İcra başçısı yeni təyin olunmuş məktəb direktoruna fəaliyyətində uğurlar arzulayıb
Bu gün birmənalı şəkildə qeyd etmək
olar ki, son illər Qazaxda bütün sahələrlə yanaşı, təhsil sahəsi də özünün
inkişaf dövrünü yaşayır. Rayonda bu sahədə əldə edilən uğurlar, qazanılan
nailiyyətlər ildən-ilə artmaqda davam edir. Heç şübhəsiz ki, bu uğurların
kökündə ölkə Prezidenti İlham Əliyevin, Birinci vitse-prezident Mehriban
Əliyevanın təhsil sahəsinə olan qayğıları, həmin sahədə çalışan insanlara olan
səmimi münasibətləri, verdikləri dəyər dayanır. Qazax Rayon İcra Hakimiyyətinin
başçısı Rəcəb Babaşovun fəaliyyətə başladığı ilk gündən rayonda daim diqqət mərkəzində
saxladığı sahələrdən biri də məhz təhsil sahəsidir. İstər müəllimlər, istərsə də
şagirdlər rayon rəhbərliyi tərəfindən göstərilən diqqət və qayğını elə ilk gündən
hiss edirlər. Rayon rəhbərinin təhsildə fərqlənən müəllim və şagirdləri qəbul
etməsi, məktəblərdə onlar üçün yaradılan şəraitlə tanış olması, qayğıları ilə
yaxından maraqlanması bunun bariz nümunəsidir.
Bu gün rayon rəhbərinin İsmət
Qayıbov adına şəhər 3 nömrəli tam orta məktəbə yeni direktor təyin olunmuş
Rzayev Ruslan Rasim oğlunu qəbul etməsi, ona gələcək işlərində və fəaliyyətində
uğurlar arzulaması təhsil sahəsinə və müəllimlərə olan qayğısının daha bir əyani
sübutudur. Qazax Rayon İcra Hakimiyyətinin
başçısı Rəcəb Babaşov çıxış edərək yeni tədris ilinin başlanması münasibətilə bütün
təhsil işçilərini bir daha təbrik edib. Dövlət və dövlət başçısı tərəfindən təhsil
sahəsinə göstərilən diqqət və qayğıdan söz açan rayon rəhbəri Аzərbаycаn elminin, təhsilinin inkişafında ulu öndər Hеydər
Əliyеvin misilsiz xidmətləri olduğunu bildirib. Ölkəyə rəhbərliyinin bütün
dövrlərində Ümummilli Liderin bu sаhəyə daim diqqət və qаyğı ilə yanaşmasından
söz açıb. Bu gün Heydər Əliyev siyasətinin layiqli davamçısı Respublika
Prezidenti İlham Əliyevin ölkədə təhsil siyasətini uğurla davam etdirərək
"Neft kapitalını insan kapitalına çevirək" devizi altında təhsilin
inkişafına böyük önəm verdiyini qeyd edib. Təhsil sahəsinin ildən-ilə
inkişaf etməsində Heydər Əliyev Fondunun prezidenti, Birinci vitse-prezident
Mehriban Əliyevanın da misilsiz xidmətləri olduğunu qeyd edən rayon rəhbəri Fondun
həyata keçirdiyi çoxsaylı işlərdən söz açıb. İcra
başçısı Fond tərəfindən "Yeniləşən Azərbaycana yeni məktəb” layihəsi
çərçivəsində bütün bölgələrimizdə olduğu kimi Qazaxda da təhsil müəssisələrinin
maddi-texniki bazasının möhkəmləndirilməsini, yeni-yeni məktəblərin inşa
olunmasını və ya əsaslı şəkildə yenidən qurulmasını bu sahədə görülən işlərin
bariz nümunəsi kimi qiymətləndirib. İcra başçısı qeyd edib ki, təkcə bu il Heydər
Əliyev Fondu tərəfindən rayonda Xalq yazıçısı İsmayıl Şıxlının adını daşıyan
1176 şagird yerlik Kosalar kənd tam orta məktəbin əsaslı şəkildə yenidən
qurularaq Bilik Günündə müəllim və şagirdlərin istifadəsinə verilməsi, yenə də
Fond tərəfindən Şahnabad Nəsibova adına Sarıvəlli kənd tam orta məktəb üçün 220
şagird yerlik yeni binanın inşa olunması, Təhsil
Nazirliyi tərəfindən Aydın Məmmədov adına Qaymaqlı kənd tam orta məktəb üçün
180 şagird yerlik yeni binanın tikilməsi gələcəyimiz olan uşaqlara göstərilən
dövlət qayğısıdır. Ölkə Prezidenti tərəfindən Mehdi
Hüseyn adına humanitar və təbiət fənləri üzrə məktəb-lisey binasının sökülərək
yenidən tikilməsi haqqında imzalanan 4 avqust 2020-ci il tarixli Sərəncam
Qazaxda təhsil sahəsinə olan qayğının bundan sonra da uğurla davam etdirilməsi
deməkdir. Rayon rəhbəri bütün bu işlərə və Qazaxın timsalında bölgələrimizdə
təhsil sahəsinə göstərilən dövlət qayğısına görə rayon ictimaiyyəti, ziyalılar,
təhsil işçiləri adından bir daha ölkə başçısına və Birinci vitse-prezidentə təşəkkürünü
çatdırıb.
Rayon Təhsil Şöbəsinin müdiri
Nizaməddin Babanlı çıxış edərək təhsil sahəsinə göstərdiyi diqqət və qayğıya
görə bütün təhsil işçiləri adından rayon rəhbərinə dərin minnətdarlığını
bildirib. Sonda yeni məktəb direktoruna bir
daha səmimi arzularını çatdıran icra başçısı daim öz üzərində çalışmasını, təcrübəli
məktəb direktorlarından bəhrələnməsini, nümunəvi məktəblərdən olan şəhər 3 nömrəli
tam orta məktəbin uğurlarının bundan sonra da davam etməsi üçün var qüvvəsi ilə
çalışmasını tövsiyə edib. Yeni məktəb direktoru təyin
olunmuş Ruslan Rzayev ona verdiyi dəyərə görə rayon rəhbərinə təşəkkürünü
çatdırıb. Qeyd edib ki, bugünkü görüş bir daha onu göstərdi ki, dövlətimiz təhsil
sahəsinə xüsusi qayğı ilə yanaşır. Biz müəllimlər, məktəb direktorları bu gün
sizin sayənizdə həmin qayğının şahidi oluruq. "Yeni tədris ilində bu görüş mənim
üçün ən böyük stimul oldu. Eyni zamanda da üzərimizə böyük məsuliyyət hissi
qoydu”, - deyən məktəb direktoru ona olan etimadı öz fəaliyyəti ilə hər zaman doğrultmağa
çalışacağını bildirib. Məlumat üçün onu da qeyd edək ki,
Ruslan Rzayev direktor təyin olunduğu İsmət
Qayıbov adına şəhər 3 nömrəli tam orta məktəbin məzunu olub, eyni
zamanda məktəbdə tarix müəllimi işləyib.
GOYEZEN.AZ
Facebook-da paylaş