Qazax Rayon İcra Hakimiyyəti, Rayon Heydər Əliyev Mərkəzi və Rayon Təhsil şöbəsinin birgə təşkilatçılığı ilə "Heydər Əliyev məktəbi” adlı noyabr-dekabr aylarını əhatə edən layihə çərçivəsində təşkil olunan "Açıq dərs” bu gün də davam etdirilib. Heydər Əliyev Mərkəzində yuxarı sinif şagirdlərinin iştirakı ilə keçirilən "Açıq dərs”lər bir məqsədə xidmət edir ki, o da xalqımızın böyük oğlu Ulu Öndər Heydər Əliyevin həyat və siyasi fəaliyyətini təbliğ etmək, gələcək nəsillərə çatdırmaqdır. 

Bugünkü "Açıq dərs” isə Saqif Nəsirov adına Ürkməzli kənd tam orta məktəbin yuxarı sinif şagirdlərinin iştirakı ilə keçirilib. "Azərbaycan Heydər Əliyevin şah əsəridir” adlı mühazirəni məktəbin tarix müəllimi Zakir Qurbanov oxuyub. Z.Qurbanov bildirib ki, həmişə memar olmaq arzusunda olmuş Heydər Əliyev əslində arzusunu həyata keçirdi. O, siyasi memar kimi Azərbaycan adlı şah əsərini yaratdı. Və bu yolda öz canını, sağlamlığını belə qurban verdi. Bu gün hər bir azərbaycanlı müstəqil, sabit ölkənin vətəndaşı olduqları üçün Heydər Əliyevə nə qədər təşəkkür etsələr azdır.

Mühazirədən sonra məktəblilər arasında mövzuya uyğun sual-cavab aparılıb və onlar bu sual-cavabda çox aktiv iştirak ediblər. Hətta, şagirdlərdən Leyla Əliyeva, Nəcəf Qurbanov, Vüsal Əliyev, Şəfa Rzazadə və Aysel Vələdova Heydər Əliyevə həsr olunmuş şeirlər də söyləyiblər.

Dərsdən sonra mühazirədə əhatə olunmuş dövrün xronologiyasını özündə əks etdirən film nümayiş etdirilib. Dərs muzeyin ekskursiyası ilə yekunlaşıb.

GOYEZEN.AZ