• Təqvim

  • Unutma

  • Maraq



Əlillər, şəhid ailələri və veteranlara dövlət qayğısı davamlı olaraq artır


Bu gün tam əminliklə deyə bilərik ki, müharibə şəraiti davam etsə də Azərbaycan qüdrətli dövlətə çevrilmişdir. Prezident İlham Əliyevin yürütdüyü məqsədyönlü, qətiyyətli daxili və xarici siyasət nəticəsində Azərbaycan dünyanın inkişaf edən ölkələri sırasına qoşulmuşdur. Bu gün müstəqil Azərbaycan dövləti məcburi köçkünlərə, şəhid ailələrinə, müharibədə fiziki sağlamlığını itirən şəxslərin ailələrinə xüsusi diqqət ayırır. Azərbaycanda məcburi köçkün ailələri üçün yeni qəsəbələr salınır. Fiziki sağlamlığını itirən müharibə əlilləri üçün hər cür lazımi şərait yaradılır. Hər keçən gün qanunlara edilən mütərəqqi dəyişikliklərlə Azərbaycanın ərazi bütövlüyünün müdafiəsi zamanı döyüşlərdə fiziki sağlamlığını itirmiş vətəndaşlar, həmçinin Böyük Vətən müharibəsi əlilləri, hərbi xidməti vəzifəsini yerinə yetirərkən əlil olmuş şəxslər, 20 Yanvar və Çernobıl əlillərinin, Qarabağ döyüşlərində sağlamlıqlarını torpaq uğrunda itirən Qarabağ əlillərinin mənzil-məişət şəraitləri yaxşılaşdırılır. Şəhid ailələri və əlillərə mütəmadi olaraq yeni mənzillər, avtomobillər verilir. Onların müalicəsi üçün reabilitasiya mərkəzləri açılır və lazım gələndə isə müalicə olunmaq üçün xarici ölkələrə göndərilirlər. Bir sözlə, dövlətin bu təbəqəyə göstərdiyi qayğı göz önündədir və ilbəil artmaqdadır. Ən əsası isə odur ki, Azərbaycanda Qarabağ müharibəsi əlillərinə, veteranlarına və şəhid ailələrinə göstərilən yüksək dövlət qayğısının əsası ulu öndər Heydər Əliyev tərəfindən qoyulub. Ümummilli liderin bu təbəqədən olan insanlara göstərdiyi qayğı, bu istiqamətdə yürütdüyü dövlət siyasəti onun layiqli davamçısı İlham Əliyev tərəfindən uğurla davam etdirilir. Hər kəsə yaxşı məlumdur ki, dövlət başçısı İlham Əliyevin rəhbərliyi ilə həyata keçirilən siyasətin əsas istiqamətlərini müharibə veteranlarının, əlillərinin, şəhid ailələrinin sosial müdafiəsinin gücləndirilməsi, onların problemlərinin vaxtında həllinə nail olunması, hər cür qayğı ilə əhatə olunması təşkil edir. Ulu öndərin təşəbbüsü ilə 2001-ci ildə "Azərbaycan Qarabağ Müharibəsi Əlilləri, Veteranları və Şəhid Ailələri” İctimai Birliyinin təsis edilməsi bu qəbildən olan insanlara verilən ən böyük dəyərdir. Qarabağ müharibəsi əlillərinin, şəhid ailələrinin və veteranlarının qanuni mənafelərini və hüquqlarını müdafiə etmək, onların müasir həyat şəraitinə uyğunlaşdırılmasına, sosial-iqtisadi və mənəvi probremlərinin daha səmərəli həll olunmasına köməklik göstərmək, onların əməkdaşlığını və qarşılıqlı əlaqələrini möhkəmləndirmək məqsədilə yaradılan birlik dövlətin bu cür insanlara dəstək olması deməkdir.

Bu gün Qarabağ müharibəsi əlillərinə, şəhid ailələrinə, veteranlarına Azərbaycan Respublikasının Birinci vitse-prezidenti Mehriban xanım Əliyeva tərəfindən də yüksək diqqət və qayğı göstərilir. Məhz aprelin 3-də Heydər Əliyev Fondu tərəfindən yüksək texnologiyalı protezlərlə təmin olunan hərbçilərlə keçirilən görüşdə Mehriban xanımın şəxsən iştirak etməsi, hərbçilərlə səmimi şəkildə görüşməsi göstərilən qayğının və ən yüksək insani keyfiyyətin bariz nümunəsidir. Həmin görüşdə "Azərbaycan Qarabağ Müharibəsi Əlilləri, Veteranları və Şəhid Ailələri” İctimai Birliyinin Qazax rayon şöbəsinin üzvləri də iştirak etdilər. Bu gün isə Mehriban xanımın daha bir qayğısının şahidi oluruq. Mehriban xanımın təşəbbüsü ilə Heydər Əliyev Fondu tərəfindən II qrup Qarabağ müharibəsi əlili Bağırov Natiq Rafiq oğluna minik avtomobilinin verilməsi Qarabağ əlillərinə olan qayğının daha bir əyani göstəricisidir.

 

Hər zaman Qarabağ müharibəsi əlillərinin yanında olan, diqqət və qayğısını onlardan əsirgəməyən Qazax Rayon İcra Hakimiyyətinin başçısı Rəcəb Babaşov bu sevincli gündə də onların yanında olub, xoş gün münasibətilə avtomobil hədiyyə olunmuş Qarabağ əlilini təbrik edib.

"Qazilər çay ocağı” evində səmimi söhbət əsasında keçirilən görüşdə icra aparatının məsul işçiləri, qonaqlardan Qərb Ərazi Baş Gömrük İdarəsinin rəis müavini Musa Mirzəli, hüquq-mühafizə orqanlarının rəhbərləri də iştirak ediblər. Qarabağ əlilləri ilə olan görüşdə dövlət və dövlət başçısı tərəfindən müharibə veteranlarına və əlillərinə, şəhid ailələrinə göstərilən qayğıdan bir daha söhbət açılıb.

Qazax Rayon İcra Hakimiyyətinin başçısı Rəcəb Babaşov çıxış edərək avtomobil hədiyyə olunmuş II qrup Qarabağ əlili Natiq Bağırovu təbrik edərək xoş arzularını bildirib.

İcra başçısı qeyd edib ki, ölkə başçısı İlham Əliyev və Birinci vitse-prezident Mehriban xanım Əliyeva tərəfindən Qarabağ əlillərinə hər zaman yüksək səviyyədə dövlət qayğısı olub. Siz qazilər bu qayğını hər an hiss etmisiniz. İstər yeni mənzillərin verilməsi, istər yeni avtomobillərin hədiyyə olunması, istərsə də sosial rifah halınızın yaxşılaşdırılması istiqamətində atılan uğurlu addımlarla həmişə bu qayğının, dövlət dəstəyinin şahidi olmusunuz. Rayon rəhbəri bildirib ki, aprelin 3-də siz Qarabağ qaziləri ilə keçirilən səmimi görüşü izləyən hər kəs bir daha əmin oldu ki, ölkə prezidenti İlham Əliyev və Heydər Əliyev Fondunun prezidenti, Birinci vitse-prezident Mehriban xanım Əliyeva hər zaman sizlərə dəstək olur, diqqət və qayğı ilə yanaşır. Həmin görüş onu sübut etdi ki, dövlət və dövlət başçısı harda imtiyazlı ailələr, ehtiyacı olan insanlar varsa onların, eləcə də sizin kimi Vətən torpaqlarının azadlığı uğrunda sağlamlığını itirən mərd və igid oğulların arxasında, yanında dayanır. 

Rayon rəhbəri bildirib ki, hər kəsə yaxşı məlumdur ki, fəaliyyətə başladığım ilk gündən sizlərə xüsusi qayğı ilə yanaşmışam. Çalışmışam ki, bütün sahələr üzrə sizlərə dəstək olum. Ən əsası da ölkə başçısının istəyinə uyğun olaraq sizlərin hər cür qayğı ilə əhatə olunmanıza nail olaq.

İcra başçısı qeyd edib ki, eşidəndə ki, sizlərdən birinə yeni avtomobil hədiyyə olunub. Özümə borc bildim ki, bu şad gündə yanınızda olum. Şəxsən gəlib təbrik edim və öz arzularımı çatdırım. Çünki sizin kimi insanların hər anına sevinmək, sizinlə birgə şad olmaq hər bir vətəndaşın borcudur. Çünki sizlər bu millət, xalq, torpaq uğrunda öz sağlamlığınızı qurban vermisiniz. Necə ki, şəhidlərimiz öz canlarını fəda ediblər, sizlər də sağlamlığınızı fəda etmisiniz. Odur ki, sizin kimi insanlara olan qayğı hər zaman yüksək səviyyədə olmalıdır.

"Azərbaycan Qarabağ Müharibəsi Əlilləri, Veteranları və Şəhid Ailələri” İctimai Birliyinin Qazax rayon şöbəsinin sədr müavini, I qrup Qarabağ müharibəsi əlili Namiq Alıyev çıxış edərək ictimai birliyin sədri, II qrup Qarabağ müharibəsi əlili Kamandar Məmmədovun adından rayon rəhbərini salamlayıb, bugünkü görüşə görə minnətdarlığını bildirib. Qeyd edib ki, sizin hər dəfə bizlərlə görüşməyiniz bizi çox sevindirir. Çünki biz bu qayğını siz gələn ilk gündən hiss etmişik. Bu gün də fəxr edirik ki, sizin bizlərə olan qayğınız, səmimi münasibətiniz necə vardısa, elə də davam edir. Sizin hər gəlişiniz bizim qayğılarımızın həlli deməkdir. Bu gün biz qazilər rayon rəhbəri ilə deyil, sanki öz doğma insanımızla, qardaşımızla görüşüb, söhbət edirik. Çünki bu səmimiyyəti siz yaratmısınız. Bu gün şad xəbərimizə şərik olmağınız da bunu bir daha sübut etdi. Bu görüş bir daha göstərdi ki, biz hər zaman sizə arxalana bilərik, necə ki, indi də özümüzə arxa bilirik. Bu gün biz qazilər ona görə sevinirik ki, ölkə başçısının bizlərə olan qayğısını sizin timsalınızda hər an hiss edirik.

İctimai Birliyinin sədr müavini Xasay BalayevQarabağ əlillərindən Nüsət Musayev, Qəzənfər Əliyev, Ceyhun Rəhimov, Rəşad Qocayev, Hüseyn Yunusov və başqaları da çıxış edərək bildiriblər ki, biz qazilər döyüş yolumuza nəzər salarkən bir daha qürur hissi keçiririk ki, nə yaxşı bizlər Vətən yolunda xidməti vəzifəmizi layiqincə yerinə yetirə bilmişik. Həmin qürur hissini isə bizlərə yenə də dövlətimiz və dövlət başçımız, Birinci vitse-prezidentimiz yaşadır. Onların biz qazilər, döyüşçülər haqqında söylədiyi dəyərli fikirlər bizi bir daha əmin edir ki, bizim arxamızda güclü dövlətimiz və Ali Baş Komandanımız dayanıb.  Çıxış edənlər onlara göstərilən diqqət və qayğıya görə ölkə başçısına, Birinci vitse-prezidentə bir daha dərin minnətdarlıqlarını bildiriblər.


II qrup Qarabağ əlili Natiq Bağırov çıxış edərək əvvəlcə ona göstərilən yüksək qayğıya görə ölkə başçısına və birinci xanıma sonsuz təşəkkürünü çatdırıb. Qeyd edib ki, 2009-cu ildə 2 otaqlı evlə təmin olundum. Bu gün isə yeni minik avtomobili ilə təmin edildim. Bu, biz Qarabağ əlillərinə ayrılan diqqəti, qayğını bir daha nümayiş etdirdi. Mən və mənim kimi minlərlə insan bu qayğını həmişə hiss edir. Bu, isə o deməkdir ki, istər ölkə rəhbəri, istərsə də birinci xanım bizim kimi insanları daim diqqət mərkəzində saxlayır. Bu gün mən sevinirəm ki, ölkə başçısının qayğısı ilə yanaşı, siz rayon rəhbərinin qayğısı ilə də əhatə olunmuşam. Bu gün bu sevincli gündə məni təbrik üçün gəlməyiniz, hər zaman dəstək olmağınız, məni narahat edən hər hansı bir məsələ ilə bağlı yaxından maraqlanmağınız ölkə rəhbərinin bizə olan qayğısının siz tərəfdən davam etdirilməsi deməkdir. Bu, isə biz Qarabağ əlillərini çox sevindirir və bizə yaşamaq, qurub-yaratmaq eşqi verir.

Sonra rayon rəhbəri Natiq Bağırovu bir daha təbrik edərək avtomobilin açarını ona təqdim edib.

Qazax Rayon İcra Hakimiyyətinin başçısı Rəcəb Babaşov görüşə yekun vuraraq istər dövlət, istərsə də rayon rəhbərliyi tərəfindən onlara göstərilən diqqət və qayğının bundan sonra da yüksək səviyyədə olacağını bildirib. Bu cür görüşlərin mütəmadi olaraq keçiriləcəyini qeyd edib.







GOYEZEN.AZ



Facebook-da paylaş