Qazaxda Vətən müharibəsi şəhidi gizir Sərxan Abdullayevin doğum günündə adını əbədiləşdirən bulağın açılışı olub
Azərbaycan
xalqı bu gün də şanlı Ordumuzun 2020-ci ilin 27 sentyabrında başlayan və cəmi
44 gün davam edən Vətən müharibəsində qazandığı tarixi Qələbəni böyük qürur
hissi ilə söyləyir və həmin qələbə ilə fəxr edir. 1 il əvvəl dövlət və xalq
olaraq Qarabağ adlı haqq savaşına çıxdıq və bu yolda haqq-ədalət
Ali Baş Komandan İlham Əliyevin yorulmaz, məntiqli, cəsarətli, uzaqgörən və dəyanətli
iradəsi nəticəsində bərpa olundu. Şanlı Azərbaycan Ordusunun gücünü, qüdrətini
görən Ermənistan məğlubiyyət sənədinə imza atmağa məcbur qaldı. Düşmənin ağır məğlubiyyəti
rayon və şəhərlərimizin azad olunması, Azərbaycanın ərazi bütövlüyünün bərpası
ilə nəticələndi. Bu gün hər
birimiz fəxarətlə söylədiyimiz, qürurlandığımız o tarixi Qələbəni bizlərə bəxş
edən Ali Baş Komandana, hərbçilərimizə, şəhidlərimizə, qazilərimizə borclu və
minnətdarıq. İllər ötsə belə bizlərə 44 günlük haqq savaşında hər gün qələbə
sevinci yaşadan şanlı Azərbaycan Ordusunun əsgər və zabitləri, hərbçiləri,
ruhları qarşısında bir ömür boyu baş əydiyimiz şəhidlərimiz heç vaxt
unudulmayacaq. Azərbaycanın
İkinci Qarabağ müharibəsində qəhrəmancasına şəhid olan igid Vətən oğullarından
biri də gizir Abdullayev Sərxan Elxan oğludur. Daxili İşlər Nazirliyinin Daxili
Qoşunlarının Xüsusi Təyinatlı Dəstəsinin giziri Sərxan Abdullayev bu gün yaşasaydı 33 yaşını qeyd edəcəkdi igid Vətən
oğlu. Döyüş meydanında göstərdiyi igidliyə görə ölümündən sonra ölkə Prezidenti
İlham Əliyevin müvafiq Sərəncamlarına əsasən "Vətən uğrunda”,
"Kəlbəcərin azad olunmasına görə” medalları ilə təltif olunmuş Sərxan
Abdullayevin doğum gününü ailəsi ilə bərabər yaxınları, doğmaları, şəhidimizə
ehtiram göstərən hər kəs qeyd edib. Bu gün özünü borclu sayan hər kəs həm
şəhidimizin, həm də övladı Orxan Abdullayevin doğum gününü, 3
yaşını onlarla birlikdə qeyd edib. Noyabrın 2-də qəhrəman şəhidimizin doğum
günündə şəhərin Əliağa Şıxlinski küçəsində adını əbədiləşdirən bulağın açılışı
olub. Açılış mərasimində Qazax
Rayon İcra Hakimiyyətinin məsul şəxsləri, rayonun hüquq-mühafizə orqanlarının, idarə, müəssisə və təşkilatların
rəhbərləri, Azərbaycan Respublikası Milli Məclisinin Beynəlxalq
münasibətlər və parlamentlərarası əlaqələr komitəsinin sədri Səməd Seyidovun
köməkçisi Akif Əmirov, Milli Məclisin deputatı Ülviyyə Ağayevanın köməkçisi
Arzu Musayeva, Azərbaycan Respublikası "Azərbaycan Qarabağ Müharibəsi
Əlilləri, Veteranları və Şəhid Ailələri İctimai Birliyi”nin Qazax rayon
filialının, Azərbaycan Respublikası Müharibə, Əmək və Silahlı Qüvvələr
Veteranları Şurasının Qazax rayon şöbəsinin sədrləri və üzvləri, şəhidimizin
vaxtilə təhsil aldığı Qazax şəhər Mehdi Hüseyn adına humanitar və təbiət fənləri üzrə
məktəb-liseyin müəllim
və şagirdləri, Vətən müharibəsi qaziləri,
iştirakçıları, şəhid ailələri, şəhidimizin ailə üzvləri,
yaxınları, doğmaları, döyüş yoldaşları, şəhər sakinləri iştirak ediblər. Şəhidimizin adına tikilmiş bulağın açılışını
bildirən qırmızı lent kəsilərək üzərindəki ağ örtük qaldırılıb, gül dəstələri düzülüb.
Qazax Rayon İcra Hakimiyyətinin başçısı Rəcəb Babaşov bulağın açılış mərasimində giriş sözü ilə çıxış
edərək şəhidimizə Allahdan rəhmət diləyib, əziz xatirəsini ehtiramla anıb. "Sərxan Şəhidlik zirvəsinə ucaldığı gündən ikinci
doğum günüdür ki, onsuz qeyd edirik. Sərxan hər zaman bizim qəlbimizdə əbədi
yaşayır, yaşayacaq da”, - deyən icra başçısı Sərxan Abdullayev kimi igid Vətən
oğullarının hər birimiz üçün əziz olduğunu bildirib. Azərbaycan xalqının milli azadlığını,
respublikamızın müstəqilliyini qorumaq, torpaqlarımızın ərazi
bütövlüyünü bərpa etmək üçün qəhrəmanlıq nümunəsi göstərən şəhidlərimizlə hər bir azərbaycanlının fəxr etdiyini, qəhrəman oğullarımızın, bütün şəhidlərimizin, o
cümlədən də Sərxanın xatirəsinin daim əziz tutulacağını vurğulayıb.
Müzəffər Ali
Baş Komandan İlham Əliyevin rəhbərliyi altında sentyabrın 27-də başlayan və 44 gün davam edən Vətən müharibəsindən söz
açan icra başçısı həmin müharibədə qəhrəman oğullarımızın göstərdiyi şücaətdən
də danışıb. 30 illik həsrətdən sonra Sərxan kimi oğullarımızın düşmən
tapdağında olan torpaqlarımızı qarış-qarış azad etdiklərini, Vətən uğrunda
canlarından keçən bütün şəhidlərimizin qisaslarını aldıqlarını, onların
qanlarını yerdə qoymadıqlarını, döyüş meydanında göstərdikləri qəhrəmanlıqla
hərb tarixinə adlarını qanları ilə yazdıqlarını qeyd edib. Şəhidlik zirvəsinə
ucalan Sərxanın döyüş meydanında göstərdiyi igidliyindən danışan icra başçısı
illər ötsə belə həmin qəhrəmanlığın dillər əzbəri olacağını söyləyib. İcra
başçısı igid Vətən oğlunun döyüş meydanında göstərdiyi şücaətin dövlətimiz, Ali
Baş Komandan İlham Əliyev tərəfindən də yüksək qiymətləndirildiyini, ölümündən
sonra ölkə başçısının müvafiq Sərəncamlarına əsasən "Vətən
uğrunda”, "Kəlbəcərin azad olunmasına
görə” medalları ilə təltif olunduğunu diqqətə çatdırıb.
Rayon rəhbəri Vətən müharibəsində Qazaxın 50 nəfər
igid oğlunun Şəhidlik zirvəsinə ucaldığını, həmin oğullarımızın sırasında
dayanan Sərxanın təkcə qazaxlıların, doğma el-obasının deyil, bütöv
Azərbaycanın övladları olduğunu, onlarla hər kəsin qürur duyduğunu
vurğulayıb. Savaşda əldə etdiyimiz şanlı Qələbəyə görə Ali Baş Komandana,
müzəffər Azərbaycan Ordusuna, şəhidlərimizə, qazilərimizə borclu olduğumuzu
qeyd edib. "Bu gün ölkə Prezidenti İlham
Əliyev, Birinci vitse-prezident Mehriban Əliyeva şəhid ailələrinin, qazilərimizin
qarşısında baş əyirəm söyləyirsə, şəhid ailələrinə, qazilərimizə qayğı göstərirsə,
bu, hər kəs üçün nümunədir. İstər dövlət məmuru olsun, istərsə də vicdanı olan
hər kəs şəhidlərimizi yad etməli, hər zaman şəhidlərimizin xatirəsini əziz
tutmalı, onların ailələrinə qayğı ilə yanaşmalıdır”, - deyən icra başçısı şəhidlərimizin
ailələrinə göstərilən diqqət və qayğının bundan sonra da yüksək səviyyədə
olacağını söyləyib.
Rayon rəhbəri
Respublika Prezidenti İlham Əliyev, Birinci vitse-prezident Mehriban Əliyeva
tərəfindən şəhid ailələrinə və qazilərimizə göstərilən qayğının Qazaxda da hər
zaman nümunə götürüldüyünü bildirib. Qazaxda Vətən
müharibəsi şəhidlərinin, eləcə də bütün şəhidlərimizin adlarının
əbədiləşdirilməsi istiqamətində görülmüş işlərdən danışan rayon rəhbəri Qazax Rayon
İcra Hakimiyyətinin təşəbbüsü və dəstəyi ilə "Göyəzən” qəzetinin baş
redaktoru, şair-publisist Elçin İsmayıl tərəfindən
yazılmış "Qanları ilə dastan yazanlar" kitabını, Qazax
Tarix-Diyarşünaslıq Muzeyində 338 nəfər şəhidin şəkillərindən ibarət
guşənin yaradılmasını bu sahədə atılan nümunəvi addımlardan biri kimi söyləyib.
Şəhərin mərkəzində yerləşən Şəhidlər xiyabanında Vətən müharibəsi şəhidlərinin
şəkli əks olunmuş lövhələrinin vurulduğunu diqqətə çatdırıb. Şəhərin
N.Nərimanov küçəsində Vətən müharibəsi şəhidlərinin xatirələrini əbədiləşdirən Abidə
Kompleksinin inşa olunduğunu, bu günlərdə şəhidlərimizin şəkillərinin
nümayiş olunacağı monitorun qoyulduğunu söyləyib. İcra başçısı
açılışına toplaşdığımız bulağı şəhidimizin adının əbədiləşdirilməsi istiqamətində
atılan uğurlu addımlardan biri kimi dəyərləndirib. Bildirib ki, bu cür bulağın
inşa olunmasında əsas məqsəd şəhidimizi gələcək nəsillərə tanıtmaqdır. Çünki
bulağın qarşısından keçən, suyundan içən hər kəs şəhidin ruhuna dua oxumaqla
bərabər, həm də onu tanımış olacaq. Qazax Rayon
Təhsil Şöbəsinin müdiri Nizaməddin Babanlı çıxış edərək şəhidimizə Allahdan rəhmət diləyib, əziz
xatirəsini ehtiramla anıb. Ali Baş Komandanın rəhbərliyi altında xalqımızın 30
illik yurd həsrətinə son qoyan şəhidlərimizə, onların ailələrinə qayğı
göstərməyin, sahib çıxmağın hər birimizin borcu olduğunu qeyd edib. Ölkə
Prezidentinin və Birinci vitse-prezidentin şəhid ailələrinə göstərdikləri
qayğının Qazaxda da olduğu kimi davam etdirilməsinə görə ziyalılar adından rayon
rəhbərliyinə minnətdarlığını bildirib. Şəhidlərimizin, onların keçdikləri döyüş
yollarının gələcək nəsillərə çatdırılması, örnək göstərilməsi üçün ümumtəhsil
məktəblərində anım tədbirlərinin keçirildiyini, bütün şəhidlərimiz kimi Sərxan
Abdullayevin xatirəsinin də yad olunması üçün təhsil aldığı məktəbdə anım
tədbirinin təşkil olunduğunu vurğulayıb. "Azərbaycan
Qarabağ Müharibəsi Əlilləri, Veteranları və Şəhid Ailələri” İctimai Birliyinin
Qazax Rayon Şöbəsinin sədr müavini, I qrup Qarabağ müharibəsi əlili Namiq
Alıyev çıxış edərək şəhidlərimizə
Allahdan rəhmət diləyib, yaralı qazilərimizə tezliklə sağlamlıqlarına
qovuşmalarını arzu edib. Şəhid ailələrinə göstərilən diqqət və qayğıya görə
ölkə başçısına və rayon rəhbərliyinə razılığını ifadə edib. Xalqımıza böyük
Zəfəri, tarixi Qələbəni bəxş etmək üçün canlarından keçən Sərxan kimi
oğullarımızı yad etməyin vətəndaş olaraq hər birimizin borcu olduğunu söyləyib. Azərbaycan
Yazıçılar Birliyi Qazax zona filialının sədri, Əməkdar incəsənət xadimi, şair
Barat Vüsal çıxış edərək bildirib ki, 44 günlük şanlı Vətən müharibəsi dövründə şəhidlərimiz
və qazilərimiz hərb tariximizə qızıl hərflərlə yazılan əsl qəhrəmanlıq nümunəsi
göstərdilər. 44 günlük savaşda 30 illik yurd həsrətinə son qoyaraq xalqımızın,
bütün şəhidlərimizin intiqamını artıqlaması ilə aldılar. Tək şəhidlərimiz
deyil, onları yetişdirən anaların, ataların da qəhrəman olduqularını qeyd edib.
Şəhid Sərxanın özünün də dediyi kimi, şəhidlərimiz qisas hissini gələcək nəsillərə
saxlamadılar, əksinə bütün şəhidlərimizin qisasını aldılar. Bu gün şəhidlərimizin
adlarını əbədiləşdirən bulaqların inşa olunması, abidə komplekslərinin, guşələrin
yaradılması, kitabların yazılması onu göstərir ki, şəhidlər unudulmazdır.
Onların qəhəmanlığı bir məktəb, hamımız üçün dərsdir. B.Vüsal qeyd edib ki, Vətəni,
Qarabağımızı bizlərə qaytaran oğullarımızı yaşatmaq, gələcək nəsillərə tanıtmaq
vətəndaş olaraq hər birimizin ən ümdə işi, müqəddəs vəzifəsi olmalıdır. Ali Baş
Komandan İlham Əliyev başda olmaqla, Birinci vitse-prezident Mehriban Əliyevaya
və rayon rəhbərliyinə şəhid ailələrinə göstərdikləri yüksək dövlət qayğısına
görə minnətdarlığını bildirib."Oğullar” şeirini səsləndirərək şəhidlərimizə
olan ehtiramını bildirib, əziz xatirələrini yad edib.
2-ci qrup Vətən müharibəsi əlili, mayor
Xəyyam Əliyev çıxış edərək Vətən
müharibəsi iştirakçısı və qazi olaraq şəhidimizin doğum günündə çıxış etməyin onun
üçün çətin olduğu qədər də qürurverici olduğunu qeyd edib. "1 il öncə
27 sentyabrda Prezident, Ali Baş Komandan İlham Əliyevin rəhbərliyi
altında şanlı ordumuzun başladığı "Dəmir yumruq” əməliyyatında
iştirak etmək hər bir əsgər üçün qürurverici idi. 44 günlük Vətən müharibəsində
bütün dünya ordumuzun gücü ilə yanaşı, həm də ordu-xalq birliyinin şahidi
oldu. Xidmətə başladıqda biz hərbi and içmişdik. Vətənimiz üçün canımızı fəda
edəcəyimizə, ya qazi, ya da şəhid olacağımıza and içmişdik. Ya şəhid olmalı, ya
qazi olmalı, ya da Qələbə qazanmalı idik. Bu gün şəhidlərimiz olsa da, minlərlə
qəhrəman oğullarımız sağlamlığını itirsə də, biz qalib ölkənin vətəndaşı ola
bildik, qələbə qazandıq. Şəhidlərimiz bugünkü nəslin, gələcək nəsillərin firavanlığı
üçün canından keçdi. Qazandığımız Qələbə bütün dünyaya bir daha sübut etdi ki,
Azərbaycan necə güclü dövlətdir və güclü ordusu var”, - deyən X.Əliyev bütün şəhidlərimizin
ruhu qarşısında baş əydiyini söyləyib. Dövlətin şəhidlərimizə, qazilərimizə
göstərdiyi qayğıdan söz açan qazimiz özünün timsalında hər zaman şahidi
olduğunu, daim dövlətin qayğısını hiss etdiyini bildirib. Şəhidimizin döyüş yoldaşı, Xüsusi Təyinatlı
Qüvvələrin kapitanı Vüsal Sadıqov çıxış edərək
çiyin-çiyinə vuruşduğu silahdaşı haqqında ürək sözlərini bölüşüb. "Sərxan
haqqında danışsaq, aylar, illər yetməz. 10 ilə yaxın bir yerdə xidmət etmişəm.
Sərxan qardaşımız elə bir tərbiyə almışdı, vətənpərvərlik ruhunda böyümüşdü ki,
Xüsusi Təyinatlıların sırasında bir hərbi qulluqçu kimi deyil, bir qardaş kimi
nüfuz qazanmışdı. O, döyüşdə şəhid olanda sanki XTQ-in qardaşı şəhid oldu. Biz
XTQ-in hərbi qulluqçuları şəhid olanda ölmürük, əksinə daha da uca zirvələrə
qalxırıq”, - deyən V.Sadıqov Sərxan kimi oğullarımızla hər zaman qürur
duyacaqlarını söyləyib. Şəhidimizin vaxtilə təhsil aldığı Qazax şəhər Mehdi Hüseyn
adına humanitar və təbiət fənləri üzrə məktəb-liseyin direktoru Tahirə Comərdova çıxış edərək şəhidimiz haqqında ürək sözü bildirməyin
çətin olduğu qədər də qürurverici olduğunu bildirib. Sərxan kimi neçə-neçə
oğulların öz qanları ilə tarix yazdıqlarını, həmin oğullarla qürur duymağın hər
birimizin borcu olduğunu diqqətə çatdırıb. "Sərxan məktəbdə nə qədər yaxşı
oxusa da onun Vətənə, torpağa olan sevgisi daha yüksək oldu. O, hərbçi olmağı,
Vətənin keşiyində dayanmağı hər şeydən üstün tutdu. Qəhrəman kimi yetişmişdi,
qəhrəmancasına da şəhid oldu”, - deyən məktəb direktoru Sərxanın bu gün
aramızda olmasa da onun əziz xatirəsinin daim bizim qəlbimizdə əbədi
yaşayacağını qeyd edib. Məktəb kollektivi olaraq igid şagirdləri ilə fəxr
etdiklərini, ruhu qarşısında baş əydiklərini dilə gətirib. Şəhid ailələrinə
göstərilən diqqət və qayğıya görə ölkə başçısına, Birinci vitse-prezidentə,
rayon rəhbərliyinə minnətdarlığını bildirib. Rayon rəhbərliyinin təşəbbüsü və dəstəyi ilə yazılmış "Qanları ilə dastan
yazanlar" kitabının müəllifi, "Göyəzən” qəzetinin baş redaktoru, şair-publisist
Elçin İsmayıl çıxış
edərək kitab haqqında qısa məlumat verib. Kitabı oxuyan hər kəsin şəhidlərimizi
daha yaxından tanımaq imkanının olduğunu bildirib. 50 qəhrəman şəhidimiz
haqqında yazılmış kitabda şəhidlərimizin necə şərəfli bir yol keçdiklərinin
aydın şəkildə öz əksini tapdığını, kitabı oxuduqca bunun bir daha şahidi
olduğumuzu söyləyib. Qazax Rayon
Polis Şöbəsinin rəisi Sənan Əsədov çıxış edərək şəhidimizə Allahdan rəhmət, ailəsinə
səbir diləyib. Birinci Qarabağ savaşında Daxili İşlər Nazirliyinin Daxili
Qoşunlarının hərbi qulluqçularının qəhrəmancasına savaşdıqlarını, 680 nəfərin
şəhid, 1177 nəfərin qazi olduğunu, 8 nəfərin ölümündən sonra Azərbaycanın Milli
Qəhrəmanı adını aldığını bildirib. 44 günlük Vətən müharibəsində də Daxili
Qoşunların hərbi qulluqçularının əsl qəhrəmanlıq dastanı yazdıqlarını qeyd
edib. 66 nəfər hərbi qulluqçunun Şəhidlik zirvəsinə yüksəldiyini, 346 nəfər
hərbi qulluqçunun yaralandığını, 4 nəfər hərbi qulluqçunun (1 nəfəri ölümündən
sonra olmaqla) Vətən Müharibəsi Qəhrəmanı adına layiq görüldüyünü diqqətə
çatdırıb. Ölkə Prezidenti İlham Əliyev, Birinci vitse-prezident Mehriban Əliyeva
tərəfindən şəhid ailələrinə, qazilərə göstərilən qayğıdan söz açan natiq həmin
qayğının hər kəs üçün nümunə olduğunu bildirib. Şəhidimizin ailəsinə göstərilən
dövlət qayğısının bundan sonra da yüksək səviyyədə davam etdiriləcəyini qeyd
edib. Sonra Saqif Nəsirov adına Ürkməzli kənd tam orta məktəbin 10-cu sinif
şagirdi Aysel Vələdova, şəhidimizin vaxtilə təhsil aldığı Qazax şəhər Mehdi Hüseyn adına
humanitar və təbiət fənləri üzrə məktəb-liseyin 4-cü sinif şagirdlərindən Minur Məmmədov, şəhid kapitan İmamverdi İsmayılovun oğlu Emin İsmayılov, gizir Tahir
İsmayılovun oğlu Niyazi İsmayılov, Qazax şəhər Səməd Vurğun adına 2 nömrəli tam
orta məktəbin 3-cü sinif şagirdi Nurlana Mehtiyeva şəhidlərimizə həsr olunmuş şeirlər səsləndiriblər.
Şəhid atası Elxan
Abdullayev şəhid ailəsi kimi hər zaman onlara göstərilən diqqət və
qayğıya görə razılığını ifadə edib, ölkə Prezidenti İlham Əliyevə, Birinci
vitse-prezident Mehriban Əliyevaya, Daxili İşlər naziri Vilayət Eyvazova, rayon
rəhbərliyinə minnətdarlığını bildirib. Oğlunun daim yad olunmasını
Sərxanın timsalında bütün şəhidlərimizə olan hörmət və ehtiramın bariz nümunəsi
kimi qiymətləndirib. "Şəhid atası, anası, həyat yoldaşı olmaq həm ağırdır, həm
də qürurludur. Bu gün üç min şəhidin atası, anası, həyat yoldaşı ağlayırsa,
milyonlarla atalarımız, analarımız, övladlarımız firavan yaşayacaqlar. Bu gün
biz şəhid valideynləri olaraq övladlarımızla fəxr etməliyik”, - deyən şəhid
atası oğlu Sərxan və onun kimi igid Vətən oğulları ilə hər zaman qürur
duyacağını söyləyib. Bulağın tikilməsində
əsas məqsədin Sərxanın adını yaşatmaq, gələcək nəsillərə ötürmək olduğunu qeyd
edib. Şəhid atası sonda bulağın ərsəyə gəlməsində əziyyəti keçən
insanlara, açılış mərasimində iştirak edənlərə ailəsi adından təşəkkürünü
çatdırıb. Daha sonra rayon
rəhbəri və qonaqlar igid Vətən oğlunun ata ocağına gələrək torpaq uğrunda
canından keçən şəhidimizə bir daha Allahdan rəhmət, ailəsinə səbir diləyiblər. Gizir Abdullayev Sərxan Elxan oğlu Sərxan
Abdullayev 2 noyabr 1988-ci ildə Qazax rayonunda anadan olmuşdur. 1995-ci ildə Qazax şəhər Mehdi Hüseyn
adına humanitar və təbiət fənləri üzrə məktəb-liseyin 1-ci sinifinə daxil olmuş, 2006-cı ildə həmin
məktəbin 11-ci sinifini bitirmişdir. 2006-cı ildə Səfərbərlik və
Hərbi Xidmətə Çağırış üzrə Dövlət Xidmətinin Qazax Rayon Şöbəsi tərəfindən həqiqi hərbi xidmətə çağrılmışdır. 2008-ci ildə hərbi xidməti başa vurduqdan
sonra Daxili Qoşunlarda gizir rütbəsində xidmətə başlamışdır. Daxili
İşlər Nazirliyinin Daxili Qoşunlarının Xüsusi Təyinatlı Dəstəsinin giziri,
xüsusi təyinatlı dəstənin 2-ci xüsusi həmlə qrupunda 2-ci yarımqrup komandiri
kimi xidmət edən igid Vətən oğlu 28.09.2020-ci il tarixdə Göygöl rayonunun
Toğanalı kəndi ərazisində gedən hərbi əməliyyatlar zamanı qəhrəmancasına şəhid
olmuşdur. Sərxan Abdullayev 28.09.2020-ci ildə Qazax rayonunun Ağköynək kənd qəbiristanlığında
izdihamla dəfn edilmişdir. Evli olan şəhid gizirimizin Orxan və Turan adlı iki
azyaşlı oğul övladı yadigar qalıb. Şəhid
gizirin göstərdiyi igidlik hər zaman dövlət tərəfindən yüksək qiymətləndirilmişdir.
Vaxtilə "Qüsürsuz xidmətə görə" 3-cü dərəcəli medalla təltif
olunmuş Sərxan Abdullayev ölümündən sonra da medallarla təltif edilmişdir. Şəhid
gizirimizin göstərdiyi igidlik cənab Prezident İlham Əliyev tərəfindən də yüksək
qiymətləndirilmişdir. O, ölümündən sonra ölkə Prezidentinin 15 dekabr 2020-ci
il tarixli Sərəncamına əsasən "Vətən uğrunda”, 29 dekabr 2020-ci
il tarixli Sərəncamına əsasən "Kəlbəcərin
azad olunmasına görə” medalları ilə
təltif olunmuşdur. GOYEZEN.AZ
Facebook-da paylaş