İcra başçısı Xocavənd istiqamətində gedən döyüşlərdə yaralanmış Şükür Cürənovu ziyarət edib
Azərbaycanın
44 gün davam edən Vətən müharibəsi! Haqq səsimizi dünyaya çatdıran haqq
savaşımız! Bu, o müharibədir ki, Azərbaycan dövləti 44 günlük savaşda tarixi ədaləti
bərpa etdi. Azərbaycan İkinci Qarabağ müharibəsində
Qələbə qazandı. Möhtərəm Prezidentimiz, Azərbaycan Silahlı Qüvvələrinin Ali Baş
Komandanı İlham Əliyevin rəhbərliyi ilə rəşadətli Ordumuz canı-qanı bahasına mənfur
düşmənin "məğlubedilməz erməni ordusu” mifini 44 günə dağıtdı, yerlə-yeksan
etdi. Bu gün hər birimiz fəxr edirik ki, Müzəffər Ali Baş Komandanın qətiyyəti
və uzaqgörən rəhbərliyi, rəşadətli Azərbaycan Ordusunun peşəkarlığı və qələbə əzmi,
xalqımızın mətanəti sayəsində torpaqlarımız işğaldan azad edildi. Və bu müharibə hərb tariximizə Azərbaycanın şanlı Qələbəsi
kimi yazıldı. Vətən müharibəsində şanlı Qələbənin
qazanılmasında payı olan oğullarımızdan biri də Cürənov
Şükür İbrahim oğludur. O, 16 sentyabr 1999-cu ildə Qazax rayonunun Daş
Salahlı kəndində anadan olub. Araz Əmilov adına Daş Salahlı kənd 1 nömrəli tam
orta məktəbi bitirib. Hələ hərbi xidmətdə olarkən bacarıqlı, çalışqan, cəsur hərbi
qulluqçulardan biri kimi komandiri tərəfindən Təşəkkür məktubu alan Şükür Vətən
müharibəsində də seçilməyi bacarıb. Ön cəbhədə vuruşub. 2020-ci ilin may ayının
8-dən Azərbaycan Ordusunun "N” saylı hərbi
hissəsində müddətdən artıq həqiqi hərbi xidmət hərbi qulluqçusu (MAHHXHQ) kimi
xidmətə başlayan Şükür Cürənov Xocavənd istiqamətində gedən döyüşlərdə
iştirak edib. 10 noyabr 2020-ci il tarixdə saat 06:30-da Xocavənd rayonunda sol
qolunun yuxarı hissəsindən yaralanıb. Müalicəsini Tovuz Rayon Mərkəzi Xəstəxanasında
alan Şükür noyabrın 25-dən doğulduğu Daş Salahlı kəndinə ailəsinin yanına qayıdıb.
Səhhəti ilə əlaqədar məzuniyyətdə olan Şükür sağlamlığına qovuşan kimi yenə öz
işinin başına, döyüş yoldaşlarının yanına qayıdacağı günü səbirsizliklə gözləyir. Bu gün bizlər də vətəndaş olaraq Vətən
uğrunda canını fəda edən, sağlamlığını itirən əsgər və zabitlərimizi, hərbçilərimizi,
qanları ilə dastan yazan şəhidlərimizi tanımalı və tanıtmalıyıq. Onlarla hər zaman qürur duymalıyıq. Qazax Rayon İcra
Hakimiyyətinin başçısı Rəcəb Babaşov rəhbər təyin olunduğu ilk gündən şəhidlərimizin
xatirəsini əziz tutmağı, onların ailə üzvlərinə, hərbçilərimizə, yaralı əsgər
və zabitlərimizə qayğı göstərməyi fəaliyyətinin əsas hissəsi hesab edir. Bu
amili əldə rəhbər tutan icra başçısı bu gün də öz ənənəsini davam etdirir.
Qazax Rayon İcra
Hakimiyyətinin başçısı Rəcəb Babaşov icra aparatının məsul şəxsləri
ilə birlikdə yaralı hərbçimiz Şükür Cürənovu da evində ziyarət edib. "Sizlərin
hər biri bizim üçün qəhrəmansınız. Sizlər hər şeyin ən yaxşısına layiqsiniz”, -
deyən icra başçısı yaralımızın səhhəti və qayğıları ilə maraqlanıb. Ölkə Prezidenti tərəfindən hərbçilərimizə,
əsgərlərimizə, onların ailə üzvlərinə göstərilən diqqət və qayğıdan söz açan
rayon rəhbəri həmin qayğının bundan sonra da davam etdiriləcəyini
bildirib. Vətən
uğrunda gedən döyüşlərdə yaralanan Şükür Cürənov Ali Baş
Komandan İlham Əliyevin rəhbərliyi altında onun "İrəli!” əmrini layiqincə
yerinə yetirən igid Vətən oğullarının göstərdikləri qəhrəmanlıqlardan danışıb. "İşğaldan
azad olunan torpaqlarımıza mənim, eləcə də döyüş yoldaşlarımın qanı tökülüb.
Bizlər bir daha imkan verməməliyik ki, yağı düşmən bizim torpaqlara yad
gözlərlə baxsınlar”, - deyən Şükür əldə edilən Qələbə münasibətilə xalqımızı
təbrik edib. Vətən uğrunda canlarından keçən şəhidlərimizə Allahdan rəhmət,
yaralılarımıza tez zamanda sağalmağı arzulayıb. Yaralımızın yaxını Ələsgər
Məhərrəmov Vətən müharibəsində iştirak edən bütün hərbçilərimizlə fəxr etdiyini
dilə gətirib. Şükürə, eləcə də digər hərbçilərimizə göstərilən qayğıya görə
ölkə Prezidentinə və icra başçısına minnətdarlığını bildirib. Dörd bacının bir qardaşı
olan Şükürə biz də tez zamanda sağalmasını və yenidən Vətənin keşiyində
dayanmasını arzu edirik.
GOYEZEN.AZ
Facebook-da paylaş