Qazaxlı gənclər bu dəfə Vətən müharibəsi iştirakçıları ilə görüşüblər
2020-ci ilin 27 sentyabrı Azərbaycan xalqının
yaddaşına və hərb tariximizə Qələbə, Zəfər ilinin başlanğıc tarixi kimi
yazıldı. İllər ötsə belə həmin gün heç vaxt unudulmayacaq. 30 illik həsrətdən
sonra bizi Qarabağımıza, işğalda olan torpaqlarımıza qovuşduran 44 günlük Vətən
müharibəsi və müharibənin başlandığı 27 sentyabr günü hərb tariximizin şanlı
salnaməsi kimi hələ uzun illər öyrəniləcək. Vətəndaş olaraq Qarabağımızı,
Şuşamızı, eləcə də işğalda olan digər torpaqlarımızı düşmən tapdağından azad
edən Silahlı Qüvvələrin Müzəffər Ali Baş Komandanı İlham Əliyevə, əsgər və
zabitlərimizə minnətdar olmaq, qanları ilə dastan yazan şəhidlərimizin ruhları
qarşısında baş əymək, Vətən naminə döyüşən və yaralanan qazilərimizlə,
canlarından keçən şəhidlərimizlə hər zaman qürur duymaq, ən əsası da onları
tanımaq və tanıtmaq vətəndaş olaraq hər kəsin ən ümdə vəzifəsidir. Qazax Rayon Gənclər və İdman İdarəsinin əməkdaşları və könüllüləri də Vətən uğrunda
canından keçən şəhidlərimizi hər zaman yad edir, əziz xatirələrini dərin
ehtiramla anırlar. Sağlamlığını Vətən yolunda itirən qazilərimizə daim baş
çəkir, onların keçdikləri döyüş yolunu gələcək nəsillərə örnək göstərirlər. Öz
ənənəsinə sadiq qalan gənclər bu dəfə oktyabrın 19-da 44
günlük Vətən müharibəsi iştirakçıları Kosalar kənd sakinləri, "Füzulinin
azad olunmasına görə”, "Hərbi xidmətlərə görə” medalları ilə
təltif olunmuş qazi Nəbizadə Ceyhun Fazil oğlu, "Füzulinin azad olunmasına görə”
medalı ilə təltif olunmuş Süleymanov İlham Habil oğlu ilə
görüşüblər.
Görüşlər zamanı Qazax
Rayon Gənclər və İdman İdarəsinin rəisi Vüqar Nəbiyev çıxış edərək Ali Baş Komandan İlham Əliyevin
uzaqgörən siyasəti, xalqımızın iradəsi və rəşadətli ordumuzun şücaəti nəticəsində
30 ilə yaxın işğal altında olan torpaqlarımızın düşməndən azad edildiyini söyləyib.Vüqar Nəbiyev bildirib ki, artıq Qarabağ
xalqımız üçün arzu deyil, reallıqdır. Bu reallığı yaradan və qələbəmizi təmin
edən Ali Baş Komandan İlham Əliyev başda
olmaqla, fədakar əsgər və zabitlərimizə, hərbçilərimizə, qanları ilə tarix
yazan şəhidlərimizə, sağlamlığını itirən qazilərimizə borclu və minnətdarıq. Ölkə Prezidenti İlham Əliyev, Birinci vitse-prezident
Mehriban Əliyeva və rayon rəhbərliyi tərəfindən şəhid ailələrinə, qazilərimizə
göstərilən dövlət qayğısından söz açaraq bugünkü ziyarətin də məhz həmin qayğının
davamı olduğunu diqqətə çatdırıb. Gələcək nəsillərə şəhidlərimizi, qazilərimizi
tanıtmağın ən ümdə iş olduğunu vurğulayıb. Sonra
qazi Ceyhun Nəbizadənin məşqçisi "Əməkdar məşqçi” Tariyel Nəsibov, Vətən
müharibəsi iştirakçısı İlham Süleymanovun məşqçisi "Əməkdar məşqçi” Natiq
Hüseynov və İsmayıl Şıxlı adına Kosalar kənd tam orta məktəbin tədris hissə müdiri
Bərgah Nəsibov çıxış edərək şanlı ordumuz tərəfindən torpaqlarımızın düşmən
tapdağından azad olunmasından və əsgərləmizin qəhrəmanlıqlarından fəxrlə söhbət
açıb, 30 illik həsrətə son qoyulduğunu qeyd ediblər. Sonda
döyüş yollarından söz açan qəhrəmanlarımız gənclərimizi maraqlandıran sualları
cavablandırıb, müharibə iştirakçıları, şəhid
ailələrinə göstərilən qayğı və xüsusi dəstəyə görə ölkə Prezidenti İlham
Əliyevə, Birinci vitse-prezident Mehriban Əliyevaya, rayon rəhbərliyinə
minnətdarlıqlarını bildiriblər. Bugünkü ziyarəti dövlətin növbəti qayğısı kimi
qiymətləndiriblər. GOYEZEN.AZ
Facebook-da paylaş