İcra başçısı Qarabağ qaziləri ilə görüşüb
Rəhbər təyin olunduğu ilk
gündən hər zaman Qarabağ müharibəsi əlillərinin və veteranlarının yanında olan,
diqqət və qayğısını onlardan əsirgəməyən Qazax Rayon İcra Hakimiyyətinin
başçısı Rəcəb Babaşov bayram ərəfəsində də onları unutmayıb. Bu gün 31 Dekabr –
Dünya Azərbaycanlılarının Həmrəylik Günü və Yeni il bayramları münasibətilə
onlarla görüşüb, səmimi təbriklərini çatdırıb. Müstəqil Azərbaycanın parlaq
gələcəyi naminə hər zaman dövlətin, ölkə rəhbəri, Ali Baş Komandan İlham
Əliyevin ətrafında sıx birləşən Qarabağ müharibəsi əlillərinə, onların ailə
üzvlərinə gələcək işlərində uğurlar arzulayıb. "Qazilər
çay ocağı” evində səmimi söhbət əsasında keçirilən görüşdə dövlət və dövlət
başçısı tərəfindən müharibə veteranlarına və əlillərinə, şəhid ailələrinə və məcburi
köçkün ailələrinə göstərilən qayğıdan bir daha söhbət açılıb. Qazax Rayon İcra
Hakimiyyətinin başçısı Rəcəb Babaşov "Azərbaycan Qarabağ
Müharibəsi Əlilləri, Veteranları və Şəhid Ailələri” İctimai Birliyinin Qazax
rayon şöbəsinin sədri seçilmiş Xasay Balayevi və yenidən müavin seçilmiş Namiq
Alıyevi bir daha təbrik edib. Azərbaycan QMƏVŞAİB Qazax rayon şöbəsinin sədri
olmuş mərhum Kamandar Məmmədovun xatirəsinin hər zaman əziz tutulduğunu
bildirib. Onun birlikdə yaratdığı abu-havanın, əlillər arasında olan səmimi
münasibətin və həmrəyliyin bundan sonra da onun istədiyi kimi olacağını qeyd
edib.
Ölkə başçısı İlham Əliyev və
Birinci vitse-prezident Mehriban Əliyeva tərəfindən Qarabağ əlillərinə göstərilən
dövlət qayğısından söz açan icra başçısı qeyd edib ki, siz qazilər bu qayğını
hər an hiss etmisiniz. İstər yeni mənzillərin verilməsi, istər yeni
avtomobillərin hədiyyə olunması, istərsə də sosial rifah halınızın
yaxşılaşdırılması istiqamətində atılan uğurlu addımlarla həmişə bu qayğının,
dövlət dəstəyinin şahidi olmusunuz. Rayon rəhbəri qeyd edib ki, dövlətin bu
təbəqədən olan insanlara göstərdiyi qayğısının nəticəsidir ki, hər keçən gün
qanunlara edilən mütərəqqi dəyişikliklərlə Azərbaycanın ərazi bütövlüyünün
müdafiəsi zamanı döyüşlərdə fiziki sağlamlığını itirmiş vətəndaşlar, həmçinin
Böyük Vətən müharibəsi əlilləri, hərbi xidməti vəzifəsini yerinə
yetirərkən əlil olmuş şəxslər, 20 Yanvar və Çernobıl əlillərinin, Qarabağ
döyüşlərində sağlamlıqlarını torpaq uğrunda itirən Qarabağ əlillərinin
mənzil-məişət şəraitləri yaxşılaşdırılır. Şəhid ailələri və əlillərə mütəmadi
olaraq yeni mənzillər, avtomobillər verilir. Onların müalicəsi üçün
reabilitasiya mərkəzləri açılır və lazım gələndə isə müalicə olunmaq üçün
xarici ölkələrə göndərilirlər. Bir sözlə, əsası Ulu Öndər
Heydər Əliyev tərəfindən qoyulan yüksək dövlət qayğısının onun layiqli
davamçısı İlham Əliyev tərəfindən uğurla davam etdirildiyini bir daha diqqətə
çatdırıb.
İcra başçısı bu gün Qarabağ
müharibəsi əlillərinə, şəhid ailələrinə, veteranlarına Azərbaycan
Respublikasının Birinci vitse-prezidenti Mehriban Əliyeva tərəfindən də yüksək
diqqət və qayğı göstərildiyini bildirib. Məhz bu il aprelin 3-də Heydər Əliyev
Fondu tərəfindən yüksək texnologiyalı protezlərlə təmin olunan hərbçilərlə
keçirilən görüşdə Mehriban xanımın şəxsən iştirak etməsini, hərbçilərlə səmimi
şəkildə görüşməsini göstərilən qayğının və ən yüksək insani keyfiyyətin bariz
nümunəsi kimi qiymətləndirib. Rayon rəhbəri bildirib ki, aprelin 3-də Qarabağ qaziləri ilə keçirilən səmimi görüşü izləyən hər kəs bir
daha əmin oldu ki, ölkə prezidenti İlham Əliyev və Heydər Əliyev Fondunun
prezidenti, Birinci vitse-prezident Mehriban Əliyeva hər zaman sizlərə dəstək
olur, diqqət və qayğı ilə yanaşır. Həmin görüş onu sübut etdi ki, dövlət və
dövlət başçısı harda imtiyazlı ailələr, ehtiyacı olan insanlar varsa onların,
eləcə də sizin kimi Vətən torpaqlarının azadlığı uğrunda sağlamlığını itirən
mərd və igid oğulların arxasında, yanında dayanır. "Hər zaman çalışmışam ki,
atdığım addım Siz qazaxlıların başını uca etsin”, - deyən rayon rəhbəri
fəaliyyətə başladığı ilk gündən bu meyarı hər zaman ön planda tutduğunu
vurğulayıb. "Bu millət, xalq, torpaq uğrunda döyüşən və sağlamlıqlarını
itirərək əlil olan hər bir Qarabağ müharibəsi əlilinin yaxşı yaşamağa haqqı
var”, - deyən icra başçısı son illər Qazaxda bu təbəqədən olan insanların
mənzil-məişət şəraitinin yaxşılaşdırılması istiqamətində görülən işlərdən də
söz açıb. Qeyd edib ki, bu gün Qazaxda ev növbəsində 190 nəfər Qarabağ müharibəsi
əlili və şəhid ailəsi dayanıb ki, onlardan 16 nəfəri üçün təkcə 2019-cu ildə ev
tikilib. Hazırda son tamamlanma işləri görülür. Rayon rəhbəri digər Qarabağ
müharibəsi əlillərinin və şəhid ailələrinin evlə təmin olunması ilə bağlı
dövlət tərəfindən uğurlu addımlar atılacağını qeyd edib. Zamanla onların da ev məsələsinin
öz müsbət həllini tapacağını əminliklə söyləyib. Bundan əlavə, Qazaxbəyli kəndində
məcburi köçkünlər üçün salınmış yeni qəsəbədə daha 304 məcburi köçkün ailəsi
üçün yeni yaşayış binalarının tikintisinin nəzərdə tutulduğunu diqqətə
çatdırıb.
"Azərbaycan Qarabağ
Müharibəsi Əlilləri, Veteranları və Şəhid Ailələri” İctimai Birliyinin Qazax
rayon şöbəsinin sədri Xasay Balayev, sədr müavini, I qrup
Qarabağ müharibəsi əlili Namiq Alıyev, Qarabağ müharibəsi
veteranlarından və əlillərindən Rəhman Rüstəmov, Vaqif Xanbabayev, Nüsət
Musayev, Qəzənfər Əliyev, Rəşad Qocayev və başqaları da çıxış edərək əvvəlcə
ölkə başçısı İlham Əliyevi doğum günü münasibətilə səmimi qəlbdən təbrik edib,
müstəqil Azərbaycanın daha da çiçəklənməsi naminə ona gələcək fəaliyyətində
uğurlar arzulayıblar. Bugünkü görüşə görə minnətdarlıqlarını
bildirən Qarabağ qaziləri qeyd ediblər ki, sizin hər dəfə bizlərlə görüşməyiniz
bizi çox sevindirir. Çünki biz bu qayğını siz gələn ilk gündən hiss etmişik. Bu
gün də fəxr edirik ki, sizin bizlərə olan qayğınız, səmimi münasibətiniz necə
vardısa, elə də davam edir. Sizin hər gəlişiniz bizim qayğılarımızın həlli deməkdir.
Bu gün biz qazilər rayon rəhbəri ilə deyil, sanki öz doğmamızla, qardaşımızla
görüşüb, söhbət edirik. Çünki bu səmimiyyəti siz yaratmısınız. Bu gün əlamətdar
bayramlar münasibətilə bizimlə görüşməyiniz bunu bir daha sübut etdi. Bu görüş
bir daha göstərdi ki, biz hər zaman sizə arxalana bilərik, necə ki, indi də
özümüzə arxa bilirik. Bu gün biz qazilər ona görə sevinirik ki, ölkə başçısının
bizlərə olan qayğısını sizin timsalınızda hər an hiss edirik. Biz qazilər bu günlərdə sizin
Qarabağ əlillərinə olan daha bir diqqət və qayğınızın şahidi olduq. Sizin
Qarabağ qazisi İlyas Süleymanovun müalicəsinə etdiyiniz köməklik bir daha sübut
etdi ki, İlyas kimi qazilərimiz tək deyil. Onun arxasında dayanan dövlətimiz,
ölkə başçımız və sizin kimi rəhbərimiz var. Ən əsası da biz qazilər döyüş
yolumuza nəzər salarkən bir daha qürur hissi keçiririk ki, nə yaxşı bizlər
Vətən yolunda xidməti vəzifəmizi layiqincə yerinə yetirə bilmişik. Həmin qürur
hissini isə bizlərə yenə də dövlətimiz, dövlət başçımız, Birinci
vitse-prezidentimiz və sizin kimi rəhbərimiz yaşadır. Qazax Rayon İcra
Hakimiyyətinin başçısı Rəcəb Babaşov görüşə yekun vuraraq istər dövlət, istərsə
də rayon rəhbərliyi tərəfindən onlara göstərilən diqqət və qayğının bundan
sonra da yüksək səviyyədə olacağını bildirib.
GOYEZEN.AZ
Facebook-da paylaş