“30 illik həsrəti sona çatan Xarıbülbül”
Qazax Rayon Heydər
Əliyev Mərkəzinin təşkilatçılığı ilə Azərbaycan Respublikası Mədəniyyət
Nazirliyinin 27 sentyabr 2021-ci il tarixli 07/04-1840/2021 nömrəli məktubunun
icrası məqsədilə Vətən müharibəsinin birinci ildönümünün qeyd olunması istiqamətində təhsil müəssisələrində
"Açıq dərs”lərin keçirilməsi davam etdirilir. Qazax Rayon Heydər
Əliyev Mərkəzinin Tədbirlər Planına əsasən "Açıq dərs”lərin təşkil olunmasında əsas
məqsəd işğaldan azad olunmuş bölgələrin
tarixi və coğrafiyası, flora və faunası, adət-ənənələri, şifahi xalq
yaradıcılığı, tanınmış şəxsiyyətləri və s. barədə məktəblilərə ətraflı məlumat
çatdırmaqdır. Layihə çərçivəsində oktyabrın 12-də Qazax şəhər Namiq Vəliyev adına 5 nömrəli tam orta
məktəbin VIII sinif şagirdlərinə "30 illik həsrəti sona çatan Xarıbülbül” adlı "Açıq dərs” keçirilib.
Tədbiri Mərkəzin Baş fond mühafizi Səidə Qocayeva
açaraq bildirib ki, otuz illik həsrətdən sonra ölkəmiz doğma torpaqlarına, eyni
zamanda misilsiz sərvətinə qovuşa bildi. Azərbaycanın ayrılmaz tərkib hissəsi
olan Qarabağ torpağı ölkəmizin ən zəngin torpağı hesab olunur. Özünün flora və
fauna müxtəlifliyinə görə respublikamızın zəngin ərazilərindən sayılan Qarabağ ərazisində
2000-dən çox bitki növünə rast gəlinir. Onlardan biri də Qarabağda, xüsusilə də
Şuşada bitən, qalib Azərbaycanın əsas simvoluna çevrilən Xarıbülbül gülüdür.
Xarıbülbül Azərbaycan Respublikasının Qırmızı Kitabına daxil edilmiş nadir növlərdən
olan bir çiçəkdir. Qeyri-adi çiçək olan Xarıbülbülə bu adın verilməsinin səbəbi
onun bülbülə bənzəməsidir. Xarıbülbül gülü ilə bağlı çoxlu əfsanələr və rəvayətlər
mövcuddur. Gülün üzərinə qonmuş bülbülü xatırladan Xarıbülbül təbiətə verdiyi
gözəlliyi ilə yanaşı, həm də müalicə əhəmiyyətli bitkidir. Otuz il ərzində düşmən
əsarətində qalan torpaqlarımız kimi Xarıbülbül də bu gün azaddır. 44 günlük İkinci
Qarabağ müharibəsinin simvolu sayılan Xarıbülbül bu gün Azərbaycanın qələbə rəmzinə
çevrilib. Müzəffər Ali Baş Komandan İlham Əliyevin rəhbərliyi altında şanlı Azərbaycan
Ordusunun əldə etdiyi Qələbə nəticəsində illərlə həsrətini çəkdiyimiz
torpaqlara nəhayət ki, qovuşduq və illər sonra Xarıbülbül gülü o torpaqlarda yenidən
çiçəklənməyə başlayır. Tədbirdə Prezident İlham Əliyevin rəhbərliyi
altında tarix yazan Azərbaycan Ordusunun 44 günlük Vətən müharibəsində şanlı Qələbəsinə
həsr olunmuş film də nümayiş olunub. Sonra məktəblilər rayon rəhbərliyi tərəfindən
44 günlük Vətən müharibəsi şəhidlərinin xatirəsinə yaradılmış Abidə Kompleksini
ziyarət edib, kompleks önünə qərənfillər düzərək igid Vətən oğullarına olan
ehtiramlarını bildiriblər. Şəhidlərimiz, onların keçdikləri döyüş yolu, təltif
olunduqları orden və medallar haqqında ətraflı məlumatı özündə əks etdirən lövhələrlə
tanış olublar.
GOYEZEN.AZ
Facebook-da paylaş