İcra başçısı Şahnabat Nəsibova adına Sarıvəlli kənd tam orta məktəbində görülən işlərlə maraqlanıb
Respublika Prezidenti
cənab İlham Əliyev və Birinci vitse-prezident Mehriban Əliyeva tərəfindən
ölkəmizdə təhsil sahəsinə göstərilən böyük diqqət və qayğı Qazax rayonunda da
hiss olunmaqdadır. Rayonda dövlət tərəfindən
təhsil sahəsinə olan qayğının əyani sübutu "Azərbaycan Respublikası
regionlarının 2019–2023-cü illərdə sosial-iqtisadi inkişafı Dövlət
Proqramı”nın həyata keçirilməsi üzrə hazırlanmış tədbirlər planına Qazax
rayonu üzrə 11 məktəb binasının əsaslı təmirinin və ya tikintisinin
salınmasıdır. Heydər Əliyev Fondu tərəfindən reallaşan "Yeniləşən
Azərbaycana yeni məktəb” layihəsi respublikamızın hər yerində olduğu kimi,
Qazaxda da uğurla icra olunur. Dövlət Proqramında tikintisi nəzərdə tutulan Şahnabat Nəsibova adına Sarıvəlli kənd tam orta məktəb üçün Heydər Əliyev Fondu
tərəfindən həmin məktəbin həyətində 220
şagird yerlik yeni binanın inşa olunması da bunun əyani sübutudur. Bu gün Qazax Rayon İcra Hakimiyyətinin başçısı
Rəcəb Babaşov Sarıvəlli kənd tam orta məktəbində olub, görülən işlərlə maraqlanıb. Görülən işlər haqda məlumat verən iş icraçısı
Elnur Verdiyev zirzəmidə suvaq işlərinin yekunlaşmaq üzrə olduğunu bildirib. Eyni
zamanda birinci mərtəbənin hörgü işlərinin başa çatdığını qeyd edib. Hazırda
beton tökmək üçün alt hissənin hazırlıq işlərinin tamamlandığını, idman zalında
isə hörgü işlərinin davam etdiyini vurğulayıb. Qeyd edək ki, yanvar ayından tikintisinə
başlanılan 2 mərtəbədən ibarət olan yeni məktəb binasında şagirdlərin yüksək
səviyyədə təhsil almaları üçün hər cür şərait yaradılacaq. Yeni məktəbdə həcmi
25 kubmetr olan içməli su anbarı, həcmi 120 kubmetr olan yanğından mühafizə
üçün su anbarı, su nasosu stansiyası, qazanxana, idman zalı, akt zalı,
yeməkxana və oyun meydançası da inşa ediləcək. Məktəbin direktoru Məzahir Omarov müəllim-şagird
kollektivi, valideynlər və kənd sakinləri adından əsası 1967-ci ildən qoyulan
kənd məktəbi üçün yeni binanın inşasına görə ölkə Prezidenti İlham Əliyevə,
Birinci vitse-prezident Mehriban Əliyevaya bir daha minnətdarlığını bildirib. Məlumat üçün onu da qeyd edək ki, rayonda
Sarıvəlli kənd tam orta məktəbin tikintisi ilə yanaşı, Təhsil Nazirliyi
tərəfindən Aydın Məmmədov adına Qaymaqlı kənd tam orta məktəb üçün 180 şagird yerlik
yeni bina tikilir. Heydər Əliyev Fondu tərəfindən Xalq yazıçısı İsmayıl
Şıxlının adını daşıyan 1176 şagird yerlik Kosalar
kənd tam orta məktəbində isə son tamamlanma işləri aparılır.
GOYEZEN.AZ
Facebook-da paylaş