Arx və kanallarda aparılan təmizlik işləri davam edir
Son 15 ildə Azərbaycanda
bütün sahələrlə yanaşı, qeyri-neft sektorunun inkişafı da dövlət siyasətinin
prioritet istiqamətlərindən birini təşkil edir. Prezident İlham Əliyevin rəhbərliyi altında həyata keçirilmiş
ardıcıl və məqsədyönlü iqtisadi siyasət nəticəsində ölkə iqtisadiyyatı,
xüsusilə də kənd təsərrüfatı yüksələn sürətlə inkişaf edir.
2004-2018-ci illər ərzində iqtisadiyyatın şaxələndirilməsi,
qeyri-neft sektorunun və bölgələrin davamlı yüksəlişi məqsədilə regionların
sosial-iqtisadi inkişafına dair təsdiq edilmiş üç dövlət proqramının uğurla
icra olunması Azərbaycanın bütün dünyada iqtisadi cəhətdən güclü bir dövlət
kimi tanınmasına böyük təsir göstərir. Məhz 2004-2008,
2009-2013 və 2014-2018-ci illəri əhatə edən həmin dövlət proqramlarının
reallaşdırılması nəticəsində kənd təsərrüfatı sahəsində böyük infrastruktur
yaradılmış, qeyri-neft sektorunun inkişafında aqrar sektorun payı xeyli dərəcədə
artmışdır.
Tam əminliklə deyə bilərik ki, bu gün Azərbaycan iqtisadiyyatının
ayrılmaz hissəsi olan kənd təsərrüfatı sürətlə inkişaf edir. Bunu ölkə
rəhbəri tərəfindən aparılan düşünülmüş və düzgün siyasətin, vaxtında həyata
keçirilən köklü islahatların sayəsində əldə edilən uğurlardan da aydın şəkildə
görmək olar.
2018-ci il Qazax rayonunda da kənd təsərrüfatının inkişaf etdirilməsi
baxımından olduqca yaddaqalan bir il olmuşdur. Ötən illərə nisbətdə bu il də
əkin sahələrinin hektarı artırılmışdır. Bu gün rayonda kənd təsərrüfatı
sahəsində olan bu uğuru ildən-ilə artan əkin sahələrinin hektarından da görmək
olur. Belə ki, 2016-cı ildə 16520,6 hektarda, 2017-ci ildə 18694,37 hektarda
əkin aparılmışdısa, 2018-ci ildə bu rəqəm 20682 hektar olmuşdur. 2019-cu ildə
isə 21481,30 hektarda əkin işlərinin aparılması nəzərdə tutulmuşdur.
İldən-ilə genişləndirilən əkin sahələrinin, xüsusilə də məhsuldarlığın
artırılmasının başlıca əsas səbəblərindən biri də bitkilərin vaxtlı-vaxtında
suvarma suyu ilə təmin olunmasıdır.
Son iki il yarımdır ki, Qazax Rayon İcra Hakimiyyətinin başçısı Rəcəb
Babaşov rəhbər kimi təyin olunduğu ilk gündən bu sahəni daim diqqət mərkəzində
saxlayır. İcra başçısının tapşırığına əsasən hər il rayonda olan suvarma arx və
kanalları təmir olunur, kol-kosdan və lildən təmizlənir. Bu istiqamətdə görülən
məqsədyönlü işlər də öz bəhrəsini verir.
Bu məqsədlə 2017-ci ildə 269,71 km arx və kanalların təmizlənməsi nəzərdə
tutulduğu halda 274,78 km məsafədə təmizlənmə işinin aparılması, 2018-ci
ildə də 261,19 km məsafəyə qarşı 302,44 km arx və kanallarda təmizlik işləri
görülməsi bu dediklərimizin əyani sübutudur. 2019-cu ildə isə 266,58 km
məsafədə arx və kanallarda təmizlik işlərinin aparılması nəzərdə
tutulmuşdur. Bunun da 140,13 km-i əl əməyi, 126,45 km-i isə texnika
vasitəsilə həyata keçirilməsi planlaşdırılır. Lakin əvvəlki illərdə olduğu
kimi, 2019-cu ildə də bu rəqəmin artacağı gözlənilir.
Yola saldığımız ilin noyabr ayından başlayaraq əkin sahələrinin vaxtında
suvarılması, kəndlilərin suvarma suyu ilə yüksək səviyyədə təmin olunması məqsədilə
suvarma arx və kanallarının təmizlənməsinə böyük sürətlə start verilib. Hazırda
bütün kəndlər üzrə həyata keçirilən bu ümumrayon işi uğurla davam etdirilir.
Belə ki, bu gün ümumi rayon üzrə təmizlənməsi nəzərdə tutulan 266,58 km-in
170,36 km-i təmizlənib ki, bunun da 108,86 km-i əl əməyi, 61,50 km-i isə
texnika vasitəsilə həyata keçirilib.
Bu gün Qazax Rayon İcra Hakimiyyəti başçısının birinci müavini Məmməd
Alıyev rayonun Çaylı-Bala Çaylı, Hüseynbəyli və Canalı kəndlərində arxlarda
aparılan təmizlik işləri ilə yaxından tanış olub.
Çaylı-Bala Çaylı kəndlərində də arxlarda
aparılan təmizlik işləri sürətlə davam etdirilir. Kəndlilərin də yaxından
iştirak etdiyi bu təmizlik işlərində əkin sahələrinin bol suvarma suyu ilə təmin
olunması üçün indidən lazımi hazırlıq işləri görülür. Digər kəndlərdə olduğu
kimi, bu kənddə də arxlar alaq otlardan, lildən təmizlənir. 25,10 km məsafədə təmizlik
işlərinin aparılması nəzərdə tutulub. 9,40 km-i texnika, 15,70 km-i əl əməyi ilə
olmaqla həyata keçirilən işlərə ilk gündən sürətlə start verilib. Bu günə kimi
18,57 km təmizlənib ki, bunun 4,32 km-i texnika, 14,25 km-i əl əməyi ilə həyata
keçirilib.
Hüseynbəyli kəndində arxlarda aparılan təmizlik
işləri ilə tanış olan rayon rəhbərliyinə bildirilib ki, kənddə nəzərdə tutulan
6,10 km məsafədə arxlar alaq otlardan, lildən təmizlənir. 2,40 km-i texnika,
3,70 km-i əl əməyi ilə olmaqla həyata keçirilən işlərə ilk gündən sürətlə başlanılıb.
Bu günə kimi 5,27 km təmizlənib ki, bunun da 1,60 km-i texnika, 3,67 km-i isə əl
əməyi ilə aparılıb.
Canalı kəndində də 10,83 km məsafədə arx
və kanallarda təmizlik işlərinin aparılması nəzərdə tutulub. Bunun da 4,60 km-i
texnika, 6,23 km-i isə əl əməyi ilə təmizlənəcəkdir. Artıq bu günə kimi qeyd
olunan məsafədən 8,21 km təmizlənib ki, 3,68 km-i texnika, 4,53 km-i isə əl əməyi
vasitəsilə aparılıb.
Hər il Qazaxda arx və kanallarda həyata keçirilən bu ümumrayon işini yüksək
qiymətləndirən kənd sakinləri görülən bu işin rayonda kənd təsərrüfatının
inkişaf etdirilməsi istiqamətində atılan uğurlu addımlardan biri olduğunu qeyd
ediblər. Əkin sahələrinin hektarının ildən-ilə artmasında arx və kanalların
təmizlənməsinin böyük rolu olduğunu bildiriblər. Görülən bu işlər nəticəsində
suyun ötürücülük gücünün artdığını, həm də su itkisinin qarşısının alındığını
qeyd edən sakinlər istər ötən il, istərsə də bu ilin yazında və payızında aparılan
təmizlik işlərinin kənd təsərrüfatının inkişaf etdirilməsində öz müsbət nəticəsini
verəcəyini vurğulayıblar.
Bütün kəndlərdə kəndlilər və təsərrüfatla məşğul olan insanlar əkin sahələrinin
vaxtında suvarılması, kəndlilərin suvarma suyu ilə təmin olunması məqsədilə
həyata keçirilən bu işlərə, onlara göstərilən diqqət və qayğıya görə rayon
rəhbərliyinə minnətdarlıq ediblər.
GOYEZEN.AZ
Facebook-da paylaş