İcra başçısı məcburi köçkünlərin məskunlaşdığı Yeni qəsəbədə olub
Bu gün ölkəmizdə dövlət başçısı İlham Əliyevin
yürütdüyü məqsədyönlü siyasətin mərkəzində hər zaman vətəndaş amili dayanır.
Həyata keçirilən tədbirlər, atılan bütün addımlar vətəndaş amilinə söykənir. Bu
gün onu da tam əminliklə söyləyə bilərik ki, Qazaxda da vətəndaş mövqeyi hər zaman
üstün tutulur. Qazaxda şəhid ailələri, Qarabağ müharibəsi əlilləri
və veteranları ilə yanaşı, məcburi köçkün ailələrinə də daim qayğı göstərilir.
Onları narahat edən məsələlərə hər zaman həssaslıqla yanaşılır. Ölkə başçısının məcburi köçkün ailələri ilə bağlı
həyata keçirdiyi dövlət siyasəti rayon rəhbəri tərəfindən də olduğu kimi icra
olunur. Qazax Rayon
İcra Hakimiyyətinin başçısı Rəcəb Babaşovun fəaliyyətə başladığı ilk gündən düşmən işğalına məruz
qalan Bağanıs Ayrım, Xeyrımlı,
Barxudarlı, Sofulu, Yuxarı Əskipara və Aşağı Əskipara kənd
sakinlərinin məskunlaşdığı Yeni
qəsəbədə olması, mütəmadi olaraq görüşlər keçirməsi, sakinlər tərəfindən
qaldırılan hər bir məsələnin həll olunması istiqamətində tapşırıq verməsi bunu
bir daha sübut edir.
Aprelin 28-də Qazax Rayon İcra Hakimiyyətinin başçısı
Rəcəb Babaşov icra aparatının məsul işçiləri, hüquq-mühafizə orqanlarının
rəhbərləri "Azəristiliktəchizat” ASC-nin Tovuz, Ağstafa, Qazax İSİS-in rəisi
İlham Nağıyevlə birlikdə Qazaxbəyli kəndində yerləşən Yeni qəsəbədə
yaşayan bir qrup məcburi köçkünlə görüşüb, onların qayğıları ilə maraqlanıb. Vətəndaşların
isti su ilə bağlı müraciətlərini diqqətlə dinləyən icra başçısı hər zaman
olduğu kimi bu məsələyə də həssaslıqla yanaşılacağını bildirib və məsələnin
araşdırılması istiqamətində aidiyyəti üzrə tapşırıq verib. Ölkəmizdə məcburi köçkün
ailələrinə göstərilən dövlət qayğısından danışan rayon rəhbəri bu qayğının əsasının Ulu Öndər Heydər Əliyev tərəfindən
qoyulduğunu və bu gün də ölkə Prezidenti İlham Əliyev, Birinci vitse-prezident
Mehriban Əliyeva tərəfindən uğurla davam etdirildiyini bildirib. İcra başçısı
dövlətin, ölkə başçısının məcburi köçkün ailələrinə olan qayğısını əldə rəhbər
tutaraq onların qayğılarına hər zaman həssaslıqla yanaşdığını qeyd edib. Qəsəbədə
məskunlaşan Yuxarı Əskipara kənd sakini Nüsrəddin Hacıyev, Bağanıs Ayrım kənd
sakini Şəmil Adıgözəlov, Barxudarlı kənd sakini Hüseyn Yunusov onlara
göstərilən qayğıya görə ölkə Prezidenti İlham Əliyevə və rayon rəhbərliyinə
bütün məcburi köçkün ailələri adından minnətdarlıqlarını bildiriblər.
Sonra rayon rəhbərliyi Aşağı Əskipara körpələr evi-uşaq bağçasında
olub, uşaqlara göstərilən diqqət və qayğı, körpələr üçün yaradılan şəraitlə, uşaqların
davamiyyəti, tibbi müayinə olunmaları, ərzaq təminatının mövcud vəziyyəti ilə
maraqlanıb. Bəzi tapşırıq və tövsiyələrini verib.
GOYEZEN.AZ
Facebook-da paylaş