Qazaxda təhsil işçiləri ilə geniş tərkibdə müşavirə keçirilib
Fevralın 3-də Pandemiya qaydalarına uyğun olaraq Qazax Rayon Təhsil Şöbəsinin tabeliyində
fəaliyyət göstərən ümumtəhsil müəssisələrinin rəhbərləri ilə geniş tərkibdə
müşavirə keçirilib. Qazax Rayon
İcra Hakimiyyətinin başçısı Rəcəb Babaşovun, icra aparatının məsul işçilərinin,Rayon
Prokuroru Rauf Gözəlovun, Rayon Polis Şöbəsinin rəisi Sənan
Əsədovun, Azərbaycan
Respublikası Səfərbərlik və Hərbi Xidmətə Çağırış üzrə Dövlət Xidməti Qazax
Rayon Şöbəsinin rəisi Tural Məmmədovun, Təhsil Nazirliyi 6 saylı Ərazi
Maliyyə Hesablaşma Mərkəzinin rəisi Emin Əliyevin, Rayon Təhsil
Şöbəsinin müdiri Nizaməddin Babanlının, Təhsil Şöbəsi əməkdaşlarının, Bakı Dövlət Universitetinin
Qazax filialının, Qazax Dövlət Sosial-İqtisadi Kollecinin rəhbərlərinin,
əməkdaşlarının, məktəb direktorlarının, direktor müavinlərinin, sinif
rəhbərlərinin iştirakı ilə keçirilən müşavirədə ötən gün şəhər Səməd Vurğun
adına 2 nömrəli tam orta məktəbdə məktəblilər arasında baş vermiş bıçaqlanma
hadisəsi müzakirə olunub, rayonun, eləcə də Qazax təhsilinin adına yaraşmayan, xoşagəlməz
hal kimi qiymətləndirilib. Müşavirəni
giriş sözü ilə açan Qazax
Rayon İcra Hakimiyyətinin başçısı Rəcəb Babaşov tədbirin məqsəd və əhəmiyyətindən danışıb.
Ölkəmizdə təhsilin inkişafına böyük qayğı göstərildiyini qeyd edən icra başçısı
ölkə Prezidenti İlham Əliyev tərəfindən Azərbaycan təhsilində sistemli
islahatlar aparıldığını, Ulu Öndərin təhsil siyasətinin uğurla davam
etdirildiyini söyləyib. Rayon rəhbəri dövlət başçısı tərəfindən ölkəmizdə təhsil sahəsinə
göstərilən diqqət və qayğı sayəsində həyata keçirilən məqsədyönlü tədbirlərin,
Birinci vitse-prezident, Heydər Əliyev Fondunun prezidenti Mehriban Əliyevanın
təşəbbüsü ilə Fondun reallaşdırdığı "Yeniləşən Azərbaycana yeni məktəb”
layihəsinin Qazaxda da uğurla icra olunduğunu bildirib. "Azərbaycan Respublikası regionlarının 2019–2023-cü illərdə
sosial-iqtisadi inkişafı Dövlət Proqramı”nın həyata keçirilməsi üzrə
hazırlanmış tədbirlər planına Qazax rayonu üzrə 11 məktəb binasının əsaslı
təmirinin və ya tikintisinin salınmasını bunun əyani sübutu kimi göstərib. İcra başçısı qeyd edib ki, son illər Heydər Əliyev Fondu tərəfindən
rayonda Xalq yazıçısı İsmayıl Şıxlının adını daşıyan 1176 şagird
yerlik Kosalar kənd tam orta məktəbin əsaslı şəkildə yenidən qurulması, yenə
də Fond tərəfindən Şahnabad Nəsibova adına Sarıvəlli kənd tam orta məktəb üçün
220 şagird yerlik yeni binanın inşa olunması, Təhsil Nazirliyi tərəfindən Qazax şəhər Səməd Vurğun adına 2 nömərli
tam orta məktəbin əsaslı şəkildə yenidən qurulması,
Aydın Məmmədov adına Qaymaqlı kənd tam orta məktəb üçün 180 şagird yerlik yeni binanın tikilməsi gələcəyimiz olan uşaqlara
göstərilən dövlət qayğısıdır. Ölkə Prezidenti tərəfindən Mehdi
Hüseyn adına humanitar və təbiət fənləri üzrə məktəb-lisey binasının sökülərək
yenidən tikilməsi haqqında imzalanan 4 avqust 2020-ci il tarixli Sərəncama əsasən
bu gün yeni məktəbin inşasına başlanılması, ADA Universitetinin "Bir müəllimin manifesti” təşəbbüsü çərçivəsində
tariximizin incisi olan Qazax Müəllimlər Seminariyasının binasını bərpa etməsi Qazaxda təhsil sahəsinə olan qayğının bundan sonra da uğurla
davam etdirilməsi deməkdir. Rayon rəhbəri bütün bu işlərə və Qazaxın timsalında bölgələrimizdə təhsil sahəsinə göstərilən
dövlət qayğısına görə rayon ictimaiyyəti, ziyalılar, təhsil işçiləri adından
ölkə başçısına və Birinci vitse-prezidentə minnətdarlığını bildirib. İcra başçısı qeyd edib ki, təhsil sahəsinə göstərilən dövlət
qayğısının müqabilində məktəblərdə bu cür halların baş verməsi xoşagəlməz və
yolverilməz bir haldır. Məktəb rəhbərliyinin məsuliyyətsizliyi, səhlənkarlığı səbəbindən
bu cür halların baş verməsi birmənalı olaraq yaxşı hal kimi qarşılanmır. Baş vermiş
hadisə ilə bağlı fikirlərini bölüşən icra başçısı məktəb rəhbərliyinə,
kollektivə iradlarını bildirib. Müəllim-şagird, müəllim-valideyn münasibətlərinin
qurulmasında, məktəbdaxili nizam-intizamın təmin olunmasında, şagirdlərin dərsə
davamiyyətində, yüksək təhsil göstəricilərinin əldə edilməsində hər bir məktəb
işçisinin üzərinə böyük məsuliyyət düşdüyünü vurğulayıb. Məktəblilərin təlim-tərbiyəsində
valideynlərlə yanaşı, məktəbdə müəllimlərin də məsuliyyət daşıdığını, bunun
üçün valideynlərlə övladları barədə mütəmadi olaraq söhbətlərin aparılmasının
vacibliyini diqqətə çatdırıb. İcra başçısı deyilən iradlardan, verilən tövsiyələrdən
hər bir məktəb rəhbərliyinin nəticə çıxarmasını, bundan sonra hər hansı xoşagəlməz
hadisənin baş verməməsi üçün üzərilərinə düşən işin məsuliyyətini dərk etmələrini
qeyd edib. İcra
başçısı bildirib ki, bu gün dövlətin, ölkə başçısının diqqət və qayğısını hiss
ediriksə, bizim də üzərimizə bir məsuliyyət düşür ki, rayonda təhsilin keyfiyyətini
artırmaq, ən əsası da təhsil işçilərinə olan etimadı doğruldaraq gördüyümüz işlərlə
öz töhfəmizi verməkdir.
Rayon Prokuroru Rauf Gözəlov, Rayon Polis Şöbəsinin
rəisi Sənan Əsədov, Qazax RİH
başçısının müavini-İctimai-siyasi və humanitar məsələlər şöbəsinin müdiri
Gulaya Həsənova, təqaüddə olan müəllim Qasım Əliyev çıxış edərək baş
vermiş hadisə ilə bağlı fikirlərini bölüşüblər. 2 nömrəli məktəbdə baş verən
hadisənin digər məktəblər üçün də həyəcan siqnalı olduğunu söyləyiblər. Bir
hadisənin baş verməməsi üçün öncədən lazımi tədbirlərin görülməsinin, məktəblilərə
nəzarətin gücləndirilməsinin, məktəblilərlə qayğıları, onları narahat edən hər
hansı bir məsələ ilə bağlı mütəmadi olaraq fərdi söhbətlərin aparılmasının, ən
kiçik məsələyə belə ciddi şəkildə həssaslıqla yanaşılmasının vacibliyini diqqətə
çatdırıblar. Xüsusilə də məktəblilərin sosial şəbəkələrdən hansı məqsədlər üçün
istifadəsinə, ətraflarında olan, ünsiyyət qurduqları insanlara nəzarətin gücləndirilməsinə,
müəllim-şagird, müəllim-valideyn münasibətlərinin tənzimlənməsinə daha məsuliyyətlə
yanaşmalarını tövsiyə ediblər. Qazax Rayon Təhsil Şöbəsinin müdiri Nizaməddin Babanlı çıxış edərək təhsil sahəsinə
göstərilən diqqət və qayğıya görə ölkə başçısı İlham Əliyevə, Birinci
vitse-prezident Mehriban Əliyevaya, Təhsil naziri Emin Əmrullayevə, eləcə də
rayon rəhbəriyinə bütün təhsil işçiləri adından minnətdarlığını çatdırıb. Ötən
gün sözügedən məktəbdə baş vermiş hadisənin xoşagəlməz hal olduğunu bildirən
N.Babanlı rayon rəhbərinin söylədiyi iradların haqlı və yerində deyilən iradlar
olduğunu qeyd edib. Səslənən fikirlərdən, bildirilən iradlardan, verilən
tapşırıq və tövsiyələrdən hər bir məktəb direktorunun nəticə çıxarmalarını, üzərilərinə
düşən məsuliyyəti dərk edərək deyilənlərə ciddi əməl etmələrini söyləyib.
GOYEZEN.AZ
Facebook-da paylaş