İcra başçısı kartof sahələrində təsərrüfat adamları ilə görüşüb
Bu gün mətbəximizdə ən çox istifadə etdiyimiz ərzaq
məhsullarından biri kartofdur. Hazırda strateji məhsul sayılan kartof çörəkdən
sonra ən çox ehtiyac duyulan qida növüdür. Kartofçuluğun inkişafına respublikamızın
hər yerində olduğu kimi, Qazax rayonunda da fermerlər tərəfindən böyük maraq vardır. Bunu hər il rayonda kartof
sahələrinin genişləndirilməsindən də aydın şəkildə görmək olar. Bu il də Qazax
rayonunda kənd təsərrüfatının başqa sahələrində olduğu kimi, kartofçuluqda nümunəvi
işlər görülüb. Təhlükəli zərərvericilərə qarşı vaxtında aparılan kimyəvi
mübarizə tədbirləri nəticəsində fermerlər kartof əkilmiş sahələrdə bol məhsul
yetişdiriblər. Ötən il 809,1 hektarda kartof becərən sakinlər bu sahənin
gəlirli olduğunu nəzərə alaraq bu il əkin sahələrini daha da genişləndiriblər. Bu
il 1086 hektar sahədə kartof əkiblər. Bu da ötən illə müqayisədə 276,9 hektar
çoxdur. Hazırda rayonda
təsərrüfatın məhsuladar dövrüdür. El arasında "ikinci çörək” sayılan və dəyərli
ərzaq məhsulu kimi bitkiçilikdə mühüm yer tutan kartof yığımı uğurla davam
edir. Fermerlər çəkdikləri əziyyətin bəhrəsini götürməklə məşğuldurlar. Bu gün Qazax Rayon
İcra Hakimiyyətinin başçısı Rəcəb Babaşov rayonun Birinci və İkinci Şıxlı,
Cəfərli kəndlərində kartof əkilmiş sahələrdə olub, burada çalışan sadə kəndlilərlə
görüşüb. Əkilmiş kartofun məhsuldarlığı və keyfiyyəti ilə maraqlanıb. Sakinlərlə
səmimi söhbət aparan rayon rəhbərinə məlumat verilib ki, hazırda kartof sahələrində
qızğın iş gedir və sahələrdən bol məhsul toplanır. "Gələcəkdə kartof
sahələrini daha da genişləndirəcəyik” - deyən fermerlər Prezident İlham
Əliyevin əhalinin ərzaq təhlükəsizliyinin təmin edilməsi, həmçinin yeni iş
yerlərinin yaradılması, ixracın artırılması ilə bağlı verdiyi tapşırıq və
tövsiyələrin reallaşdırılması üçün böyük səylə çalışdıqlarını bildiriblər. Qeyd ediblər
ki, bu gün dövlət tərəfindən sadə kəndlilərə verilən dəstək, göstərilən diqqət
və qayğı bizdə böyük ruh yüksəkliyi yaradır. Daha çox məhsul istehsal etməyə
sövq edir. Gündəlik sahədə çalışan hər bir kənd sakini ay ərzində təxminən
300-400 manat əmək haqqı alır. Bir ailədən 2-3 nəfərin çalışdığını nəzərə
aldıqda isə bu rəqəm 900-1000 manat təşkil edir. Bütün bunlar isə əhalinin məşğulluğunun
təmin olunması və maddi rifah halının yaxşılaşdırılması deməkdir. Rayon
rəhbərinin bugünkü görüşünü yüksək qiymətləndirən sakinlər onlara göstərilən
diqqət və qayğıya görə minnətdarlıqlarını bildiriblər. Qazaxda kənd təsərrüfatının
inkişafı üçün bundan sonra da var qüvvələri ilə çalışacaqlarını qeyd ediblər. İkinci Şıxlı kəndində əkilmiş kartof sahəsi
Cəfərli kəndində əkilmiş kartof sahəsi GOYEZEN.AZ
Facebook-da paylaş