Bu gün ulu öndər Heydər Əliyevin vəfatından 15 il ötür. Heydər Əliyev şəxsiyyətinin əzəməti və böyüklüyü illər ötdükcə daha dərindən dərk olunur. Azərbaycan xalqının öz dahi oğluna məhəbbət və ehtiramı ildən-ilə daha da artır. Çünki bu gün Azərbaycan dünyada ən sürətlə inkişaf edən ölkələr sırasında yer alıbsa, səsimiz beynəlxalq kürsülərdən daha gur eşidilirsə, bayrağımız uca zirvələrdə dalğalanırsa, bu, dahi şəxsiyyət Heydər Əliyevin müdrik və uzaqgörən siyasəti nəticəsində mümkün olmuşdur.

Qeyri-adi şəxsiyyəti, siyasət və dövlət xadiminə xas olan böyük istedadı ilə fərqlənən ümummilli lider Heydər Əliyev hələ sağlığında canlı əfsanəyə çevrilmişdir. Azərbaycanın özü qədər əbədi olan dahi şəxsiyyət hər bir vətəndaşın qəlbində böyük məhəbbətlə anılır, sevilir, yaşanır və əbədi yaşayacaqdır.

Ulu öndərin Azərbaycana rəhbərlik etdiyi dövrlərdə həyatımız büsbütün dəyişdi. Artıq Azərbaycan 15 il əvvəlki Azərbaycan deyil. Baş verən inkişaf ildən-ilə gözəlləşən paytaxt Bakının və regionlarımızın simasında aydın görünür. Bu gün Azərbaycanın təşəbbüsü və bilavasitə iştirakı ilə qlobal layihələr həyata keçirilir, ölkəmiz beynəlxalq səviyyəli yarışlara, tədbirlərə ev sahibliyi edir.

Ən əsası da 1990-cı illərdə çox ağır, böhranlı vəziyyətə düçar olmuş xalq ötüb keçənləri unutmayıb və xilasına görə özünü Heydər Əliyevə borclu sayır. Hər il dekabrın 12-də və mayın 10-da Fəxri xiyabanda yaşanan böyük izdiham ulu öndərin xatirəsinə olan tükənməz sevgi və ehtiramın parlaq ifadəsi kimi hər zaman diqqət çəkir.

Respublikamızın hər yerində olduğu kimi, Qazax rayonunda da müstəqil Azərbaycan dövlətinin qurucusu və memarı ulu öndər Heydər Əliyevin anım günü böyük izdihamla qeyd olunub.

Qazax Rayon İcra Hakimiyyətinin başçısı Rəcəb Babaşov ümummilli lider Heydər Əliyevin adını daşıyan parka gəlib, dahi şəxsiyyətin abidəsi önünə gül dəstələri qoyaraq əziz xatirəsini ehtiramla yad edib.

Hüquq-mühafizə orqanlarının, idarə, müəssisə və təşkilatların rəhbərləri, əmək kollektivləri, ağsaqqallar, müharibə və əmək veteranları, tələbələr, məktəblilər, ictimaiyyətin müxtəlif təbəqələrinin nümayəndələri, minlərlə rayon sakini ulu öndərin abidəsini ziyarət edib, gül dəstələri qoyub, öz sevgi və ehtiramlarını bildiriblər.

Sonra Heydər Əliyev Mərkəzində dahi şəxsiyyətin həyat və fəaliyyətini əks etdirən "Dahi şəxsiyyət” adlı filmə baxıb, kitab və jurnallardan ibarət sərgi ilə tanış olub, öz ürək sözlərini qeyd ediblər.

Qazax Rayon İcra Hakimiyyətinin başçısı Rəcəb Babaşov bildirib ki, Azərbaycanın ən yeni tarixi Heydər Əliyevin adı ilə bağlıdır. İntibah və milli şüurun oyanışı onun hakimiyyətə gəlişi ilə başlayıb, müstəqilliyimiz məhz onun sayəsində dönməz xarakter alıb.

İcra başçısı qeyd edib ki, bu gün dahi şəxsiyyətin gördüyü işləri görməmək olmaz. Azərbaycan xalqı fəxr edə bilər ki, onun tarixi və taleyi dahi şəxsiyyət Heydər Əliyevin adı və ideyaları ilə bağlıdır. Vətənimiz üçün çox mürəkkəb bir dövrdə xalqına arxa olan ulu öndər Heydər Əliyev Azərbaycanın inkişaf tarixində silinməz izlər qoymuşdur. Onun zəhməti nəticəsində Azərbaycan dünyanın siyasi meydanında öz sözünü deyə bilən qüdrətli dövlətə çevrilmişdir. Bu gün bunu Azərbaycan xalqı yaxşı dərk edir və ulu öndərə olan sevgini göstərir. Hər il ulu öndərin istər Fəxri xiyabanda yerləşən qəbrinin, istər bölgələrimizdə olan abidələrinin izdihamla ziyarət olunması, dahi rəhbərə olan böyük hörmət və ehtiram onu bir daha sübut edir ki, Heydər Əliyev hər zaman xalqın qəlbində yaşayır.

Rayon rəhbəri bildirib ki, Azərbaycanda  istər yaşlı insanlar, istər orta, istərsə də gənc nəsil ümummilli liderin Azərbaycan dövləti və xalqı üçün etdiklərini qədirbilənliklə xatırlayır və yüksək qiymətləndirirlər. Yaşlı nəsil ona görə qiymət verir ki, ölkənin çətin və keşməkeşli günlərini görüblər. Azərbaycanın ağır günlərində məhz ulu öndərin dəstəyini, diqqət və qayğısını hiss ediblər. Orta nəsil də Azərbaycanın müstəqillik əldə etdikdən sonra ölkədə baş verən yeniliklərin, gündən-günə olan inkişafın şahidi olduğu üçün dahi rəhbərin bu xalq üçün etdiklərini müqayisə edərək görülən işləri yüksək dəyərləndirirlər. Gənc nəsil də bu gün inkişaf etmiş Azərbaycanı bütün dünya dövlətləri ilə müqayisə edən zaman bir daha şahidi olur ki, bütün bu inkişafın, qazanılan uğur və nailiyyətlərin təməlində, mayasında ulu öndər Heydər Əliyevin həyata keçirdiyi misilsiz xidmətlər dayanır.

Rayon rəhbəri qeyd edib ki, ulu öndərin dilimiz, dinimizlə bağlı gördüyü işləri, təhsil, səhiyyə, mədəniyyət, idman, kənd təsərrüfatı, eləcə də digər sahələrdə həyata keçirdiyi saysız-hesabsız məqsədyönlü tədbirləri sadalamaqla bitməz.

Dahi şəxsiyyətin xalqı qarşısında daha bir müstəsna xidməti isə İlham Əliyev kimi oğul yetişdirməsidir. Ulu öndər həyatının son günlərində xalqa müraciətində yazırdı: Mən İlham Əliyevə özüm qədər inanıram. Əminliklə bildirirdi ki, İlham Əliyev Azərbaycanı daha parlaq gələcəyə aparacaq.

Bəli, o vaxtdan ötən 15 ilin möhtəşəm uğur salnaməsi ulu öndərin öz inamında yanılmadığının əyani təsdiqidir. Bu gün ulu öndərin vaxtilə söylədiyi "Bütün gücümü və iradəmi yalnız müdrik və qədirbilən xalqımdan almışam. Ən çətin anlarda, ən mürəkkəb vəziyyətlərdə yalnız və yalnız xalqıma arxalanmışam. Bu da mənə dözüm, iradə verib və bütün uğurlarımı təmin edib” kimi dəyərli fikirləri iş fəaliyyətinin hər anında hiss edən ölkə başçısı da öz xalqına arxalanaraq müdrik siyasəti ilə ölkəmizi irəli aparır. Yeni əsrin yeni lideri olan Prezident İlham Əliyev Azərbaycana bacarıqla rəhbərlik edir. Dövlətin sükanının etibarlı əllərdə olduğunu görən xalq öz Prezidentinə güclü dəstək verir və onun arxasınca inamla gedir.

GOYEZEN.AZ