İcra başçısı Aprel şəhidi Orxan Əliyevin məzarını ziyarət edib
Öz qələbəsi, əks-sədası ilə Azərbaycanın hərb tarixinə
"dördgünlük müharibə” və ya "Aprel döyüşləri” kimi düşmüş tarixi Qələbəmizdən artıq
6 il arxada qalır. Azərbaycan Ordusunun, hərb tariximizin şanlı qələbələrindən olan, bizim qalibiyyətimiz, zəfər salnaməmiz olan 2016-cı ilin Aprel döyüşlərini xalqımız bu gün də qürur hissi ilə xatırlayır, yada salır. Çünki Aprel
döyüşləri Azərbaycan xalqının və Ordusunun tarixi ərazilərimiz olan Qarabağın və
ətraf rayonların işğaldan azad edilməsi üçün hər cür fədakarlığa və hərbi qüdrətə
hazır olduğunu düşmənlə yanaşı, bütün dünyaya nümayiş etdirdi. Azərbaycan
Respublikasının Prezidenti, Silahlı Qüvvələrin Müzəffər Ali Baş Komandanı İlham
Əliyevin Azərbaycan Ordusunun Aprel qələbələrinin ildönümü ilə əlaqədar bir
qrup hərbçimizlə görüşündə dediyi kimi: "Aprel döyüşləri bizim şanlı hərbi qələbəmizdir,
dövlətimizin, xalqımızın, ordumuzun gücünü göstərən qələbədir. Aprel döyüşləri
nəticəsində Füzuli, Cəbrayıl və Ağdərə rayonlarının işğaldan azad edilmiş ərazilərində
bu gün Azərbaycan bayrağı dalğalanır. Bu döyüşlər onu göstərir ki, Azərbaycan
xalqı və dövləti heç vaxt işğalla barışmayacaq, öz ərazi bütövlüyünü nəyin
bahasına olursa-olsun bərpa edəcəkdir”. Bəli, Ali Baş Komandanımızın da dediyi kimi oldu. Aprel döyüşləri Azərbaycanın hərb salnaməsinə qızıl hərflərlə yazılan 44 günlük Vətən müharibəsində Böyük Qələbəyə gedən yolda mühüm əhəmiyyət daşıdı. Bu qələbə sayəsində "Böyük Qayıdış” prosesinə start verildi. Lələtəpə yüksəkliyinin azad edilməsi nəticəsində Cəbrayıl rayonunun Cocuq Mərcanlı kəndində mülki əhalinin yaşayışı üçün təhlükə tamamilə aradan qaldırıldı. 6 il əvvəl bu döyüşlərdə düşmən üzərində qazanılan hərbi uğurlar Azərbaycan Ordusunun və xalqının Böyük Qələbəyə inamını və əzmini daha da artırmaqla yanaşı, Ordumuzun şəxsi heyəti üçün mühüm sınaq və döyüş təcrübəsi oldu. Məhz bu təcrübəni İkinci Qarabağ müharibəsində uğurla tətbiq edən rəşadətli Azərbaycan Ordusu düşmənə qəti zərbə vuraraq torpaqlarımızı işğaldan azad etdi. Bu gün hər bir azərbaycanlı 6 il əvvəl Lələtəpədə ucaldılan üçrəngli bayrağımızın artıq işğaldan azad edilən Şuşada və digər ərazilərimizdə dalğalanmasından sonsuz qürur duymaqdadır. Bu qüruru isə bizlərə Müzəffər Ali Baş Komandan və Rəşadətli Azərbaycan Ordusunun əsgər və zabitləri, hərbçilərimiz, sağlamlığını itirən qazilərimiz, torpaqlarımız uğrunda canından keçən igid Vətən oğulları yaşatdı. Aprel döyüşlərində qələbə qazanmaqla yanaşı, biz şəhidlər də verdik. Həmin döyüşlər zamanı Qazaxın üç mərd, igid oğlu - Fərəhli
kəndindən kapitan Orucov Mühüd Qurban oğlu, Yuxarı Salahlı kəndindən baş
leytenant Namazov Elvin Məmməd oğlu və Aslanbəyli kəndindən əsgər Əliyev Orxan
Məhəmməd oğlu Şəhidlik zirvəsinə ucaldı. Bu gün igid oğullarımızın yoxluğundan bizləri 6 il ayırsa da, onlar bizim qəlbimizdə əbədi yaşayırlar. Şəhidlik zirvəsinə ucalıb adını tarixə yazdıran,
ölümsüzlüyü ilə əbədiyyətə qovuşan şəhidimiz Əliyev Orxan Məhəmməd oğlunun xatirəsi də hər zaman əziz tutulur. Rayon rəhbərliyi şəhidimizin doğum və anım
günlərində məzarını ziyarət edir, ailəsinə baş çəkir. Aprelin 8-də Qazax Rayon İcra Hakimiyyətinin başçısı Rəcəb Babaşov Orxan Əliyevin şəhadətinin 6-cı ildönümü münasibətilə şəhidimizin doğulub boya-başa çatdığı Aslanbəyli kəndində olub. Qazax Rayon İcra
Hakimiyyəti başçısının müavini-İctimai-siyasi və humanitar məsələlər şöbəsinin
müdiri Gulaya Həsənova, həmin şöbənin baş məsləhətçisi Gülnar Quluyeva, RİH başçısı aparatında Vətən müharibəsi iştirakçıları və şəhid ailələri ilə işin təşkili şöbəsinin müdiri, qazi kapitan Samir Çobanov, həmin şöbənin böyük məsləhətçisi Məhəmməd Xəlilli, Yeni Azərbaycan Partiyası Qazax Rayon Təşkilatının sədri Anar Nəbiyev və şəhidimizin ailə üzvləri ilə birlikdə məzarını ziyarət edib, məzarı üstünə tər qərənfillər düzərək şəhidimizin əziz xatirəsini dərin ehtiramla anıb. Şəhidimizin məzarı önündə ruhuna
dua oxunub. İcra başçısı Rəcəb Babaşov şəhidin məzarı önündə bildirib ki, bu gün Aprel döyüşlərindən 6 il ötsə də xalqımız nə o şanlı tarixi, nə də torpaq uğrunda canından keçən şəhidlərimizi unudur. İldən-ilə şəhidlərimizə olan hörmət və ehtiramımız daha da artır. Aprel döyüşləri zamanı erməni işğalçılarının cəbhədə törətdiyi təxribatlara Azərbaycan Ordusunun verdiyi layiqli cavabdan, hərbçilərimizin döyüş meydanında göstərdiyi şücaətdən danışan rayon rəhbəri Aprel döyüşlərinin dünya ictimaiyyətinə öz ordusu haqqında yalanlar, miflər uyduran Ermənistanın təbliğatını alt-üst etdiyini bir daha dilə gətirib. Rayon rəhbəri qeyd edib ki, Aprel döyüşlərində Ordumuzun qüdrəti qarşısında vahiməyə düşən düşmən Azərbaycan əsgərinin gücünü bir daha gördü, xalqımızın işğal olunmuş torpaqlarının bir qarışı olsa belə heç zaman güzəştə getməyəcəyini və öz ərazi bütövlüyünü təmin edəcəyini anladı. Şanlı Azərbaycan Ordusu Silahlı Qüvvələrin Müzəffər Ali Baş Komandanı İlham Əliyevin rəhbərliyi altında qazandığı tarixi Qələbə ilə bunu bir daha sübut etdi. "Qarabağ Azərbaycandır!” - deyərək döyüşə atılan igid Vətən oğulları torpaqlarımızı düşməndən azad etməklə, həmin torpaqlarda üçrəngli Azərbaycan Bayrağını dalğalandırdı. 6 il əvvəl Lələtəpədə dalğalanan bayraq artıq işğaldan azad edilmiş bütün torpaqlarımızda ən uca zirvəyə sancılıb. Qazax rayonunda gənclər arasında vətənpərvərlik
hissinin hər zaman yüksək səviyyədə olduğunu qeyd edən rayon rəhbəri bildirib
ki, bu gün qazaxlılar 7 Milli Qəhrəmanı, Aprel şəhidləri, İyul döyüşlərinin
qəhrəmanları, Vətən müharibəsi şəhidləri, eləcə də bütün şəhidləri ilə qürur duyur,
fəxr edir. Rayon rəhbəri bu gün Aprel şəhidləri kimi adlarını qürurla
səsləndirdiyimiz Mühüd Orucovun, Elvin Namazovun və Orxan Əliyevin təkcə
Qazaxın deyil, eyni zamanda, bütün Azərbaycanın fəxri olduqlarını qeyd edib. Şəhidimizin atası Məhəmməd Əliyev şəhidlərə, şəhid ailələrinə, qazilərə göstərdiyi diqqət və qayğıya görə Prezident İlham Əliyevə, Birinci vitse-prezident Mehriban Əliyevaya ailəsi adından dərin minnətdarlığını bildirib. Rayon İcra Hakimiyyətinin başçısı Rəcəb Babaşova təşəkkürünü çatdırıb. "Bu gün övladım Orxanın, eləcə də bütün şəhidlərimizin ruhu şaddır. Şəhidlərimizin qisası alınıb, torpaqlarımız azad edilib və o torpaqlarda üçrəngli bayrağımız dalğalanır. Buna görə Ali Baş Komandana və Azərbaycan Ordusuna minnətdarıq”, - deyən şəhid atası bütün şəhidlərimizə Allahdan rəhmət diləyib, qazilərimizə cansağlığı arzulayıb. Qeyd edək ki, Əliyev Orxan Məhəmməd
oğlu 11 avqust 1995-ci ildə Qazax rayonunun Aslanbəyli kəndində
anadan olmuşdur. 2011-ci ildə Bakıda Texniki Kollecinə
"Avtomobil nəqliyyatı” şöbəsinin "Yol hərəkətinin təşkili”
ixtisası üzrə daxil olmuş, 2015-ci ildə həmin kolleci öz ixtisası üzrə
bitirmişdir. Kolleci bitirdikdən sonra hərbi xidmətə getmişdir. Əliyev
Orxan Məhəmməd oğlu 2 aprel 2016-cı ildə Tərtər istiqamətində gedən döyüşlərdə
şəhid olmuşdur. Orxan Əliyev ölümündən sonra göstərdiyi qəhrəmanlığa görə Respublika Prezidenti İlham Əliyevin 19 aprel 2016-cı il tarixli Sərəncamı ilə "Hərbi xidmətdə fərqlənməyə görə" III
dərəcəli medalı ilə
təltif olunmuşdur. Qazax şəhərinin
mərkəzində xatirəsini əbədiləşdirən bulaq tikilmişdir. Azərbaycan Respublikasının Prezidenti yanında
Qeyri-Hökumət Təşkilatlarına Dövlət Dəstəyi Şurasının maliyyə yardımı və
"Öyrədərək Öyrənirik" Gənclərin İntellektual İnkişafına Dəstək
İctimai Birliyinin təşkilatçılığı ilə icra olunan "Vətən üçün hazır
ol!" layihəsi çərçivəsində çəkilmiş "Qarabağa doğru" sənədli
filmi baş leytenant Elvin Namazov, kapitan Mühüd Orucov və əsgər Orxan Əliyevin
əziz xatirəsinə həsr olunmuşdur. Tanınmış şairə, publisist Fəridə Ləman
tərəfindən şəhidin xatirəsinə həsr olunmuş "Cənnətdən məktublar” adlı
kitab yazılmışdır. GOYEZEN.AZ
Facebook-da paylaş