İcra başçısı subartezian quyularında, tullantı sutəmizləyici qurğuda və su anbarlarında görülmüş işlərin mövcud vəziyyəti ilə maraqlanıb
Hər kəsə yaxşı məlumdur ki, ölkə Prezidenti İlham
Əliyevin təsdiqlədiyi regionların sosial-iqtisadi inkişafı dövlət proqramına
uyğun olaraq Qazax şəhərinin içməli su və tullantı su sistemlərinin yenidən
qurulması layihəsi uğurla icra olunur. Ölkə
başçısının qayğısı sayəsində "Azərsu” Açıq Səhmdar Cəmiyyəti tərəfindən
icra edilən layihə Qazax şəhərində 26 min nəfərin su və kanalizasiya
xidmətlərindən istifadəsinin yaxşılaşmasına hesablanıb. Qazax şəhərində 1970-ci
illərdə yaradılmış ilk mərkəzləşdirilmiş su təchizatı sistemləri istismara yararsız
vəziyyətə düşdüyündən mövcud tələbatı qarşılamaq iqtidarında olmayıb. Bunlar
nəzərə alınaraq 2019-cu ildə Azərbaycan hökuməti və İslam İnkişaf Bankının
birgə maliyyələşdirdiyi layihə çərçivəsində Qazax şəhərində yeni infrastruktur
yaradılır. Qazax şəhəri və ətraf kəndləri dayanıqlı içməli su ilə təmin etmək
üçün Ağstafa rayonu ərazisində 12 subartezian quyusu qazılıb, 8,6 kilometr
quyulararası su xətləri inşa edilib. Mənbədən götürülən suyun anbarlara
ötürülməsi məqsədilə nasos stansiyası tikilib. Su mənbəyindən Qazax şəhərinə 9
kilometr magistral su kəmərinin tikintisi başa çatdırılıb. Şəhəri dayanıqlı
içməli su ilə təmin etmək üçün tutumu 10 min kubmetr (hər biri 5 min kubmetr) olan su anbarının inşası yekunlaşmaq
üzrədir. Şəhərdə yaranan tullantı suların
təmizlənib zərərsizləşdirilməsi məqsədilə məhsuldarlığı sutkada 10 min kubmetr
olan tullantı sutəmizləyici qurğunun tikintisi üzrə işlərin böyük hissəsi
yerinə yetirilib. Məlumat üçün onu da qeyd edək ki, su və kanalizasiya
sistemlərinin çəkilməsinə başlanılan ilk gündən bu sahəni daim diqqət
mərkəzində saxlayan rayon rəhbərinin müvafiq Sərəncamına əsasən su və
kanalizasiya sisteminin yenidən qurulması zamanı tikinti-quraşdırma işlərinin
layihə üzrə düzgün aparılması məqsədilə rayonun aidiyyatı idarə, müəssisə və
təşkilat rəhbərlərindən, ağsaqqal və ziyalılarından ibarət Komissiya da yaradılıb.
Eyni zamanda, çəkilişlərə start verilən ilk gündən görülən işlərin mövcud
vəziyyətinə dair mütəmadi olaraq görüşlərin, iclasların keçirilməsi, eləcə də
çəkiliş aparılan ərazilərə yerində baxılması, işlərin keyfiyyəti ilə
maraqlanılması bu sahənin daim diqqət mərkəzində olması deməkdir. Bu gün Qazax Rayon İcra Hakimiyyətində şəhərin
içməli su və tullantı su sistemlərinin yenidən qurulması layihəsinin icrasının mövcud
vəziyyətinə dair növbəti iclas olub. Daha sonra rayon rəhbərliyi aidiyyatı
şəxslərlə birlikdə Qazax şəhəri və ətraf kəndləri dayanıqlı içməli
su ilə təmin etmək üçün Ağstafa rayonu ərazisində qazılmış 12 subartezian
quyusunda, mənbədən götürülən suyun anbarlara ötürülməsi məqsədilə tikilmiş
nasos stansiyasında, şəhərdə yaranan tullantı suların təmizlənib zərərsizləşdirilməsi
məqsədilə məhsuldarlığı sutkada 10 min kubmetr olan tullantı sutəmizləyici
qurğuda və əhalini dayanıqlı içməli su ilə təmin edəcək tutumu 10 min kubmetr
olan su anbarlarında görülmüş işlərin mövcud vəziyyəti ilə yerində tanış olub, işlərin keyfiyyəti ilə maraqlanıb. Rayon rəhbəri istər keçirilən iclasın, istərsə də
yerində baxışın əsas məqsədinin su və kanalizasiya sistemlərinin çəkilişi ilə
bağlı görülmüş işlərin hazırki vəziyyəti ilə tanış olmaq, müzakirə etmək
və işlərin keyfiyyəti ilə maraqlanmaq olduğunu qeyd edib. Ən əsası da
bütün bu işlərin kökündə vətəndaş amilinin, məmnunluğunun, əhalinin 24 saat
dayanıqlı su ilə təminatının dayandığını bildirib. İcra başçısı
çəkiliş yekunlaşan bütün ərazilərdə test aparılmasını, istər su sayğaclarının,
istərsə də evlərə verilmiş su birləşmələrinin mövcud vəziyyətinin
öyrənilməsini, görülməsi nəzərdə tutulan digər işlərin geniş şəkildə təhlil edilməsini,layihədə olduğu
kimi həyata keçirilməsini, bütün işlərin günün tələbləri səviyyəsində
qurulmasını vurğulayaraq aidiyyatı üzrə
müvafiq tapşırıqlarını verib. Subartezian quyularına baxış
Tullantı sutəmizləyici qurğuya baxış
Su anbarlarına baxış GOYEZEN.AZ
Qazax Rayon İcra
Hakimiyyətinin başçısı Rəcəb Babaşovun, icra aparatının məsul şəxslərinin, "Akkord Sənaye Tikinti İnvestisiya
Korporasiyası” ASC-nin tikinti
üzrə baş direktorunun müavini Anar Məmmədovun, 8 saylı Tovuz Regional SuKanal İdarəsinin rəisi
Darvin Hüseynovun, Qazax şəhərinin su təchizatı və kanalizasiya
sistemlərinin tikintisi layihəsinin layihə rəhbəri Sədi Namazovun, layihə
rəhbərinin köməkçisi Azər Salmanovun, layihə üzrə sahə rəisi Toğrul Nərimanovun,
"Azərsu” ASC-nin mühəndisi Rövşən Əsgərovun, 8 nömrəli Regional
Sukanal İdarəsinin Qazax Sukanal sahəsinin rəisi Alı Hüseynovun, RİH başçısının
şəhər İnzibati Ərazi Dairəsi üzrə nümayəndəsi Akif Vəliyevin, Mənzil İstismar
Sahəsinin rəisi Mahmud Mirzəyevin iştirakı ilə bu günə kimi su və
kanalizasiya sistemləri çəkilmiş ərazilərdə həyata keçirilən işlərin mövcud
vəziyyəti geniş şəkildə müzakirə olunub.
Facebook-da paylaş