Bu gün Qazaxda Vətən müharibəsi şəhidi həkim tibb xidməti leytenantı Adil Əfəndiyevin ildönümündə xatirəsi anılıb
2020-ci
ilin 27 sentyabr tarixi Qarabağ adlı haqq savaşımıza çıxdığımız gün kimi
xalqımızın yaddaşına əbədi həkk olundu. O gün ki, yaddaşlara bizi böyük Qələbəyə,
Zəfərə aparan yolun başlanğıc tarixi kimi yazıldı. 44 gün davam edən həmin savaşda
şanlı Azərbaycan Ordusu Silahlı Qüvvələrin Müzəffər Ali Baş Komandanı İlham
Əliyevin rəhbərliyi altında xalqımızın 30 illik yurd həsrətinə son qoydu. Uzun
illərin ayrılığından sonra işğal altında qalan torpaqlarımız müzəffər
ordumuzun, əsgər və zabitlərimizin şücaəti, qəhrəmanlığı sayəsində azad edildi.
Bu müqəddəs yolda, amal uğrunda zabit və əsgərlərimizin bir qismi şəhid, bir
qismi isə qazi oldu. Bu
gün hər birimizin fəxri olan tibb xidməti leytenantı Əfəndiyev Adil Qədir
oğlu da Vətən müharibəsində Şəhidlik zirvəsinə
ucalan qəhrəman oğullarımızdandır. Oktyabrın 25-də qəhrəman şəhidimizin uğrunda canını
fəda etdiyi torpağa tapşırıldığı gündən 1 il ötür. İgid Vətən
oğlunun ata ocağında ildönümü qeyd olunub, şəhidimizin əziz xatirəsi
ehtiramla yad edilib. İldönümü mərasimində Qazax Rayon İcra Hakimiyyətinin
məsul şəxsləri, rayonun hüquq-mühafizə
orqanlarının, idarə, müəssisə və təşkilatların rəhbərləri, Azərbaycan
Respublikası "Azərbaycan Qarabağ Müharibəsi Əlilləri, Veteranları və Şəhid
Ailələri İctimai Birliyi”nin Qazax rayon filialının, Azərbaycan
Respublikası Müharibə, Əmək və Silahlı Qüvvələr Veteranları Şurasının Qazax
rayon şöbəsinin sədrləri və üzvləri, şəhidimizin vaxtilə təhsil aldığı Mehdi Hüseyn adına
humanitar və təbiət fənləri üzrə məktəb-liseyin məktəbin müəllim və şagirdləri, şəhid ailələri, Vətən
müharibəsi qaziləri, iştirakçıları, şəhidimizin ailə üzvləri, yaxınları,
doğmaları, şəhər sakinləri iştirak ediblər. İgid Vətən oğlunun ruhuna dua oxunub, əziz xatirəsi
ehtiramla yad olunub. Qəhrəman şəhidimizin təltif olunduğu "Şuşanın
azad olunmasına görə” medalı atasına təqdim olunub. Qazax Rayon
İcra Hakimiyyəti başçısı aparatında Ərazi idarəetmə və yerli özünüidarəetmə
orqanları ilə iş şöbəsinin müdiri Adil Vəliyev şəhidimizə Allahdan
rəhmət diləyib, əziz xatirəsini ehtiramla anıb, icra başçısı Rəcəb
Babaşovun səmimi ürək sözlərini çatdırıb. 25 yaşında Şəhidlik zirvəsinə ucalan qəhrəman
şəhidimizin döyüş meydanında göstərdiyi fədakarlıqdan danışan natiq Adilin qısa
ömrünə yüz illərin qəhrəmanlığını sığdırdığını, hər kəsə nümunə olacaq həmin qəhrəmanlığı
ilə adını tarixə yazdırdığını söyləyib. Onun bu şücaətinin dövlətimiz, Ali Baş
Komandan İlham Əliyev tərəfindən də yüksək qiymətləndirildiyini, Adil Əfəndiyevin
ölümündən sonra ölkə başçısının müvafiq Sərəncamlarına əsasən "Vətən uğrunda”, "Şuşanın azad olunmasına görə”,"Hərbi
xidmətlərə görə”, "Füzulinin azad olunmasına görə”, "Xocavəndin azad olunmasına görə”medalları ilə təltif olunmasını şəhidimizə verilən ən böyük dəyər kimi
qiymətləndirib. A.Vəliyev 44 günlük Vətən müharibəsində
Azərbaycanın hərb tarixinə böyük Qələbəni, Zəfəri qızıl hərflərlə yazdıran Adil
kimi igid Vətən oğullarının xatirələrinin daim əziz tutulacağını qeyd edib. Adil
tək qəhrəman oğullarımızla nəinki doğulduğu el-obanın, eləcə də bütöv
Azərbaycanın fəxr etdiyini, hər bir azərbaycanlının qürur duyduğunu söyləyib.
Şəhidlərimizi yad etməyin, xatirələrini əziz tutmağın, ən əsası da igid
Vətən oğullarının döyüşdə göstərdiyi qəhrəmanlığı gələcək nəsillərə örnək və
nümunə göstərməyin hər birimizin borcu olduğunu qeyd edib. A.Vəliyev əldə
etdiyimiz şanlı Qələbəyə görə Ali Baş Komandana, müzəffər Azərbaycan Ordusuna,
şəhidlərimizə, qazilərimizə borclu olduğumuzu bir daha dilə gətirib. Respublika
Prezidenti İlham Əliyev və Birinci vitse-prezident Mehriban Əliyeva tərəfindən
şəhidlərimizə, şəhid ailələrinə, qazilərimizə göstərilən qayğıdan, hörmət və
ehtiramdan danışan A.Vəliyev həmin qayğının Qazaxda da hər zaman nümunə
götürüldüyünü bildirib. Şəhid ailələrinə rayon rəhbərliyi tərəfindən hər zaman
xüsusi qayğı göstərildiyini, bu sahədə məqsədyönlü işlər görüldüyünü qeyd edib.
Şəhidlərimizə, qazilərimizə, onların ailə üzvlərinə olan qayğının bundan sonra
da yüksək səviyyədə olacağını vurğulayıb. Bütün şəhid ailələri kimi, Adil Əfəndiyevin ailəsinə
də dövlət və rayon rəhbərliyi tərəfindən daim diqqət ayrıldığını diqqətə
çatdırıb. Şəhid atası Qədir Əfəndiyev şəhid ailəsi
kimi hər zaman onlara göstərilən diqqət və qayğıya görə razılığını ifadə
edib və buna görə Prezident, Ali Baş Komandan İlham Əliyevə, Birinci
vitse-prezident Mehriban Əliyevaya, rayon rəhbərliyinə minnətdarlığını
bildirib. Övladı Adil və onun kimi igid Vətən oğulları ilə hər zaman fəxr edəcəyini,
qürur duyacağını söyləyib. Oğlunun şəhid
olduğu ilk gündən xatirəsinin daim yad olunmasını Adilin timsalında bütün
şəhidlərimizə olan hörmət və ehtiramın bariz nümunəsi kimi qiymətləndirib. Tibb xidməti leytenantı Əfəndiyev
Adil Qədir oğlu Şəhid Adil Əfəndiyev 12 avqust 1995-ci ildə Qazax şəhərində
anadan olmuşdur. 2001-ci ildə Qazax şəhər Mehdi Hüseyn adına humanitar və təbiət
fənləri üzrə məktəb-liseyin 1-ci sinifinə daxil olmuş, 2012-ci ildə həmin
məktəb-liseyin 11-ci sinifini bitirmişdir. 2012-ci ildə Azərbaycan Tibb
Universitetinə daxil olmuşdur. 2018-ci ildə Azərbaycan Tibb Universitetinin Hərbi
Tibb fakültəsinin "Hərbi həkim işi” ixtisasını bitirmişdir. Təyinatla Naxçıvan
Muxtar Respublikasının Culfa rayonunda həkim kimi hərbi xidmətə başlamışdır.
"N” saylı hərbi hissənin qərargah və təchizat bölüyünün tibb məntəqəsinin rəisi,
tibb xidməti leytenantı Adil Əfəndiyev 22.10.2020-ci il tarixdə Füzuli-Cəbrayıl-Xocavənd
rayonları istiqamətində gedən döyüşlərdə qəhrəmancasına şəhid olmuşdur. Qəhrəman şəhidimiz 25.10.2020-ci ildə
Qazax şəhər qəbiristanlığında izdihamla dəfn edilmişdir. Subay idi. 25 yaşında Şəhidlik zirvəsinə yüksələn tibb
xidməti leytenantı Adil Əfəndiyevin döyüş meydanında göstərdiyi igidlik ölkə
Prezidenti tərəfindən də yüksək qiymətləndirildi. O, ölümündən sonra cənab
Prezident İlham Əliyevin 15 dekabr 2020-ci il tarixli Sərəncamına əsasən "Vətən
uğrunda”, 29 dekabr 2020-ci il tarixli Sərəncamına əsasən "Şuşanın azad olunmasına görə”, 30 dekabr 2020-ci il tarixli
Sərəncamına əsasən "Hərbi xidmətlərə görə”, 24 iyun 2021-ci il tarixli Sərəncamlarına
əsasən "Füzulinin azad olunmasına görə”, "Xocavəndin azad olunmasına görə” medalları ilə təltif olunmuşdur. Şəhərin mərkəzində, Rayon Mərkəzi
Xəstəxanasının qarşısında igid Vətən oğlunun adını əbədiləşdirən bulaq-abidə
kompleksi inşa olunub, həmçinin yaşadığı evin önündə barelyefi
var.
GOYEZEN.AZ
Facebook-da paylaş