Qazaxda koronavirusa qarşı mübarizədə təbliğat işləri daha da gücləndirilib
Azərbaycan Respublikasında koronavirus (COVID-19) infeksiyasının
yayılmasının qarşısının alınması və sosial təcridin gücləndirilməsi məqsədilə
Nazirlər Kabineti yanında Operativ Qərargah tərəfindən tətbiq olunmuş xüsusi
karantin rejiminin tələblərinə, habelə sanitar epidemioloji normalara
qeyd-şərtsiz əməl olunması üçün zəruri tədbirlər görülür. Ölkə daxilində koronavirusa
yoluxma hallarının minimuma endirilməsi istiqamətində həyata keçirilən işlərdən
biri də əhali arasında aparılan maarifləndirmə tədbirləridir. Respublikamızın
hər yerində olduğu kimi, Qazaxda da
bu sahəyə xüsusi önəm verilir. Koronavirus
pandemiyası ilə mübarizədə əhalinin sağlamlığının qorunması, infeksiyanın
yayılmasının və onun törədə biləcəyi fəsadların qarşısının alınması ilə bağlı
maarifləndirmə və təbliğat işləri mütəmadi olaraq davam etdirilir. Qazax Rayon İcra Hakimiyyətinin təşəbbüsü ilə şəhər və kəndlər üzrə hər
biri 5
nəfərdən ibarət olmaqla yaradılmış 30 mobil qrup tərəfindən yaşayış məntəqələrində əhali arasında
profilaktik-maarifləndirici söhbətlər aparılır, onlara yazılı təbliğat
materialları və maskalar təqdim edilir. Sakinlərlə maarifləndirici söhbətlər
zamanı dövlət tərəfindən həyata keçirilən tədbirlərə dəstək olmaq, ictimai
nəzarəti gücləndirmək, toplu halında yığışmamaq, qoruyucu maskalardan,
dezinfeksiyaedici məhlullardan istifadə etmək, şəxsi gigiyena qaydalarına ciddi
şəkildə riayət etmək, məsafəni saxlamaq, özlərində virusun simptomlarını hiss
edən zaman dərhal təcili tibbi yardıma müraciət etmək tövsiyə olunur. Daxilində bir nəfər DİN əməkdaşı olmaqla, Qazax Rayon İcra Hakimiyyəti başçısı
aparatının, inzibati ərazi nümayəndəliklərinin, bələdiyyələrin və digər
qurumların nümayəndələrindən ibarət yaradılmış mobil qrupun üzvləri rayon
ərazisində xüsusi karantin rejiminin tələblərinin yerinə yetirilməsinə ciddi
nəzarət edir, habelə fərdi izahetmə-xəbərdarlıq işi aparırlar. Bu gün mobil qrup üzvləri koronavirus infeksiyasının yayılmasının qarşısının
alınması məqsədilə "Dövlətə dəstək
olaq”, "Qaydalara riayət edərək insanların sağlamlığını qoruyaq” şüarı altında əhali arasında növbəti maarifləndirici
tədbir həyata keçiriblər. Əhalinin sıx toplaşdığı parklarda, avtovağzalda və
digər yerlərdə vətəndaşlarla, əsasən yaşlı sakinlərlə görüşərək Azərbaycan
Respublikası Nazirlər Kabinetinin müvafiq Qərarına əməl edərək 5
nəfərdən artıq qruplarda cəmləşməmələrini, ara məsafəsinin gözlənilməsini, ən əsası
da tibbi maskadan istifadə etmələrini bildiriblər. "Qazax
Avtovağzal” ASC-nin qarşısında, mərkəzi bazarda və ətraf ərazilərdə, "Fəxri Qazaxlılar”,
"Dədə Qorqud”, Səməd Vurğun parklarında, Səməd Vurğun bağında, "Əsədoğlu”
marketin qarşısında, eləcə də əhalinin kütləvilik təşkil etdiyi qapalı və açıq ərazilərdə
aparılan maarifləndirmə və təbliğat
zamanı əhalinin bir qisminin hələ də karantin rejiminin tələblərinə ciddi
yanaşmamasını müşahidə edən mobil qrup üzvləri bir daha vətəndaşlara son dərəcə diqqətli olmalarını söyləyiblər.
Məsuliyyətli davranmaları, xüsusi zərurət olmadan digər şəxslərlə təmasda
olmamaları və virusun yayılmasının qarşısının alınmasına dəstək olacaq hər cür
ehtiyat tədbiri görməklə bu qaydalara riayət etmələrini xahiş ediblər. Maarifləndirmə
zamanı qrup üzvləri vətəndaşlara istər ictimai nəqliyyatda, istərsə də qapalı məkanlarda
koronavirus infeksiyasının profilaktikasına dair metodiki göstərişlərə əməl etməyən,
pozuntu hallarına yol vermiş şəxslər barədə qanunvericiliklə müəyyən edilmiş
qaydada tədbirlər görüləcəyini bildiriblər. Vətəndaşlara
tibbi maska paylayan qrup üzvləri ondan istifadənin hər birimiz, xüsusən də
doğmalarımızın, yaxınlarımızın, cəmiyyətimizin hər bir fərdinin sağlamlığı üçün
vacib olduğunu bir daha diqqətə çatdırıblar.
"Qazax Avtovağzal”ın qarşısı
"Əsədoğlu" marketin qarşısı
Mərkəzi bazar və ətrafı
Heydər Əliyev prsopekti
"Fəxri Qazaxlılar" parkı GOYEZEN.AZ
Facebook-da paylaş