İcra başçısı Vətən müharibəsi şəhidi Elşən Orucovun 30 yaşını ailəsi ilə birlikdə məzarı başında qeyd edib
Azərbaycan Respublikasının Prezidenti, Silahlı Qüvvələrin
Müzəffər Ali Baş Komandanı İlham Əliyevin rəhbərliyi altında şanlı ordumuzun
şücaəti sayəsində 2020-ci ilin 27 sentyabrında başlayan 44 günlük Vətən müharibəsi
Azərbaycan xalqına zəfər sevincini bəxş etməklə yanaşı, xalqımızın qəhrəman
oğullarını da bir daha öz xalqına tanıtdı. Neçə-neçə igid oğullar Vətən uğrunda
haqq savaşının iştirakçısı, şəhid və ya qazi oldular. Sonunda zəfər çaldığımız
44 günlük müharibə Azərbaycan xalqının Vətənə necə bağlılığını, onun üçün
gözünü qırpmadan canından keçməyə hazır olduğunu bir daha nümayiş etdirdi. Azərbaycan
torpaqlarının hər qarışının azad edilməsi uğrunda gedən döyüşlər, qüdrətli
ordumuzun şanlı tarix yazaraq düşmən üzərindəki sarsıdıcı zərbələri, eləcə də
işğal altında olan şəhərlərimizin, yaşayış məntəqələrimizin, həmçinin müxtəlif
istiqamətlərdə strateji yüksəkliklərin işğalçılardan azad edilməsi xalqımızda
böyük inam və ruh yüksəkliyi yaratdı. Əldə etdiyimiz şanlı Qələbə həm də tarixi
ədalətin bərpası oldu. Rəşadətli Azərbaycan Ordusunun əsgər və zabitləri, hərbçiləri
döyüş meydanında göstərdikləri şücaətlə düşmənə layiqli yerini göstərməklə
yanaşı, dövlətimizin və ordumuzun gücünü, qüdrətini də bütün dünyaya göstərdilər. Şəhid (MAHHXHQ) əsgər Orucov Elşən Ehtiram oğlu da döyüş meydanında qəhrəmanlıq göstərərək
Şəhidlik adlı uca zirvəyə yüksələn igid oğullarımızdandır. Bu gün yaşasaydı 30 yaşını qeyd edəcəkdi
Qazaxın igid oğlu. Döyüş meydanında göstərdiyi igidliyə görə ölümündən sonra
ölkə Prezidenti İlham Əliyevin müvafiq Sərəncamlarına əsasən "Vətən uğrunda”, "Cəbrayılın azad olunmasına görə”, "Şuşanın azad
olunmasına görə”, "Füzulinin
azad olunmasına görə” medalları ilə təltif olunmuş igid Vətən oğlunun doğum gününü bu gün təkcə
ailəsi deyil, yaxınları, doğmaları, şəhidimizə ehtiram göstərən hər kəs qeyd
edir. Respublika
Prezidenti İlham Əliyevin və Birinci vitse-prezident Mehriban Əliyevanın
şəhidlərimizə, şəhid ailələrinə, Qarabağ müharibəsi əlillərinə, onların
ailələrinə göstərdikləri dövlət qayğısını hər zaman əldə rəhbər tutan Qazax
Rayon İcra Hakimiyyətinin başçısı Rəcəb Babaşov əlamətdar
günlərdə, şəhidlərimizin doğum və anım günlərində onların ailələrini,
məzarlarını ziyarət edir, onların əziz xatirələrini ehtiramla anır. Ənənəsinə sadiq qalan rayon rəhbəri bu gün Vətən
müharibəsi şəhidi Elşən
Orucovun cənnətdəki
ilk doğum gününü ailəsi ilə birlikdə məzarı başında qeyd edib. Qazax Rayon İcra Hakimiyyəti başçısı aparatında İctimai-siyasi
və humanitar məsələlər şöbəsinin baş məsləhətçisi Gülnar Quluyeva, Vətən müharibəsi iştirakçıları və
şəhid ailələri ilə işin təşkili şöbəsinin
müdiri qazi kapitan Samir Çobanov, həmin şöbənin böyük
məsləhətçisi Məhəmməd Xəlilli, Baş mütəxəssis-komendant Leyla Muradova, Milli Məclisin
deputatı Ülviyyə Ağayevanın köməkçisi Arzu Musayeva, Azərbaycan
Qarabağ Müharibəsi Əlilləri, Veteranları və Şəhid Ailələri İctimai Birliyinin
Qazax rayon filialının sədri Xasay Balayev, sədr
müavini, I qrup Qarabağ müharibəsi əlili Namiq Alıyev, şəhidimizin ailə üzvləri, vaxtilə təhsil aldığı Ş.Şahvələdov
adına Xanlıqlar kənd tam orta məktəbin direktor əvəzi Şükufə Məhərrəmova, sinif
rəhbəri Şayəstə Qurbanova ilə birlikdə
şəhidimizin dəfn olunduğu Xanlıqlar kənd qəbiristanlığında məzarını ziyarət
edərək tər qərənfillər düzüb, igid Vətən oğlunun əziz xatirəsini dərin
ehtiramla anıb. İgid Vətən
oğlunun ruhuna dua oxunduqdan sonra rayon rəhbəri və qonaqlar şəhidimizin
evində olub, torpaq uğrunda canından keçən şəhidimizə Allahdan rəhmət, ailəsinə
səbir diləyiblər.
Ölkə
Prezidenti, Ali Baş Komandan İlham Əliyevin rəhbərliyi altında qüdrətli
Azərbaycan Ordusunun 44 günlük Vətən müharibəsində qazandığı şanlı Qələbədən
danışan rayon rəhbəri həmin zəfərdə payı olan Elşən kimi qəhrəman oğullarımızla
bu gün hər birimizin fəxr etdiyini bildirib. 44 günlük savaşda əldə etdiyimiz
tarixi Zəfərin müəllifi olan Ali Baş Komandana, şanlı Azərbaycan Ordusuna,
şəhidlərimizə, qazilərimizə borclu və minnətdar olduğumuzu, onlarla qürur
duyduğumuzu qeyd edib. Rayon rəhbəri Şəhidlik zirvəsinə ucalan Elşən tək
oğullarımızla tək bu gün deyil, illər ötsə belə gələcək nəsillərin qürur
duyacağını vurğulayıb. "Ölkə
Prezidenti cənab İlham Əliyevin, Birinci vitse-prezident Mehriban Əliyevanın
şəhidlərimizə, şəhid ailələrinə, qazilərimizə göstərdiyi diqqət və qayğı hər
birimiz üçün örnək olmalıdır”, - deyən icra başçısı şəhidimizin doğum günündə
bugünkü ziyarətin kökündə də məhz həmin dövlət qayğısının dayandığını qeyd
edib. Nə qədər dünya var, Azərbaycan xalqı var şəhidlərimizin daim yad
olunacağını, onların qəlblərdə əbədi yaşayacağını söyləyib.
Milli Məclisin deputatı Ülviyyə
Ağayevanın köməkçisi Arzu Musayeva millət vəkilinin səmimi ürək sözlərini çatdırıb, şəhidimizin əziz xatirəsini
dərin ehtiramla yad edib. Ölkə Prezidenti cənab İlham Əliyevin, Birinci
vitse-prezident Mehriban Əliyevanın şəhidlərimizə, şəhid ailələrinə, qazilərimizə
göstərdiyi diqqət və qayğının hər birimiz üçün örnək olduğunu bildirib. Bizlərə
böyük tarixi Qələbəni bəxş edən bütün şəhidlərimizin xatirəsinin hər zaman əziz
tutulacağını, onların daim qəlblərdə əbədi yaşayacaqlarını dilə gətirib. Şəhidimizin
doğum günündə bugünkü ziyarətin də həmin diqqət və qayğının davamı olduğunu
qeyd edib. Şəhidimizin
məktəb illərindən söhbət açan sinif
rəhbəri Şayəstə Qurbanova şagirdi olmuş Elşən
Orucovla qürur duyduğunu bildirib. Qəhrəman şəhidimiz haqqında xatirələrini bölüşən
Şayəstə müəllimə qeyd edir ki: - Elşən məktəbdə
tərbiyəsi, əxlaqı, öz səliqə-sahmanı ilə seçilən bir şagird olub. Məktəbdə təşkil
olunan ictimai tədbirlərdə hər zaman fəallığı ilə seçilər, öndə olardı. Bu gün
Elşən bizim aramızda olmasa da onun əziz xatirəsi daim bizim qəlbimizdə əbədi
yaşayır. Sinif rəhbəri kimi belə igid bir şagirdim olduğu üçün fəxr edirəm və
bu gün dərs dediyim şagirdlərimə də Elşənin qəhrəmanlığını qürurla çatdırıram.
Tək Elşənin deyil, kəndimizin, eləcə də rayonumuzun bütün şəhidləri haqqında,
onların döyüş meydanında göstərdikləri şücaəti gələcək nəsillərə çatdırmaq bir
müəllim kimi, eyni zamanda bir vətəndaş olaraq borcumdur. Bundan sonra da
çalışacağıq ki, şəhidlərimizi gələcək nəsillərə tanıtdıraq. Şəhid anası Dürdanə Orucova hər zaman onlara göstərilən diqqət və qayğıya görə şəhid ailəsi
kimi razılığını ifadə edib, ölkə Prezidenti İlham Əliyevə, Birinci
vitse-prezident Mehriban Əliyevaya, rayon rəhbərliyinə minnətdarlığını
bildirib. Övladının doğum günündə onun xatirəsinin yad olunmasını Elşənin timsalında
bütün şəhidlərimizə olan hörmət və ehtiramın bariz nümunəsi kimi
qiymətləndirib. "Oğlum Elşən hər zaman bizimlədir. O, daim bizim qəlbimizdədir”,
- deyən şəhid anası oğlu və onun kimi igid Vətən oğulları ilə hər zaman fəxr
edəcəyini söyləyib. (MAHHXHQ) əsgər Orucov Elşən
Ehtiram oğlu Şəhid Elşən Orucov 6 avqust 1991-ci ildə Qazax rayonunun
Xanlıqlar kəndində anadan olmuşdur. 1997-ci ildə Qazax rayon Şəmistan Şahvələdov
adına Xanlıqlar kənd tam orta məktəbin 1-ci sinfinə daxil olmuş, 2008-ci ildə həmin
məktəbin 11-ci sinfini bitirmişdir. 2009-cu ildə Azərbaycan
Respublikası Səfərbərlik və Hərbi Xidmətə Çağırış üzrə Dövlət Xidmətinin Qazax
Rayon Şöbəsi tərəfindən Azərbaycan Silahlı Qüvvələrinə həqiqi hərbi xidmətə çağırılmış, 2011-ci
ildə hərbi xidmətdən tərxis
olunmuşdur. 2011-ci ildən Azərbaycan Silahlı Qüvvələrinin "N” saylı hərbi
hissəsində müddətdən artıq həqiqi hərbi xidmət hərbi qulluqçusu (MAHHXHQ)
kimi xidmət etməyə başlamışdır. "N” saylı hərbi hissəsinin
2-ci taborunun tank tağımının baş sürücü mexaniki idi. Elşən Orucov hərb sahəsinə gəldiyi ilk gündən nümunəvi xidmət
göstərmiş, ona görə də xidmətə başladığı vaxtdan iki il keçməmiş (24.06.2013) "Azərbaycan Respublikası Silahlı Qüvvələrinin 95 illiyi (1918-2013)" yubiley medalı ilə
təltif olunmuşdur. 26 iyun 2018-ci ildə isə sinəsinə "Azərbaycan Respublikası Silahlı Qüvvələrinin 100
illiyi (1918-2018)" yubiley medalı taxılmışdır. Bu təltiflərə Elşən Orucov qüsursuz xidməti,
nümunəvi olması və verilən tapşırıqları vaxtlı-vaxtında yerinə yetirməsi sayəsində
layiq görülmüşdür. Elşən Orucov 04.11.2020-ci il tarixdə Füzuli rayonu
istiqamətində torpaqlarımızın azadlığı uğrunda gedən döyüşlərdə qəhrəmancasına
şəhid olmuşdur. 6 noyabr 2020-ci ildə doğulduğu Qazax rayonunun Xanlıqlar kənd
qəbiristanlığında izdihamla dəfn edilmişdir. Ailəliydi. İki azyaşlı - Ehtiram adlı
oğul, Ayla adlı qız övladı yadigar qalıb.
GOYEZEN.AZŞəhidlərimizi tanıyaq və tanıdaq--------------------------------------
İgid
Vətən oğlunun döyüş meydanında göstərdiyi qəhrəmanlıq Ali Baş Komandan İlham
Əliyev tərəfindən də yüksək qiymətləndirildi. Şəhid Elşən Orucov ölümündən
sonra cənab Prezidentin 15 dekabr 2020-ci il tarixli Sərəncamına əsasən "Vətən uğrunda”, 24 dekabr 2020-ci il tarixli Sərəncamına
əsasən "Cəbrayılın azad olunmasına görə”, 24 iyun 2021-ci il
tarixli Sərəncamlarına əsasən "Şuşanın azad
olunmasına görə”, "Füzulinin azad olunmasına görə” medalları ilə
təltif olunmuşdur.
Bu gün
Elşən Orucov kimi qəhrəman oğullarımızla nəinki doğulduğu el-oba, eləcə də
bütöv Azərbaycan fəxr edir, hər bir azərbaycanlı qürur duyur. Şəhidlərimizi yad
etmək, xatirəsini əziz tutmaq hər birimizin vətəndaşlıq borcudur. Bizlər də
Elşən Orucovun timsalında bütün şəhidlərimizi ehtiramla yad edir, ruhu
qarşısında baş əyirik. Ruhun şad, məkanın cənnət olsun igid Vətən oğlu!.
Facebook-da paylaş