Şəhid ölməz, Vətən bölünməz...
Şəhidlik Vətən, torpaq, böyük
amallar uğrunda candan keçmək, özünü şüurlu şəkildə qurban vermək deməkdir.
Bəli, bu gün şəhidlər bizim həm nisgilimiz, kədərimiz, ürək ağrımız, həm də
qürurumuz, vüqarımız, fəxrimizdir. Qazaxlılar hər zaman öz şəhidləri ilə fəxr
edib, onlarla qürur duyur. Ölümün gözünə dik baxaraq canlarını Vətənə fəda edən
igid oğullarımızı xatırlamaq, yad etmək, ən əsası da gələcək nəsillərə örnək
göstərmək hər birimizin ən ümdə vəzifəmiz olmalıdır. Çünki torpaqlarımızın ərazi
bütövlüyü uğrunda gedən döyüşlərdə qəhrəmancasına şəhid olan oğul və qızlarmız bizlərə
Vətəni, üçrəngli bayrağı əmanət edən şəxslərdir. O şəxslər ki, ilk və son
kəlmələri Vətən olub. Bu gün biz vətəndaşlar da onların xatirəsini daim
yaşatmaqla, bizlərə əmanət etdiklərinə sahib çıxmaqla ruhlarını şad etməliyik Bu gün düşmənlə 168 km sərhəddi olan, 5
kəndi daim mənfur düşmən gülləsinin atəşinə məruz qalan, Bağanıs Ayrım, Xeyrımlı, Barxudarlı, Sofulu,
Qızılhacılı, Yuxarı Əskipara və Aşağı Əskipara kimi
7 kəndi hələ də düşmən tapdağı altında olan Qazax rayonu da yüzlərlə şəhid
verib. Bu gün Qazaxın Vətən uğrunda canından keçən 285 nəfər şəhidi var ki,
onlardan 7 nəfər igid oğlu Azərbaycanın Milli Qəhrəmanı adına layiq görülüb. Qazaxda Vətən torpaqlarının azadlığı
uğrunda canından keçmiş şəhidlərimizin xatirəsi isə hər zaman uca
tutulur. Rayonda Vətənin müstəqilliyi və ərazi bütövlüyü naminə canından
keçən şəhidlərimizə, onların ailə üzvlərinə olan qayğı hər zaman diqqət mərkəzində
saxlanılır. Rayon rəhbərinin ilk gündən şəhidlərimizə xüsusi diqqət ayırması,
onların ailə üzvlərinə daim qayğı ilə yanaşması, şəhidlərimizin uyuduğu
qəbiristanlıqların, onların xatirəsinə ucaldılmış abidələrin, parkların,
bulaqların, xiyabanların abadlaşdırılması, əsaslı şəkildə təmir edilməsi,
xüsusilə də şəhərin mərkəzində yerləşən Şəhidlər xiyabanında aparılan abadlıq
işləri və 285 şəhidin adı, şəkli əks olunmuş lövhələrin vurulması bu
istiqamətdə görülən əməli işlərin bariz nümunəsidir. Rayonumuza gələn
hər bir qonağın, eləcə də adi rayon sakinlərinin şəhərin mərkəzində yerləşən bu
müqəddəs məkana – Şəhidlər xiyabanına baş çəkməsi, əziz xatirələrini ehtiramla
yad etmələri şəhidlərə olan böyük ehtiramdan xəbər verir. Rayonda keçirilən
tədbirlərin öncə bu müqəddəs məkanı ziyarətlə başlaması, məktəblilərin mütəmadi
olaraq xiyabanı ziyarət etmələri, hər bir Vətən oğlunun doğum və ya anım
günündə Şəhidlər xiyabanında ruhlarına dualar oxunması, əziz xatirələrinin
dərin ehtiramla yad olunması şəhidlərimizin daim qəlblərdə yaşaması
deməkdir. GOYEZEN.AZ saytı da
mütəmadi olaraq şəhidlərimizlə bağlı silsilə yazılar dərc edir, Vətən uğrunda
canından keçmiş, doğum və anım günü olan şəhidlərimizin əziz
xatirələrini yad edir. Bu həftə də doğum günü olan, şəhidlik adlı zirvəyə
ucaldıqları günləri qeyd olunan şəhidlərimizdən Əjdər Babayevin, Qulu Yusifovun, Elmar Hüseynovun, Kərim Əsgərovun, Sərdar İsmayılovun, Yusif Vəliyevin, Elşad Sanıyevin əziz xatirəsini yad edir. Allah bütün şəhidlərimizə rəhmət
eləsin. Babayev Əjdər Xalıqverdi oğlu Babayev
Əjdər Xalıqverdi oğlu 26 avqust 1950-ci ildə Qazax rayonunun Mollacəfərli kəndində anadan
olmuşdur. Sonradan onun ailəsi Ağstafaya (Xətai kəndi)
köçmüşdür. 1958-ci ildə burada məktəbə getmiş və 1967-ci ildə həmin məktəbi
bitirmişdir. 1969-cu
ildə hərbi xidmətə çağırılır sonra isə ordudan tərxis olunan Əjdər Nərimanov
rayon polis şöbəsinə işə qəbul edilir. Nümunəvi polis işçisi kimi dəfələrlə
DİN-in mükafatlarına layiq görülmüşdür. 1995-ci il 13-17 mart hadisələri Vətənin sarsıntılı günləri idi.
Silahlı dəstələrin zərərsizləşdirilməsində Əjdər Babayev böyük şücaət göstərdi
vətənimizin bu cəsur övladı qardaş gülləsinə tuş gələrək əbədiyyətə qovuşdu. Evli idi, dörd övladı
yadigar qalıb. Azərbaycan Respublikası
Prezidentinin 4 aprel 1995-ci il tarixli 307 saylı
fərmanı ilə Babayev Əjdər Xalıqverdi oğlu ölümündən sonra Azərbaycanın Milli
Qəhrəmanı adına layiq görülmüşdür. Ağstafa rayonunda dəfn edilmişdir,
adına məktəb var. Yusifov Qulu Firuddin oğlu Yusifov
Qulu Firuddin oğlu 11 mart 1974-cü ildə Qazax rayonunun Cəfərli kəndində anadan
olmuşdur. 1981-ci ildə Cəfərli kənd orta məktəbin birinci sinfinə daxil olmuş, 1991-сi
ildə həmin məktəbin onuncu sinfini bitirmişdir. 1992-сi il mart ayının 22-də
Sofulu kənd əhalisinin ev əşyalarının çıxarılmasına kömək edərkən Cəfərli-Sofulu
yolunda "UAZ” markalı avtomobildə ermənilər tərəfindən qoyulmuş minaya
düşmüşdür. Hüseynov Elmar Nazim oğlu Hüseynov
Elmar Nazim oğlu 14 mart 1965-ci ildə Qazax rayonunun Ağköynək kəndində anadan
olmuşdur. 1972-1982-ci illərdə Qazax şəhər 1 saylı tam orta məktəbdə təhsil
almışdır. E.Hüseynov 1983-1985-ci illərdə keçmiş sovetlər birliyində hərbi xidmətdə
olmuşdur. 1988-1993-cü illərdə Bakıda DİN-in sənaye kombinatında çalışmış və həmin
kombinatın nəzdində olan texnikumda təhsilini davam etdirmişdir. Hüseynov
Elmar Nazim oğlu 1993-cü ildə Milli Ordu sıralarına daxil olmuş, "N” saylı hərbi
hissənin tərkibində tank taborunda xidmətə başlamışdır. 15 dekabr 1993-cü ildə
Beyləqan rayonu istiqamətində atəş başlayır və Elmar Hüseynov öz tankı ilə düşmənin
bir neçə atəş nöqtəsini susdurmağa nail olur. Lakin bu döyüş onun son döyüşü
olur. O, torpaqların müdafiəsi uğrunda şəhidlik zirvəsinə ucalır. Elmar
Hüseynov ölümündən sonra Azərbaycan Respublikası Prezidentinin Sərəncamı ilə
"Azərbaycan Bayrağı” ordeni və "İgidliyə görə” medalı ilə təltif edilmişdir.
Qazax rayon Mərkəzi Kitabxanasına Elmar Hüseynovun adı verilmişdir. Əsgərov Kərim Qinyaz oğlu Əsgərov
Kərim Qinyaz oğlu 14 mart 1970-ci ildə Qazax rayonunun Kosalar kəndində anadan
olmuşdur. 1977-ci ildə Kosalar kənd orta məktəbin birinci sinfinə daxil olmuş,
1987-ci ildə həmin məktəbin onuncu sinfini bitirmişdir. 1988-90-cı illərdə
sovet ordusunda xidmətdə olmuşdur. 1992-ci ildə könüllü olaraq Azərbaycan Milli
Ordusuna hərbi xidmətə getmiş, 1 yanvar 1993-cü ildə Gədəbəy bölgəsində döyüş
zamanı itkin düşmüşdür. Qazax rayon Məhkəməsinin 23 aprel 2010-cu il tarixli Qətnaməsi
ilə itkin düşmüş hesab edilmişdir. Subay idi. İsmayılov
Sərdar İsgəndər oğlu İsmayılov
Sərdar İsgəndər oğlu 15 mart 1957-ci ildə Qazax rayonunun Quşçu Ayrım kəndində
anadan olmuşdur. 1964-cü ildə Quşçu Ayrım kənd orta məktəbinin birinci sinfinə
daxil olmuş, 1975-ci ildə həmin məktəbi bitirmişdir. Elə həmin il Ç.İldırım
adına Politexnik İnstitutuna daxil olmuşdur. 1979-cu ildə həmin institutu bitirərək
Kemerovo vilayətinə göndərilmiş, orada zavodlarda müxtəlif vəzifələrdə
çalışmışdır. 1988-ci ildə Ermənistan-Azərbaycan münaqişəsi başlayan zaman Sərdar
İsmayılov Vətənə dönmüş, torpaqlarımız uğrunda gedən döyüşlərdə iştirak
etmişdir. İsmayılov
Sərdar İsgəndər oğlu 23 fevral 1997-ci ildə şəhid olmuşdur. Baş leytenant rütbəsində
idi. Subay idi. Vəliyev Yusif İbrahim oğlu Vəliyev
Yusif İbrahim oğlu 17 mart 1959-cu ildə Qazax rayonunun Əlibayramlı (indiki Aslanbəyli) kəndində anadan olmuşdur.
1966–cı ildə Əlibayramlı (hazırkı Aslanbəyli) kənd tam orta məktəbin birinci
sinfinə getmiş, 1976-cı ildə həmin məktəbin onuncu sinfini bitirmişdir. 1977-ci
ildə hərbi xidmətə getmişdir. 1979–cu ildə hərbi xidmətdən qayıtmış, 1980-ci
ildə Bakı şəhəri 54 nömrəli texniki kollecin armaturçu, elektrikçi, qaynaqçı peşəsini
bitirmişdir. 2 avqust 1994-cü ildə Qazax rayonunun Aslanbəyli kəndi ilə Ermənistan
Respublikasının sərhəddində ermənilər tərəfindən atılan atəş nəticəsində şəhid olmuşdur. Sanıyev Elşad Şərif oğlu Sanıyev
Elşad Şərif oğlu 3 iyul 1973-cü ildə Qazax rayonunun Çaylı kəndində anadan
olmuşdur. 1980-ci il ildə Çaylı kənd 1 saylı orta məktəbin birinci sinfinə
daxil olmuş və 1990-cı ildə orta məktəbi
bitirmişdir. SSRİ-nin silahlı qüvvələrində hərbi xidmət etmişdir. Sanıyev Elşad
Şərif oğlu 17 mart 1993-cü ildə Naxçıvan şəhərində Sədərək rayonunda xidməti vəzifə
borcunu yerinə yetirərkən şəhid olmuşdur.
Facebook-da paylaş