Gənclər Xalq artisti Tariyel Qasımovla görüşüblər
Mayın 9-da "Qazax
Gənclər Evi" sosial xidmət müəssisəsinin təşkilatçılığı ilə Azərbaycanın
teatr və kino aktyoru, Azərbaycan SSR-nin Əməkdar və Azərbaycan Respublikasının
Xalq artisti Tariyel İsgəndər oğlu Qasımovla müəssisədə gənclərin görüşü
keçirilib. Qazax Gənclər Evinin
direktoru Vüsal Hüseynov tədbiri giriş sözü ilə açaraq gəncləri salamlayıb,
Xalq artisti Tariyel Qasımovu gənclərə təqdim edib, onun yaradıcılıq fəaliyyətinin
gənc nəsil üçün əsl məktəb olduğunu xüsusi vurğulayıb.
Sonra Xalq artisti Tariyel
Qasımov aktyorluq sənətinin incəlikləri haqqında danışıb, istər komediyada, istər
faciədə aktyorun ciddiliyinin vacib məsələ olduğunu qeyd edib. Xalq artisti
bildirib ki, biz özümüzdən böyüklərə, ustadlarımıza baxmışıq və onlardan sənətə
hörməti, sənətə qayğını öyrənmişik. Gördükləri işlərdə hikmət görmüşük, hikmət
sahibləri olmuşlar. Rollarında, tamaşaya qoyulan əsərlərdə bir hikmət var idi.
Mən düşünürəm ki, hər bir obrazın, hər bir tamaşanın cəmiyyət üçün, gənclik
üçün tərbiyəvi əhəmiyyəti olmalıdır. "Aktyorluq sənəti uzaqdan çoxuna asan
görünə bilər. Amma əslində aktyorluq sənəti böyük bir yaradıcılıq işidir.
Aktyorluq sənəti gecə-gündüz məşqlər tələb edir. Teatr səhnəsi, tamaşa salonunda
tamaşaçı alqışları - bunların hamısı böyük məsuliyyətdir” - deyən Tariyel
Qasımov aktyorluq sənətinin onun üçün şərəfli bir iş olduğunu bildirib.
Daha sonra Qazax Dövlət
Dram Teatrının direktoru Saqif İsgəndərov Xalq artistinin həyat və yaradıcılığından,
rol aldığı tamaşa və kinolardan danışıb. Olduqca maraqlı keçən
görüşdə Tariyel Qasımov gənclərin suallarını ətraflı şəkildə cavablandırıb. Görüşün sonunda
Tariyel Qasımov Qazax Gənclər Evinin kollektivi və gənclərlə xatirə şəkilləri çəkdirib.
GOYEZEN.AZ
Facebook-da paylaş