AYB-nin Qazax zona filialında 20 Yanvar faciəsinə həsr olunmuş anım tədbiri keçirilib
Xalqımızın
yaddaşına müasir Azərbaycan tarixinin hüznlü və eyni zamanda qürur mənbəyi kimi
yazılan 20 Yanvar faciəsinin 30-cu ildönümü respublikamızın hər yerində olduğu
kimi, Qazaxda da silsilə tədbirlərlə qeyd olunur. Bu
gün Azərbaycan Yazıçılar Birliyinin Qazax zona filialında da 20 Yanvar faciəsinə həsr olunmuş anım
tədbiri keçirilib. Filialın
üzvü olan şairlər əvvəlcə şəhərin mərkəzində yerləşən Şəhidlər xiyabanında memorial
önünə qərənfillər düzüb, 20 Yanvar şəhidlərinin, eləcə də Azərbaycanın azadlığı
və ərazi bütövlüyü uğrunda canından keçmiş bütün Vətən övladlarının xatirəsi bir
dəqiqəlik sükutla yad ediblər.
Sonra tədbir Ədəbiyyat Muzeyində davam edib. Filialın ədəbi
məsləhətçisi Mustafa Rasimoğlu çıxış edərək Qanlı Yanvar hadisələri zamanı
xalqımızın başına gətirilən müsibətlərdən və Azərbaycan xalqının azadlıq
mübarizəsindən danışıb. 30 il əvvəl, 1990-cı il yanvarın 19-dan 20-nə keçən
gecə sovet ordusunun xüsusi təyinatlı cəza dəstələri tərəfindən Bakıda dinc
əhaliyə qarşı vəhşiliklər törədildiyini, günahsız insanların qətlə
yetirildiyini bir daha xatırladıb. 20 Yanvarın Azərbaycan tarixinin ən dəhşətli
faciələrindən biri olmaqla yanaşı, həm də şərəfli səhifəsi olduğunu qeyd edib. Qanlı
Yanvarda şəhid olmuş qəhrəman oğul və qızlarımızın Azərbaycanın müstəqillik
əldə etməsində misilsiz rol oynadıqlarını bildirib. 20 Yanvar faciəsinə,
xalqımıza qarşı törədilən bu qanlı və qəddar aksiyaya məhz Ulu Öndər Heydər
Əliyevin 1993-cü ildə Azərbaycana hakimiyyətə qayıdışından sonra siyasi-hüquqi
qiymət verildiyini vurğulayıb. Daha sonra filialın üzvü olan şairlər 20
Yanvar şəhidlərinin xatirəsinə həsr olunmuş şeirlərini səsləndirib, öz ürək
sözlərini çatdırıblar. GOYEZEN.AZ
Facebook-da paylaş