ÖLÜM SEVİNMƏSİN QOY…
Bu gün Milli Qəhrəman Firuddin Şamoyevin vəfatından 25 il ötür. Bu münasibətlə Qazax şəhərində onun xatirəsinə bulaq abidə kompleksinin açılışı olub
Ona görə də Firuddin kimi gənclər necə deyərlər ölümün gözünün içinə baxa-baxa hər gün döyüşür, torpaqlarımızı yağı düşməndən qorumağa çalışırdılar.
Könüllülərdən ibarət olan dəstədə Firuddin öz qorxmazlığı, hərbi tapşırıqları yerinə yetirməsi ilə yaşıdlarından fərqlənirdi. Onun cəsur və qorxmaz olduğunu görən rəhbərlik Firuddini "N" saylı hərbi hissəyə komandir təyin etdi. O, vətənpərvər gəncləri başına toplayaraq silaha sarılıb Vətənin müdafiəsinə qalxdı. Qazax rayonunun Bağanıs Ayrım, Məzəm, Quşçu Ayrım kəndlərinin müdafiəsində iştirak etdi.
13 aprel 1992-ci il. Həmin gün Firuddin sonuncu dəfə döyüşə atıldı. Quşçu Ayrım kəndi ətrafında gedən qanlı vuruşda qəhrəmancasına həlak oldu. Həmin gündən düz 25 il keçir.
Vətən öz şəhid övladının adını uca tutdu. Göstərdiyi şücaətə görə onun adı qəhrəmanlar sırasına yazıldı. Azərbaycan Respublikası Prezidentinin 7 iyun 1992-ci il tarixli 833 saylı fərmanı ilə Şamoyev Firuddin İsa oğluna ölümündən sonra "Azərbaycanın Milli Qəhrəmanı" adı verildi.
Şəhərin girəcəyində onun xatirəsini əbədiləşdirən bulaq abidə kompleksi var idi. Lakin bu bulaq baxımsızlıq ucbatından pis hala düşmüşdü.
Qazax rayon İcra Hakimiyyətinin Başçısı Rəcəb Babaşov fəaliyyətə başladığı ilk gündən şəhidlərimizə, onların ailə üzvlərinə xüsusi diqqət və qayğı göstərir, problemləri ilə yaxından maraqlanır. Bu mənada ilk olaraq şəhidlərimizin uyuduğu qəbiristanlıqlar, onların xatirəsinə ucaldılmış abidələr, parklar, bulaqlar, xiyabanlar abadlaşdırılmış, yenilənmiş, əsaslı şəkildə təmir edilmişdir.
Bu gün Firuddin Şamoyevin ildönümü günündə Milli Qəhrəmanın xatirəsinə tikilmiş bulağın açılışı olub. Açılış mərasimində şəhidin ailə üzvləri, yaxınları, doğmaları, ziyalılar, ağsaqqallar, veteranlar, ictimaiyyət nümayəndələri iştirak edib.
Qazax rayon İcra Hakimiyyətinin Başçısı Rəcəb Babaşov mərasimdə çıxış edərək respublikamızda, eləcə də Qazax rayonunda şəhidlərə göstərilən hörmət və ehtiramdan danışıb. Qeyd edib ki, bu gün cəbhə bölgəsində yerləşən Qazax rayonu 292 şəhid veribdir. Onlardan 5 nəfəri Azərbaycanın Milli Qəhrəmanı adına layiq görülübdür. Bundan əvvəl də şəhidlərə hörmət əlaməti olaraq onların xatirəsinə bulaq abidə kompleksləri inşa edilib. Ümumiyyətlə, bu gün Qazax şəhərində şəhidlərin xatirəsinə 7 bulaq abidə kompleksi tikilib.
Sonra rayon ağsaqqalı Xanqulu Süleymanov, AYB Qazax zona filialının sədri, əməkdar incəsənət xadimi, şair Barat Vüsal, şair Cavanşir Rüstəm, qəhrəmanın adını daşıyan şəhər 4 saylı tam orta məktəbin direktoru Məhəmməd Aşırov və başqaları çıxış edərək şəhidin keçdiyi döyüş yolundan danışıblar.
Facebook-da paylaş