksinasiya olunmaqdır. Vaksinləşmənin əsas
məqsədi də ölkəmizdə yayılmış koronavirus pandemiyasının qarşısının
alınmasına, virusa yoluxma və ölüm səviyyəsinin aşağı salınmasına nail
olmaqdır. Vətəndaşların vaksinasiya prosesində aktiv iştirak etməsi isə
dövlətin virusla mübarizə strategiyasını daha da gücləndirir. Ən əsası da
vətəndaşlar COVID-19-a qarşı vaksinasiya olunmaqla, həm özlərini, həm də
ətrafdakı insanları bu virusa yoluxmaqdan qorumuş olurlar. Azərbaycan Respublikası Nazirlər Kabinetinin 2021-ci
il 16 yanvar tarixli Sərəncamı ilə təsdiq edilmiş "Azərbaycan
Respublikasında COVID-19 xəstəliyi əleyhinə 2021-2022-ci illər üçün Vaksinasiya
Strategiyası”na əsasən respublikamızın hər yerində olduğu kimi Qazaxda da
əhalinin peyvənd olunması prosesi uğurla aparılır. Qazax Rayon İcra Hakimiyyətinin, Rayon Polis
Şöbəsinin və digər qurumların əməkdaşlarından ibarət yaradılmış mobil qrup
üzvləri tərəfindən Azərbaycan
Respublikası Nazirlər Kabineti yanında Operativ Qərargahın COVID-19
infeksiyasının yayılmasının qarşısını almaq məqsədilə vaksinasiya olunmaq,
COVID pasportunun olması barədə tələb və tövsiyələri rayon sakinlərinin
nəzərinə çatdırılır. Bu sahədə vətəndaşlar arasında mütəmadi olaraq
maarifləndirmə, təbliğat tədbirləri aparılaraq bildirilir ki, əhalinin
peyvənd olunması məhz onların sağlamlığının qorunmasına, gələcəkdə həyatın öz
axarına düşməsinə xidmət edir. Qazaxda rayon mərkəzi xəstəxanasının həkim
heyəti tərəfindən rayon mərkəzi ilə yanaşı, kənd yaşayış məntəqələrində
əhalinin səyyar şəkildə həyata keçirilən vaksinasiya prosesi zamanı
rayon sakinlərinə bugünədək 165 min 496 doza
vaksin vurulub. Birinci mərhələ üzrə peyvənd olunanların sayı 61 min
758, ikinci mərhələ üzrə peyvənd olunanların sayı isə 58 min
673, buster doza üzrə peyvənd olunanların sayı isə 45 min 065 nəfərdir. Bu gün Qazax rayonu respublikada
hər üç dozanın faiz göstəricisinə görə öncül yerlərdə dayanır. Onu da qeyd edək ki, 9 fevral tarixinə rayonda 162 nəfər
aktiv koronavirus xəstəsi var. Respublika Prezidenti İlham Əliyevin, Birinci vitse-prezident Mehriban
Əliyevanın vətəndaşlara göstərdikləri qayğı bu sahədə də özünü göstərir. Ölkə
rəhbərliyinin qayğısını əldə rəhbər tutan Qazax Rayon İcra Hakimiyyəti koronavirus
xəstələrini karantin müddətində daim diqqətdə saxlayır. Xəstələrə ilkin tibbi
yardımın göstərilməsi, onların vaxtlı-vaxtında dərman preparatları ilə təmin
olunması, Qazax Rayon Gigiyena və Epidemiologiya Mərkəzinin əməkdaşları
tərəfindən xəstələrin yaşadıqları evin dərhal dezinfeksiya olunması istiqamətində
zəruri işlər görülür. Rayon rəhbərliyi tərəfindən görülmüş işlər bununla da
bitmir. Xəstələrin mövcud vəziyyəti, karantin müddətində hər hansı bir
çətinliklərinin, qayğılarının olub-olmaması da elə ilk gündən nəzarətə
götürülür. Belə ki, Rayon İcra Hakimiyyəti başçısı aparatında bu sahə ilə bağlı
yaradılmış Operativ Qərargahın üzvü, RİH başçısı aparatında aparıcı məsləhətçi
Kəmalə Cəfərova hər gün xəstələrlə telefon əlaqəsi saxlayır, onları
narahat edən məsələləri, qayğıları dinləyir. Ehtiyac yarandıqda isə lazımi
köməkliklər edilir. İstər dərman preparatlarının çatdırılmasında, istərsə də
vəziyyəti pisləşən xəstələrin xəstəxanaya yerləşdirilməsində dərhal lazımi
addımlar atılır, qaldırılan məsələlər müsbət həllini tapır. Ölkə Prezidenti, Birinci vitse-prezident, eləcə də
rayon rəhbərliyi tərəfindən vətəndaşlara göstərilən diqqət, qayğı zəng edilən
xəstələr tərəfindən də razılıqla qarşılanır. Onlara edilən zəngin arxasında
vətəndaşlara olan dövlət qayğısının dayandığını vurğulayırlar. Məcburi köçkün, Qarabağ müharibəsi veteranı Yunisov
Hüseyn Yaqub oğlu da
koronavirusa qarşı testi pozitiv çıxan aktiv koronavirus xəstələrindəndir və
ilk gündən ona göstərilən qayğıdan razılıq edir. Hüseyn Yunisovun minnətdarlıq
dolu həmin fikirlərini təqdim edirik: - "Fevral ayının 3-də səhhətimdə narahatlıq hiss etdim
və təcili tibbi yardıma müraciət etdim. Analiz götürüldü və koronavirusa qarşı
testin nəticəsi pozitiv çıxdı. İlk gündən dövlətin qayğısını hiss etdim. Dərhal
evimiz dezinfeksiya olundu, dərman paketi ilə təmin olundum. Mən bir qazi kimi
dövlətin, ölkə başçısının, eləcə də rayon rəhbərliyinin qayğısını hər zaman
hiss etmişəm. Xəstə olduğum müddətdə də bir daha bunun şahidi oldum. Xəstə
olduğumu öyrəndiyim günün səhərisi Qazax Rayon İcra Hakimiyyətindən edilən zəngdə,
Kəmalə xanımın mənə və ailə üzvlərimə olan səmimi müasibətində dövlətin qayğısını
gördüm. Onun hər gün mənimlə, eləcə də digər xəstələrlə əlaqə saxlaması,
qayğılarımızla maraqlanması bir daha onu göstərir ki, biz vətəndaşlar tək
deyilik. Bu gün mən bir qazi olaraq, ölkə vətəndaşı olaraq ölkə Prezidentim
İlham Əliyevə, Birinci vitse-prezident Mehriban Əliyevaya, Rayon İcra
Hakimiyyətinin rəhbərliyinə, əməkdaşlarına, Qazax səhiyyəsinə minnətdaram ki,
biz sakinlərə bu cür diqqət və qayğı göstərirlər. Dövlət hər zaman olduğu kimi,
bu gün də bizim yanımızdadır”. GOYEZEN.AZ
Facebook-da paylaş