Vətən uğrunda canından keçən qazaxlı şəhid Babək Həsənovun övladının 1 yaşı qeyd olunub
Rəşadətli Azərbaycan
Ordusu 2020-ci ilin 27 sentyabrında başlayan İkinci Qarabağ müharibəsində
Silahlı Qüvvələrin Müzəffər Ali Baş Komandanı İlham Əliyevin rəhbərliyi ilə
müasir hərb tarixi üçün nümunə olan əsl qəhrəmanlıq dastanı yazdı. Qarabağ adlı
haqq savaşında tarixi ədaləti bərpa etmək üçün bütün qüvvəsi ilə səfərbər oldu
və sonunda Böyük Qələbə qazandı. Azərbaycanın igid övladları işğalçı Ermənistan
ordusunu 44 gün ərzində darmadağın edərək düşməni torpaqlarımızdan qovdular. Cəsur
Vətən oğulları doğma torpaqlarımız uğrunda son damla qanına qədər vuruşaraq əsl
qəhrəmanlıq nümunəsi göstərdilər. Azərbaycanın ərazi bütövlüyünün bərpası uğrunda
Vətən müharibəsində qəhrəmancasına döyüşərək şəhid olan igidlərimizdən biri də əsgər Həsənov Babək Saleh oğludur. Bu gün igid Vətən oğlunun övladı Həsənli Əfsanə Babək qızının 1 yaşı tamam olur. Ölkə Prezidenti cənab İlham Əliyevin və Birinci vitse-prezident Mehriban
Əliyevanın şəhidlərimizə, şəhid ailələrinə, Qarabağ müharibəsi əlillərinə,
onların ailələrinə göstərdikləri diqqət və qayğını əldə rəhbər tutan Qazax
Rayon İcra Hakimiyyətinin başçısı Rəcəb Babaşov Vətən müharibəsinin şəhidi
Babək Həsənovun övladının doğum gününü də unutmadı. Bu gün 1 yaşını qeyd edən Əfsanə
balamızı tək qoymadı, öz ənənəsinə sadiq qalaraq şəhid övladının ad gününü təbrik
etdi. Rayon rəhbərliyinin tapşırığına əsasən Qazax Rayon İcra Hakimiyyəti başçısı aparatında İctimai-siyasi və humanitar məsələlər şöbəsinin baş məsləhətçisi
Gülnar Quluyeva, Baş mütəxəssis-komendant Leyla Muradova, Azərbaycan Respublikası Milli Məclisinin
Beynəlxalq münasibətlər və parlamentlərarası əlaqələr komitəsinin sədri Səməd
Seyidovun köməkçisi Akif Əmirov Birinci Şıxlı kəndində şəhidimizin evində olub, övladının doğum gününü ailə üzvləri
ilə birlikdə qeyd ediblər. Şəhidimizin tək övladı olan Əfsanə balamıza hədiyyələrini
təqdim edib, rayon rəhbərliyinin adından səmimi ürək sözlərini
və təbriklərini çatdırıblar. Vətən uğrunda canından keçən şəhidimizə
Allahdan rəhmət, ailəsinə səbir diləyib, igid qəhrəmanımızın əziz xatirəsini
dərin ehtiramla yad ediblər. Qazax
Rayon İcra Hakimiyyəti başçısı aparatında İctimai-siyasi
və humanitar məsələlər şöbəsinin baş məsləhətçisi Gülnar Quluyeva cənab
Prezident, Ali Baş Komandan İlham Əliyevin rəhbərliyi altında 44 günlük Vətən
müharibəsində qüdrətli Azərbaycan Ordusunun qazandığı tarixi Qələbədə payı olan
Babək Həsənov kimi oğullarımızın daim qəlblərdə yaşayacağını bildirib. Bu gün
şəhidlərimizlə, qazilərimizlə hər birimizin fəxr etdiyini, Azərbaycan xalqı var
olduqca şəhidlərimizin də var olacağını qeyd edib. Dövlətimiz, ölkə başçısı,
eləcə də rayon rəhbərliyi tərəfindən şəhidimizin ailəsinə göstərilən diqqət və
qayğının bundan sonra da davam etdiriləcəyini söyləyib.
Milli
Məclisin deputatı Səməd Seyidovun köməkçisi Akif Əmirov şəhidimizin övladını təbrik edərək
onun hər birimizin övladı olduğunu bildirib. Bu gün Babək Həsənovla təkcə
qazaxlıların deyil, bütöv Azərbaycanın fəxr etdiyini, qürur duyduğunu söyləyib.
Fəxr yerimiz olan şəhidlərimizin ailələrinə, övladlarına sahib çıxmağın hər
birimizin borcu olduğunu vurğulayıb.
Şəhidimizin anası Gülarə Həsənova şəhid ailəsi kimi hər zaman onlara göstərilən diqqət
və qayğıya görə ölkə Prezidenti İlham Əliyevə, Birinci vitse-prezident Mehriban
Əliyevaya və rayon rəhbərliyinə minnətdarlığını bildirib. Nəvəsinin doğum
günündə onu tək qoymadıqları və təbrik etdikləri üçün rayon rəhbərliyinə
razılığını ifadə edib. Oğlunun xatirəsinin əziz tutulmasını, ailəsinə sahib
çıxılmasını, daim yad olunmasını Babəkin timsalında bütün şəhid ailələrinə olan
hörmət və ehtiramın, qayğının bariz nümunəsi kimi qiymətləndirib. Şəhidimizin həyat yoldaşı Aytəkin Həsənova rəhbər təyin olunduğu ilk gündən şəhidlərimizə və
onların ailələrinə daim qayğı ilə yanaşan, əlamətdar günlərdə, şəhidlərimizin
doğum və anım günlərində ailələrini və məzarlarını ziyarət edən rayon rəhbərliyinə
təşəkkürünü çatdırıb. Bu gün qızının ad gününü təbrik etməsini şəhid ailələrinə
və ömür-gün yoldaşı Babəkin ailəsinə göstərilən növbəti qayğı kimi qeyd edib. Şəhid əsgər Həsənov Babək Saleh oğlu
Şəhid Babək Həsənov 14 sentyabr 1990-cı ildə
Qazax rayonunun Birinci Şıxlı kəndində anadan olmuşdur. 1996-cı ildə Qazax
rayon Musa Həsənov adına Birinci Şıxlı kənd tam orta məktəbin 1-ci sinfinə
daxil olmuş, 2007-ci ildə həmin məktəbin 11-ci sinfini bitirmişdir. 2008-ci ildəAzərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin Qazax
Rayon Şöbəsi tərəfindən Azərbaycan Silahlı Qüvvələrinə həqiqi hərbi
xidmətə çağırılmış, 2009-cu ildə hərbi xidmətdən tərxis olunmuşdur. 2013-2018-ci illər ərzindəAzərbaycan Silahlı Qüvvələrinin
"N” saylı hərbi hissəsində müddətdən artıq həqiqi hərbi
xidmət hərbi qulluqçusu (MAHHXHQ) kimi xidmət etmişdir. Ölkə Prezidentinin "Azərbaycan
Respublikasında qismən səfərbərlik elan edilməsi haqqında” müvafiq tarixli Sərəncamına
əsasən 2020-ci il oktyabr ayının 26-da Azərbaycan
Respublikası Səfərbərlik və Hərbi Xidmətə Çağırış üzrə Dövlət
Xidmətinin Qazax Rayon Şöbəsi tərəfindən qismən hərbi səfərbərliyə cəlb
olunmuşdur. Babək Həsənov Füzulinin, Cəbrayılın, Qubadlının,
Laçının alınması uğrunda gedən döyüşlərdə iştirak etmış, şücaət göstərmişdir. 04.11.2020-ci
il tarixdə Laçın rayonu istiqamətində torpaqlarımızın azadlığı uğrunda gedən
döyüşlərdə qəhrəmancasına şəhid olmuşdur. 05.11.2020-ci
il tarixdə doğulduğu Birinci Şıxlı kənd qəbiristanlığında izdihamla dəfn
edilmişdir. Ailəliydi. Əfsanə adlı 1 azyaşlı qız övladı yadigar qalıb.
Vətən
uğrunda canından keçən şəhidimizin döyüş meydanında göstərdiyi igidlik Ali Baş
Komandan İlham Əliyev tərəfindən də yüksək qiymətləndirildi. Şəhid Babək
Həsənov ölümündən sonra cənab Prezidentin 15 dekabr 2020-ci il tarixli
Sərəncamına əsasən "Vətən uğrunda”, 24
dekabr 2020-ci il tarixli Sərəncamına əsasən "Cəbrayılın azad olunmasına görə”, 29
dekabr 2020-ci il tarixli Sərəncamlarına əsasən "Laçının azad olunmasına görə”, "Qubadlının azad olunmasına görə”, 30 dekabr 2020-ci il tarixli Sərəncamına əsasən "Hərbi xidmətlərə görə” medalları ilə təltif olunmuşdur.
Bu gün
Babək Həsənov kimi qəhrəman oğullarımızla nəinki doğulduğu el-oba, eləcə də
bütöv Azərbaycan fəxr edir, hər bir azərbaycanlı qürur duyur. Şəhidlərimizi yad
etmək, xatirəsini əziz tutmaq hər birimizin mənəvi borcudur. Bizlər də Babək
Həsənovun timsalında bütün şəhidlərimizi ehtiramla yad edir, ruhu qarşısında
baş əyirik. Ruhun şad, məkanın cənnət olsun igid Vətən oğlu!.
GOYEZEN.AZ
Facebook-da paylaş