Yeni Azərbaycan Partiyası Qazax Rayon Təşkilatının, Qazax Rayon Gənclər və İdman İdarəsinin, "Qazax Gənclər Evi” sosial xidmət müəssisəsinin və Qazax Olimpiya İdman Kompleksinin birgə təşkilatçılığı ilə Ulu Öndər Heydər Əliyevin anadan olmasının 99-cu ildönümünə həsr olunmuş həvəskarlar arasında mini futbol turniri keçirilib.

28 aprel-6 may tarixlərində Qazax Olimpiya İdman Kompleksində baş tutan turnirdə 12 həvəskar komanda iştirak edib. Finala iki komanda - "Avromed” və "Əsədoğlu” komandaları qatılıb.

Mayın 6-da komandaların final görüşü keçirilib. Tədbirin əvvəlində Azərbaycanın Dövlət Himni səsləndirilib, Ulu Öndər Heydər Əliyevin və ərazi bütövlüyümüz uğrunda canlarından keçən şəhidlərin əziz xatirəsi bir dəqiqəlik sükutla yad edilib.

Gərgin idman mübarizəsi şəraitində keçən turnirdə "Avromed” komandası 4:3 hesabı ilə "Əsədoğlu” komanasına qalib gəlib.

Qazax Rayon İcra Hakimiyyətinin başçısı Rəcəb Babaşov qaliblərin mükafatlandırılması mərasimində iştirak edərək hər iki komandanı təbrik edib, səmimi ürək sözlərini çatdırıb. İcra başçısı Ümummilli Lider Heydər Əliyevin bütün sahələrlə yanaşı, idmanın inkişafına da böyük diqqət yetirdiyini bildirib. Hazırda ölkəmizdə Prezident İlham Əliyev, Birinci vitse-prezident Mehriban Əliyeva tərəfindən bu sahənin inkişafına göstərilən yüksək dövlət qayğısından danışıb. Azərbaycan xalqının Ümummilli Lideri Heydər Əliyevin anadan olmasının 99-cu ildönümünə həsr olunmuş turnirin əhəmiyyətindən söz açan icra başçısı təşkilatçılara, əziyyəti keçən insanlara və turnirə qatılan iştirakçılara razılığını bildirib.

Yeni Azərbaycan Partiyası Qazax Rayon Təşkilatının sədri Anar Nəbiyev qalib komandanları təbrik edib, turnirin keçirilməsində əsas məqsədin Ulu Öndərin xatirəsini yad etmək, eyni zamanda, gənclərin fiziki sağlamlığını inkişaf etdirmək və idmana olan marağını artırmaq olduğunu qeyd edib.

Sonda qalib komandaya kubok, eləcə də bütün komanda üzvlərinə hər dörd təşkilatın adından Fəxri Fərman təqdim olunub.

GOYEZEN.AZ