Qazaxlı gənclərdən Qələbə Günü münasibətilə nümunəvi addım
27 sentyabr və 10 noyabr tarixləri.
Azərbaycan təqvimində bu iki rəqəm hər zaman xüsusi qeyd ediləcək. Prezident İlham Əliyevin rəhbərliyi altında
Azərbaycan Ordusu Ermənistanın ardıcıl təxribatlarının və yeni işğal
planlarının qarşısını almaq, işğal altında olan torpaqlarımızı azad etmək
məqsədilə sentyabrın 27-dən etibarən zəfər yürüşünə başladı. Azərbaycan Ordusunun
əsgər və zabitləri, hərbçiləri göstərdikləri şücaətlə, qəhrəmanlıqla qısa müddət
ərzində ciddi uğurlar qazandı. 44 günlük Qarabağ adlı haqq savaşında Azərbaycan özünün hərbi və siyasi gücünü sübut edərək tarixi qələbə
qazandı. 2020-ci ilin 10 noyabr tarixi Azərbaycan tarixinə Qələbə Günü kimi düşdü. Respublikamızın hər
yerində olduğu kimi, qazaxlılar da qələbə sevincini böyük ruh yüksəkliyi ilə
qeyd edirlər. Qazanılan tarixi qələbəyə görə Azərbaycan
Respublikasının Prezidenti, Müzəffər Ali Baş Komandan İlham Əliyevə və onun rəhbərliyindəki
qüdrətli Azərbaycan Ordusuna minnətdarlıq edirlər. Bu gün Qazax Rayon
Gənclər və İdman İdarəsi və "Qazax Gənclər Evi” sosial xidmət müəssisəsi
tərəfindən gənc könüllülərin iştirakı ilə Qələbə Günü münasibətilə gözəl bir tədbir
həyata keçirilib. Gənclər tarixi gün münasibətilə müstəqil Azərbaycan dövlətinin
qurucusu, memarı olan ulu öndər Heydər Əliyevin abidəsini və Vətən uğrunda
canından keçən şəhidlərimizin xatirəsini əbədiləşdirən Şəhidlər xiyabanını
ziyarət ediblər. Ümummilli Liderin və adlarını tarixə qızıl hərflərlə yazdıran
igid Vətən oğullarının xatirəsini yad edib, onlara olan ehtiramlarını bildiriblər.
Abidə və memorial önünə tər qərənfillər düzərək ruhları qarşısında baş əyiblər. Müstəqil Azərbaycanı
bizlərə miras qoyan Ulu Öndərə və Qələbə Gününü bəxş edən şəhidlərimizə
Allahdan rəhmət diləyib, Vətən naminə canını fəda edərək yaralanan əsgər və
zabitlərimizə tezliklə sağalıb ailələrinin yanına qayıtmalarını arzu ediblər. Qələbə
sevincini onlara bəxş edən Ali Baş Komandan İlham Əliyevə, Azərbaycan əsgərinə,
şəhidlərimizə minnətdar və borclu olduqlarını dilə gətiriblər.
GOYEZEN.AZ
Facebook-da paylaş