İcra başçısı tarixi Qələbənin qazanılmasında iştirak edən yaralı hərbçimizə baş çəkib
Sentyabrın 27-dən başlayan
Azərbaycanın haqq savaşı, Vətən müharibəsi 10 noyabrda böyük tarixi Qələbə
ilə başa çatdı. Elə bir tarixi Qələbə ki, biz xalq olaraq şanlı Ordumuzun cəbhədə
qazandıqları uğurlu nailiyyətlərlə, Ermənistan silahlı qüvvələrinə vurduqları
sarsıdıcı zərbələrlə, azad etdikləri yaşayış məntəqələri ilə o qələbənin anbaan şahidi olduq, izlədik və daim qürur duyduq. Fəxrlə
söylədiyimiz, illər ötsə belə söyləyəcəyimiz bir həqiqət var ki, o da bu tarixi
qələbəni bizlərə bəxş edən şəxsin tarixi şəxsiyyət, Azərbaycan Prezidenti,
Silahlı Qüvvələrin Ali Baş Komandanı İlham Əliyevin olmasıdır. Bizlərə 44
günlük haqq savaşında hər gün sevinc, fərəh, qürur dolu saysız-hesabsız qələbələr
bəxş edən şanlı Azərbaycan Ordusunun əsgər və zabitləri, hərbçiləridir. Azərbaycanın Vətən müharibəsində parlaq qələbə
qazanmasında, torpaqlarımızın işğaldan azad olunmasında, işğalçı düşmənin
torpaqlarımızdan qovulmasında iştirak edən və müstəsna xidmətləri olan
hərbçilərimizdən biri də Məmmədov Xəyal
Valeh oğludur. Qazax rayonunun sərhəddə yerləşən Aslanbəyli kəndində doğulub boya-başa çatan Xəyal bu gün göstərdiyi igidliyə görə hər
birimizə örnəkdir. Vətənə olan borcunu qaytarmaq üçün Azərbaycan Respublikasının Silahlı Qüvvələrində müddətli
həqiqi hərbi xidmət keçən Xəyal xidmətini başa vurub qayıtmağa 2 ay qalmış elə
bir tarixi Qələbə qazandı ki, illər keçəcək və o qələbə unudulmayacaq. Kəşfiyyat
bölüyündə olan Xəyal Vətənin dar günündə hər an döyüşə hazır olan müsəlləh əsgər olduğunu bir an belə
unutmadan daim düşmənin üzərinə şığıdı. Ölümün gözünə dik baxaraq döyüş
yoldaşları, silahdaşları ilə birlikdə bir amal uğrunda – illərdir işğal altında
olan torpaqlarımızı azad etmək üçün savaşdı. Bir dəfə başından, bir dəfə də
qolundan yaralanan Xəyal Məmmədovu aldığı yaralar belə tutduğu mövqedən,
qarşıya qoyduğu məqsəddən, Vətənə və Ali Baş Komandanına verdiyi sözdən döndərə
bilmədi. Əzmi, iradəsi, dözümü sayəsində sonunda digər döyüş yoldaşları ilə
birlikdə zəfər çaldı. Haqqın savaşında haqlı olduğumuzu hər kəsə sübut etdi. Azərbaycanın
hərb tarixinə adını qızıl hərflərlə yazıdran Xəyal kimi oğullarımız yüzlərlə,
minlərlədir. Azərbaycanlı olaraq, ölkə vətəndaşı olaraq, bizlər üçün savaşan,
bizim mənliyimizi, kimliyimizi bizlərə qaytaran, xalq olaraq güclü, qüdrətli
bir xalq olduğumuzu bütün dünyaya sübut edən əsgərlərimizlə, hərbçilərimizlə
fəxr etmək, onları yaxından tanımaq, tanıtmaq, hörmət etmək, ən əsası da daim
qayğı göstərmək hər birimizin borcudur. Vətən uğrunda canından keçən
şəhidlərimizlə yanaşı, onlarla çiyin-çiyinə döyüşən yaralı oğullarımızı da
unutmamalıyıq. Şəhidlərimizin timsalında onların bizlərə əmanəti kimi sahib
çıxmalıyıq. Hər an fikirləşməliyik ki, şəhidlərimiz canlarından keçdi,
yaralılarımız da ölümün bir addımlığından döndü. Hər ikisi bizim üçün doğma və əzizdir. Ali Baş Komandanın
"İrəli!” əmrini layiqincə yerinə yetirərək Vətən torpaqlarının ərazi
bütövlüyünü bərpa etmək üçün ön cəbhədə döyüşən hərbçilərimizə, əsgərlərimizə
diqqət ayırmaq, qayğı göstərmək, sahib çıxmaq. Qazaxda bu amil hər zaman
ön planda olub və olmaqda davam edir. Qazax Rayon İcra Hakimiyyətinin
başçısı Rəcəb Babaşovun fəaliyyətə başladığı ilk gündən hərbçilərimizə
qayğı ilə yanaşması, onları ziyarət etməsi bunun bariz nümunəsidir. Bu
gün Qazax Rayon İcra Hakimiyyətinin başçısı
Rəcəb Babaşov Aslanbəyli kəndində olub, yaralı hərbçimizə baş
çəkib. "Hər bir hərbçi mənim üçün
doğmadır, əzizdir”, - deyən icra başçısı hərbçimizə sağ-salamat ailəsinin
yanına qayıtmasına görə səmimi ürək sözlərini çatdırıb. Vətən uğrunda
igidcəsinə döyüşən hərbçimizin səhhəti və qayğıları ilə maraqlanıb. Rayon
rəhbəri ona tez bir zamanda sağalaraq döyüş yoldaşlarının yanına qayıtmağı və
yenidən onlarla birlikdə olmağı arzulayıb. Ölkə Prezidentinin hərbçilərimizə, əsgərlərimizə, onların ailə üzvlərinə
olan diqqət və qayğısını əldə rəhbər tutan rayon rəhbəri bu sahədə olan
diqqətin, qayğının bundan sonra da davam etdiriləcəyini bildirib. İkinci Qarabağ müharibəsində şanlı Ordumuzun
keçdiyi döyüş yolundan, hərbçilərimizin göstərdiyi şüacətdən söz açan Xəyal
Məmmədov bu döyüşdə onlara güc, qüvvət verən əsas amilin dövlət-xalq-ordu
birliyinin, həmrəyliyinin olduğunu qeyd edib. Bu birliyin onları daha böyük
qələbələrə səslədiyinə və sonda zəfər çalmalarına, qələbə qazanmalarına vəsilə
olduğunu vurğulayıb. Dövlətin, dövlət başçısının qayğısını
hər zaman hiss etdiyini qeyd edən Xəyal xəstəxanada olduğu müddətdə bir daha
bunun şahidi olduğunu dilə gətirib. O, xəstəxanada olan zaman daim onunla
maraqlanan, ailəsinə baş çəkən, dəstək olan rayon rəhbərliyinə minnətdarlığını
bildirib. Şəhidlərimizin canı-qanı
bahasına, hərbçilərimizin rəşadəti hesabına, dövlətimizin siyasəti hesabına
qazanılan qələbənin daimi, dönməz olduğunu söyləyib. Onunla birlikdə çiyin-çiyinə
vuruşan və şəhid olan qardaşlarına Allahdan rəhmət diləyib, yaralı döyüş
yoldaşlarına tezliklə sağalmalarını, ailələrinin yanına qayıtmalarını
arzulayıb. Bundan sonra da hər zaman Ali Baş Komandan İlham Əliyevin "İrəli!”
əmrini yerinə yetirməyə, Vətən torpağı uğrunda son damla qanına kimi yenidən
vuruşmağa hazır olduğunu söyləyib. Hərbçimizin nənəsi Minayə
Məmmədova, dayısı Sakit Həsənov Xəyal və onun kimi igid oğullarımızla fəxr
etdiklərini dilə gətiriblər. Tarix yazan oğullarımızın bundan sonra da var
olacağını söyləyiblər. Ailə üzvləri adından Xəyala və digər hərbçilərimizə göstərilən qayğıya
görə ölkə Prezidentinə və rayon rəhbərliyinə razılıqlarını ifadə edib, minnətdarlıqlarını
bildiriblər. Yaralı hərbçimizin ailəsi
ilə səmimi söhbət edən icra başçısı nəinki bu ailənin, eləcə də bütün şəhidlərimizin,
hərbçilərimizin, əsgərlərimizin, onların ailələrinin hər cür diqqət və qayğıya
layiq olduqlarını bildirib.
Facebook-da paylaş