Qazaxda COVID-19-a yoluxmuş və ev şəraitində müalicə alan vətəndaşın yaşadığı ərazidə sakinlərlə profilaktik söhbət aparılıb
Respublikamızın
hər yerində olduğu kimi, Qazaxda da koronavirus (COVID-19) infeksiyasının
yayılmasının qarşısının alınması və sosial təcridin gücləndirilməsi məqsədilə
Azərbaycan Respublikası Nazirlər Kabineti yanında Operativ Qərargah tərəfindən
tətbiq olunmuş xüsusi karantin rejiminin tələblərinə, habelə sanitar
epidemioloji normalara qeyd-şərtsiz əməl olunması üçün zəruri tədbirlər görülür. Bu məqsədlə
Qazax Rayon İcra Hakimiyyətinin təşəbbüsü ilə şəhər və kəndlər üzrə hər biri 5
nəfərdən ibarət olan 30 mobil qrup da yaradılıb. Daxilində bir nəfər DİN əməkdaşı
olmaqla, Qazax Rayon İcra Hakimiyyəti başçısı aparatının, inzibati ərazi nümayəndəliklərinin,
bələdiyyələrin və digər qurumların nümayəndələrindən ibarət yaradılmış mobil
qrupun üzvləri rayon ərazisində xüsusi karantin rejiminin tələblərinin yerinə
yetirilməsinə ciddi nəzarət edir, yaşayış məntəqələrində əhali arasında
profilaktik-maarifləndirici tədbirlər həyata keçirirlər. Bu gün isə
mobil qrup üzvləri bir müddət əvvəl rayonun Orta Salahlı kəndində COVID-19
infeksiyasına yoluxması təsdiq edilmiş kənd sakini İsmayılova
Tükəzban Cavanşir qızının yaşadığı ərazidə olub, qonşuluqda
yaşayan sakinlərlə tibbi-profilaktik və maarifləndirici söhbətlər aparıblar. Qeyd edək ki, virusa yoluxmuş xəstənin simptomları yüngül olduğundan və yaşadığı
evin şəraiti xəstəni təcrid etməyə imkan verdiyindən onun müalicəsi xüsusi həkim
briqadasının nəzarəti altında evdə davam etdirilir. Qonşulardan Xalsayeva
Samaya Əmirxan qızı, Nəsibov Azər Oruc oğlu, Nəsibova Gülqənd Cümşüd qızı və başqaları ilə aparılan söhbət
zamanı onlara ölkəmizdəki mövcud vəziyyətlə əlaqədar Azərbaycan Respublikası
Nazirlər Kabineti yanında Operativ Qərargah tərəfindən tətbiq olunmuş xüsusi
karantin rejiminin qaydalarına, özünütəcrid və izolyasiya tədbirlərinə ciddi şəkildə
əməl etmələrini bildiriblər. Tibbi maskadan istifadənin və sosial məsafənin
saxlanılmasının vacibliyini diqqətə çatdırıblar. Eyni zamanda koronavirus
infeksiyasına yoluxmuş və ev şəraitində müalicə alan həmin xəstə ilə təmasda
olmamaları, mümkün qədər özünütəcrid tədbirlərinə əməl etmələri tövsiyə olunub.
Bundan əlavə, həmin vətəndaşın özünütəcrid və izolyasiya tədbirlərinə əməl etməsinə
nəzarət etmələri, evdən çıxaraq karantin rejimi və izolyasiya qaydalarını
pozduğu halda dərhal Qazax Rayon İcra Hakimiyyəti yanında yaradılmış Operativ Qərargaha
məlumat vermələri bildirilib. Sonda bir daha qeyd olunub ki, dövlət tərəfindən həyata
keçirilən tədbirlərə dəstək olmaq, ictimai nəzarəti gücləndirmək, toplu halında
yığışmamaq, qoruyucu maskalardan, dezinfeksiyaedici məhlullardan istifadə etmək,
şəxsi gigiyena qaydalarına ciddi şəkildə riayət etmək, məsafəni saxlamaq hər
bir vətəndaşın borcudur. Odur ki, hər bir vətəndaş üzərinə düşən işin məsuliyyətini
dərk etməli və dövlət tərəfindən keçirilən tədbirlərə dəstək olmalıdır. Bu işə
ilk növbədə özümüzü, yaxınlarımızı, doğmalarımızı, ətrafımızdakı yüzlərlə
insanı qorumaqla başlamalıyıq. Bunun üçün də ən başlıca işimiz xüsusi karantin
rejimi qaydalarına birmənalı şəkildə əməl etməkdir.
GOYEZEN.AZ
Facebook-da paylaş