İcra başçısı çiyələk yetişdirilən sahədə sadə kəndlilərlə görüşüb
Bu gün hər kəsə yaxşı məlumdur ki, Azərbaycanda neft
sektoru ilə yanaşı, qeyri-neft sektorunun, xüsusilə də kənd təsərrüfatının
inkişaf etdirilməsi dövlət siyasətinin ən prioritet istiqamətlərindən birini
təşkil edir. Son illər respublikamızda kənd təsərrüfatının inkişafı
istiqamətində həyata keçirilən məqsədyönlü tədbirlər, sahibkarlara, sadə
fermerlərə göstərilən diqqət və qayğı, bu sektorda çalışan insanlar üçün geniş
imkanların açılması bunun bariz nümunəsidir. Məhz dövlət tərəfindən verilən
dəstək sayəsində kənd təsərrüfatı ilə məşğul olan fermerlər öz əkin sahələrini
genişləndirməyə, aqrar sektorda böyük çəkiyə malik olan bu sahənin inkişaf
etməsi üçün öz töhfələrini verməyə çalışırlar. Respublikamızın hər yerində
olduğu kimi, Qazax rayonunda da ölkə iqtisadiyyatında neft və tikinti sahələrindən sonra üçüncü ən iri sahə olan, iş
yerləri ilə təminatda böyük pay sahibi sayılan kənd təsərrüfatının inkişaf
etdirilməsi üçün məqsədyönlü tədbirlər həyata keçirilir. Son 3 ildə rayon rəhbərliyi tərəfindən
bu sahəyə göstərilən diqqət və qayğının, sahibkarlara, sadə kənd adamlarına
olan səmimi münasibətin nəticəsidir ki, Qazaxda əkin sahələri ildən-ilə
genişləndirilir. İstər dövlət başçısı İlham Əliyevin, istərsə də Rayon İcra
Hakimiyyətinin başçısı Rəcəb Babaşovun qayğısını hər an hiss edən sahibkarlar,
sadə kənd sakinləri, təsərrüfat sahibləri əkin sahələri ilə yanaşı,
istixanaların da sayını getdikcə artırır. Yeni iş yerlərinin yaradılması,
əhalinin maddi rifah halının yaxşılaşdırılması istiqamətində məqsədyönlü
addımlar atır, yeni layihələr üzərində çalışırlar. Hər an dövlətin, rayon
rəhbərliyinin qayğısını hiss edən təsərrüfat sahiblərindən biri də şəhər sakini Aşırov Nüsrət Kərim oğludur. Ötən
yazımızda onun Qazaxda ilk dəfə olaraq yeni üsulla yetişdirilən çiyələk sahəsi
salması barədə məlumat vermişdik. Artıq demək olar ki, təsərrüfat rəhbəri öz
istəyinə nail olub. Belə ki, çəkdiyi zəhmətin bəhrəsini görür. Bu gün Qazax Rayon İcra Hakimiyyətinin başçısı Rəcəb
Babaşov N.Aşırovun yeni yaratdığı həmin çiyələk sahəsində olub, görülmüş işlərlə
maraqlanıb.
Çiyələk
sahəsi haqqında məlumat verən təsərrüfat rəhbəri birinci
ildir ki, ilk dəfə olaraq çiyələk becərmək qərarına gəldiyini və Çaylı kəndi ərasizində 4
hektar sahədə çiyələk sahəsi saldığını bildirib. Söhbət zamanı o, bu gün istehlakçıların ən çox maraq göstərdiyi
giləmeyvələrdən biri olan çiyələyin dünya bazarında xüsusi yeri olduğunu da qeyd
edib. Məhsuldarlığı
daha yüksək, saxlama müddəti çox, süfrəlik və mürəbbəlik olan İspaniyadan gətirilən
"Albion” sortu becərildiyini söyləyib. N.Aşırov çiyələk şitillərinin ötən
ilin avqust ayında əkildiyini, 1 hektara təxminən 50-55 min ədəd şitil
köçürüldüyünü vurğulayıb. Əkilən şitillərin 4 il məhsul vermək qabiliyyətinə
malik olduğunu, 1 şitildən birinci il 700-800 qram məhsul götürüldüyünü, ikinci
il isə məhsulun 1 kq-dan çox təşkil etdiyini diqqətə çatdırıb. Təsərrüfat
sahibi yüksək məhsuldarlıq əldə etmək üçün bütün aqrotexniki qaydalara əməl
olunduğunu və xüsusi qulluq göstərildiyini vurğulayıb. Çiyələyin becərmə texnologiyası haqqında məlumat verən N.Aşırov
bildirib ki, çiyələk əkilən sahələrdə işlər ilboyu aparılır. Əvvəlcə torpaq əkinə
hazırlanır, peyin verilir. Suvarma damcı üsulu ilə aparılır. Bu üsulla suya qənaət
edilir, su bitkilər arasında bərabər paylanır, torpaq qaysaqlamır, yumşaq qalır,
alaq otlarının azalmasına, məhsuldarlığın yüksəlməsinə nail olunur. Onun sözlərinə
görə zərərvericilərə və xəstəliklərə qarşı mübarizə tədbirləri də vaxtında
aparılmalıdır. Təsərrüfat rəhbəri qeyd edib ki, bu çiyələk sortunun
üstün cəhətlərindən biri də odur ki, ilin bütün fəsillərində məhsul götürmək
olur. Aprel ayından çiyələk dəriminə başlanıldığını bildirən N.Aşırov hava
şəraiti yaxşı olarsa, dərimin noyabr ayına kimi davam edəcəyini qeyd edib.
Demək olar ki, hər gün sahədən 250-300 kq çiyələk dərildiyini, dərim zamanı isə
20 nəfərə yaxın işçinin çalışdığını vurğulayıb. Bazarda alıcılıq qabiliyyətinin
də yaxşı olmasından razılığını bildirən təsərrüfat sahibi gələcəkdə bu sahəni
daha da genişləndirməyi planlaşdırır. Sahədə çalışan sadə
kəndlilərlə görüşən rayon rəhbəri onların fikirlərini öyrənib, onlara olan
diqqət və qayğı ilə də maraqlanıb. İşçilər rayonda təsərrüfat adamlarına
yaradılan şəraitdən, onlar üçün açılan geniş imkanlardan razılıqlarını
bildiriblər. Qeyd ediblər ki, bu gün dövlət tərəfindən sahibkarlara göstərilən
diqqət və qayığının nəticəsidir ki, onlar yeni iş yerləri açır və bizim kimi
xeyli sayda insan da gəlib həmin təsərrüfatlarda çalışır. Onlarla olan bugünkü
görüşü minnətdarlıq hissi ilə qarşılayan sadə insanlar bu cür görüşlərin hər
bir təsərrüfat sahibinə, bu sahədə çalışan insanlara böyük stimul, güc
verdiyini qeyd ediblər. Bu cür görüşləri onlara olan diqqət və qayğının bariz
nümunəsi kimi dəyərləndiriblər. Təsərrüfat adamlarına yaradılan şəraitə,
göstərilən qayğıya görə ölkə başçısına və rayon rəhbərliyinə minnətdarlıqlarını
bildiriblər. Sonra rayon rəhbəri pomidor
əkilmiş istixanadakı mövcud vəziyyətlə də tanış olub. Dövlət tərəfindən
sahibkarlara göstərilən diqqət və qayğının bundan sonra da yüksək səviyyədə
olacağını qeyd edib. Rayon rəhbəri olaraq hər zaman sahibkarların yanında
olacağını, hər cür dəstək verməyə hazır olduğunu bildirib. Hər iki təsərrüfatda görülən işlərlə tanış olan rayon rəhbəri öz
tapşırıq və tövsiyələrini verib, gələcək işlərində ona uğurlar arzulayıb.
GOYEZEN.AZ
Facebook-da paylaş