"Qara qartal" ləqəbli kiçik gizir Röyal Mədətovun doğum günü ailəsi ilə birlikdə qeyd olunub
Yola
saldığımız 2020-ci il çətin, lakin şərəfli bir il oldu. Bir çox çətinliklər və
problemlərin olmasına baxmayaraq biz 2020-ci ili Qələbə ilə başa vurduq. 44 günlük Vətən müharibəsində Azərbaycan tarix
yazan bir dövlət kimi yaddaşlara yazıldı. 27 sentyabrdan başlayan və Azərbaycanın şanlı tarixinə
10 noyabr – Qələbə Günü kimi qızıl hərflərlə daxil olan böyük Zəfərimiz bütün
dünyaya dövlətimizin və ordumuzun gücünü göstərdi. Bu Qələbəni bizlərə Prezident,
Müzəffər Ali Baş Komandan İlham Əliyevin rəhbərliyi ilə rəşadətli Ordumuz
torpaqlarımızı erməni işğalçılarından azad edərək bəxş etdi. 30 illik həsrətdən
sonra biz qalib ölkənin vətəndaşı olaraq Qarabağa qayıdışın təntənəsini bu gün də
yaşayırıq. Göstərdikləri şücaətlərlə, qəhrəmanlıqlarla
dövlətin, xalqın, yaşadıqları rayonun, kəndin, qəsəbənin, bütün Azərbaycanın
adını ucaldan igid Vətən oğulları ilə bu gün hər birimiz fəxr edir, onlarla
qürur duyuruq. Və bu Qələbəyə, Zəfərə görə Ali Baş Komandana, Azərbaycan
Ordusunun əsgər və zabitlərinə, hərbçilərinə, Vətən uğrunda canından keçən şəhidlərimizə,
sağlamlığını torpaq üçün fəda edən yaralı qazilərimizə minnətdarıq. Vətən
torpaqlarının ərazi bütövlüyünü canı, qanı bahasına qoruyaraq 28 yaşında Şəhidlik
zirvəsinə ucalmış kiçik gizir Mədətov Röyal Şahin oğlu da Vətən müharibəsi
başlayanda ölümün gözünə dik baxaraq torpaqlarımızın azadlığı uğrunda döyüşdü və
yoldaşları ilə birlikdə qəhrəmanlıq dastanı yazdı. Vətən müharibəsində, Qarabağ
adlı haqq savaşında qəhrəmancasına şəhid olan igid Vətən oğlunun yaşasaydı bu gün 29
yaşı tamam olacaqdı. Döyüşdə
göstərdiyi qəhrəmanlığa görə ölkə Prezidenti İlham Əliyev tərəfindən ölümündən
sonra "Vətən uğrunda” və "Şuşanın azad olunmasına görə” medalları ilə təltif
olunmuş igid Vətən oğlunun xatirəsi hər zaman əziz
tutulur. Cənab
Prezident İlham Əliyevin və Birinci vitse-prezident Mehriban Əliyevanın şəhidlərimizə,
şəhid ailələrinə, Qarabağ müharibəsi əlillərinə, onların ailələrinə göstərdikləri
diqqət və qayğı Qazaxda da hər zaman örnək götürülür. Qazax
Rayon İcra Hakimiyyətinin başçısı Rəcəb Babaşov rəhbər təyin olunduğu ilk gündən şəhidlərimizə və onların ailələrinə daim qayğı
ilə yanaşır. Rayon rəhbərliyi tərəfindən əlamətdar günlərdə, şəhidlərimizin
doğum və anım günlərində ailələri və məzarları ziyarət olunur, igid Vətən oğullarının əziz xatirələri dərin ehtiramla yad edilir.İlk gündən əsası qoyulan ənənə bu gün də davam etdirilir. Rayon
rəhbərliyinin tapşırığına əsasən bu gün 29 yaşını qeyd etdiyimiz kiçik
gizir Mədətov Röyal Şahin oğlunun xatirəsi də yad olunub. Qazax
Rayon İcra Hakimiyyəti başçısının müavini-İctimai-siyasi
və humanitar məsələlər şöbəsinin müdiri Gulaya Həsənova və RİH başçısı
aparatında yeni yaradılmış Vətən müharibəsi iştirakçıları və şəhid ailələri ilə işin təşkili şöbəsinin müdiri qazi kapitan Samir Çobanov, vaxtilə oxuduğu Alı Əliyev adına Hüseynbəyli
kənd tam orta məktəbin direktoru Mahirə Abbasova şəhidimizin
doğum günündə ailə üzvləri ilə birlikdə məzarını ziyarət
edərək tər qərənfillər düzüb, igid Vətən oğlunun əziz xatirəsini
dərin ehtiramla yad ediblər.
Şəhidimizin
ruhuna dua oxunduqdan sonra Röyal Mədətovun ata ocağına gələrək Vətən uğrunda
canından keçən şəhidimizə Allahdan rəhmət, ailəsinə səbir diləyiblər. Şəhidimizin
otağında şəxsi əşyalarından, şəkillərindən ibarət guşə ilə tanış olaraq Röyal Mədətov
kimi oğullarımızın daim qəlblərdə yaşayacaqlarını söyləyib, Azərbaycan xalqının
qüruru, fəxri olan bütün şəhidlərimizin, o cümlədən də Röyalın xatirəsinin daim
əziz tutulacağını bildiriblər. Müavin
Gulaya Həsənova rayon rəhbərliyinin adından şəhidimizin ailəsinə səmimi ürək
sözlərini çatdırıb, Vətən uğrunda canından keçən şəhidimizə Allahdan rəhmət,
ailəsinə səbir diləyib. Respublika Prezidenti, Ali Baş Komandan İlham Əliyevin
rəhbərliyi altında 44 günlük Vətən müharibəsində qüdrətli Azərbaycan Ordusunun
qazandığı tarixi Qələbədən söz açan müavin həmin qələbədə payı olan Röyal kimi
qəhrəman oğullarımızla hər birimizin fəxr etdiyini bildirib. Azərbaycan xalqı
var olduqca şəhidlərimizin daim qəlblərdə yaşayacağını qeyd edib. Şəhidlərimizin
göstərdikləri igidliyin, qəhrəmanlığın bugünkü və gələcək nəsillər üçün hər zaman
örnək olacağını vurğulayıb. "Şəhidlərimizi yad etmək hər birimizin vəzifə
borcudur. Bizlər də Röyalın doğum günündə onun əziz xatirəsini dərin ehtiramla
yad edərək ailəsinə baş çəkməyi, doğum gününü sizlərlə bir yerdə qeyd etməyi
özümüzə borc bildik”, - deyən müavin şəhidimizin ailəsinə göstərilən diqqət və
qayğının bundan sonra da yüksək səviyyədə olacağını söyləyib. Qazax RİH başçısı aparatında yeni yaradılmış Vətən müharibəsi iştirakçıları və şəhid ailələri ilə işin təşkili şöbəsinin müdiri qazi kapitan Samir Çobanov şəhidimiz haqqında ürək sözlərini bölüşərək Röyalın Vətən torpaqlarının
azadlığını hər zaman hər şeydən üstün tutduğunu, ölümün gözünə dik baxaraq şəhid
olmaqdan bir an olsun belə çəkinmədiyini vurğulayıb. Röyal kimi qəhrəman
oğullarımızla hər zaman fəxr etdiyini dilə gətirib. Bir qazi olaraq ölkə Prezidenti cənab İlham Əliyevin, Birinci vitse-prezident
Mehriban Əliyevanın şəhidlərimizə, şəhid ailələrinə, qazilərimizə göstərdiyi
diqqət və qayğının hər birimiz üçün örnək olduğunu bildirib. Bizlərə böyük
tarixi Qələbəni bəxş edən bütün şəhidlərimizin xatirəsinin hər zaman əziz
tutulacağını, onların daim qəlblərdə əbədi yaşayacaqlarını söyləyib. Şəhidimizin
doğum günündə bugünkü ziyarətin də həmin diqqət və qayğının davamı olduğunu
qeyd edib.
Övladı
haqqında ürək sözlərini bölüşən şəhidimizin anası Zərifə
Cəlilova Röyalın hər zaman torpaq, yurd-yuva, Vətən sevdalı olduğunu
bildirib. Qeyd edib ki: "Bu gün tək təsəllimiz odur ki, Röyal təkcə öz
el-obasının deyil, bütöv Azərbaycanın oğludur, şəhididir. Necə ki, mən
övladımla fəxr edirəm, eləcə də bütöv Azərbaycan Röyalımla fəxr edir”. Qardaşı ilə
hər zaman qürur duyduğunu bildirən şəhidimizin qardaşı Taleh Mədətov da Vətən
uğrunda canından keçən bütün şəhidlərimizə Allahdan rəhmət diləyib. Qardaşı
Röyalın Vətən torpaqlarını düşmən tapdağından azad etməyi özünün həyat amalı
bildiyini vurğulayıb. Şəhid ailəsi kimi hər zaman onlara göstərilən diqqət və
qayğıya görə ölkə Prezidenti İlham Əliyevə, Birinci vitse-prezident Mehriban
Əliyevaya, rayon rəhbərliyinə minnətdarlığını bildirib. Qardaşının doğum günündə
onun xatirəsinin yad olunmasını Röyalın simasında şəhidlərimizə olan hörmət və
ehtiramın bariz nümunəsi kimi dəyərləndirib. Kiçik gizir Mədətov Röyal Şahin oğlu Şəhid
Röyal Mədətov 14 may 1992-ci ildə Qazax rayonunun Əzizbəyli (indiki Hüseynbəyli)
kəndində anadan olmuşdur. 1998-ci ildə Qazax rayon Alı Əliyev adına Hüseynbəyli
kənd tam orta məktəbin 1-ci sinfinə daxil olmuş, 2009-cu ildə həmin məktəbin
11-ci sinfini bitirmişdir. 2010-cu ildə Səfərbərlik və
Hərbi Xidmətə Çağırış üzrə Dövlət Xidmətinin Qazax Rayon Şöbəsi tərəfindən Azərbaycan ordu sıralarına həqiqi hərbi xidmətə çağrılmışdır. Həqiqi hərbi xidmətdən tərxis olunduqdan sonra 2012-ci
ildən könüllü olaraq Azərbaycan ordu sıralarına qayıtmışdır. 2013-2018-ci
illər ərzində Azərbaycan Silahlı Qüvvələrinin "N" saylı hərbi hissəsində
müddətdən artıq həqiqi hərbi xidmət hərbi qulluqçusu (MAHHXHQ) kimi xidmət etməyə
başladı. Xidməti müddətində özünü bacarıqlı, səriştəli, döyüş texnikasının sirlərinə
yiyələnmiş bir hərbçi kimi göstərərək fərqləndi. Röyal Mədətov daim təhsilini
artırmaq qayğısına qalır, öz üzərində çalışırdı. O, xidmət edən müddətdə
kurslara qatılaraq yüksək nəticələr göstərmişdi. Sınaqlardan 116 nəfərdən cəmi
6 nəfər keçmiş və Xüsusi Təyinatlı Qüvvələrə qəbul edilmişdi. Onlardan biri də
Röyal Mədətov idi. Üstəlik, Röyal normativləri yüksək nəticə ilə yerinə
yetirdiyi üçün ona kiçik gizir rütbəsi də vermişdilər. 2016-cı
ilin Aprel döyüşləri onun ömür dastanında yeni bir səhifə açdı. İştirakçısı
olduğu vuruşmaların birində yaralandı. Müalicə aldıqdan sonra təkrar olaraq
ordu sıralarına qayıdıb kiçik gizir kimi hərbi xidmətini davam etdirməyə
başladı. "N” saylı hərbi hissədə xüsusi təyinatlı dəstənin
xüsusi təyinatlı manqa komandiri olan kiçik gizir Röyal Mədətov Füzuli-Cəbrayıl-Xocavənd
rayonları istiqamətində gedən döyüşlərdə qəhrəmancasına vuruşdu. Vətən müharibəsində
əsl igidlik və qəhrəmanlıq göstərib. Gözündə qorxu yox idi. Ona görə də döyüş
yoldaşları ona "Qara qartal" ləqəbi vermişdilər. Röyal Mədətov öz
qorxmazlığı, mətinliyi ilə həmişə nümunə göstərilirdi. "N" saylı hərbi
hissədə Xüsusi Təyinatlı Qüvvələrdə xüsusi təyinatlı manqa komandiri olan kiçik
gizir Röyal Mədətov Qırmızı bazar (Şuşa istiqamətində) kəndi uğrunda gedən
vuruşmada 22 oktyabr 2020-ci il tarixində snayperin atdığı güllə ilə düz ürəyindən
vurulub və döyüş meydanında şəhid olub. Qəhrəman şəhidimiz 24.10.2020-ci il tarixdə Qazax şəhərindəki
Şəhidlər qəbiristanlığında izdihamla dəfn edilmişdir. Ailəliydi. Övladı yoxdur. 28 yaşında
Şəhidlik zirvəsinə ucalan kiçik gizir Röyal Mədətovun döyüş meydanında göstərdiyi
igidlik ölkə Prezidenti tərəfindən də yüksək qiymətləndirildi. O, ölümündən
sonra cənab Prezident İlham Əliyevin 15 dekabr 2020-ci il tarixli Sərəncamına əsasən "Vətən uğrunda” və 29
dekabr 2020-ci il tarixli Sərəncamına əsasən "Şuşanın azad olunmasına görə” medalları ilə
təltif olunmuşdur. GOYEZEN.AZ
Facebook-da paylaş