Qazaxda kartof əkini ilə məşğul olan sahibkarlarla görüş keçirilib
Hər bir ölkənin iqtisadi
sabitliyinin və sosial dayanıqlılığının başlıca şərti etibarlı ərzaq təminatının
olmasıdır. Bu baxımdan Azərbaycan dövləti əhalinin ərzaqla etibarlı təminatına
dair tədbirlər həyata keçirməkdə davam edir. Belə ki, ölkədə ərzaq
təhlükəsizliyinin birbaşa asılı olduğu aqrar sahənin inkişafına yönələn
irimiqyaslı dövlət proqramları həyata keçirilməkdədir. Hər kəsə yaxşı məlumdur
ki, son 15 ildə ölkə başçısı İlham Əliyevin rəhbərliyi altında Azərbaycan
iqtisadiyyatının ayrılmaz hissəsi olan kənd təsərrüfatı sürətlə inkişaf edir.
Azərbaycan iqtisadiyyatında
neft və tikinti sahələrindən sonra üçüncü ən iri sahə olan kənd təsərrüfatının
inkişaf etməsi üçün məqsədyönlü işlər görülür. İş yerləri ilə təminatda ən
böyük pay sahibi olan bu sahənin inkişaf etməsi üçün sahibkarlara, kənd
təsərrüfatı ilə məşğul olan hər bir sadə insana daim göstərilən dövlət
qayğısının nəticəsidir ki, əkin sahələrinin hektarı ildən-ilə artır.
Son dövrlər dövlət tərəfindən
qeyri-neft sektorunun əsas sahələrindən biri olan kənd təsərrüfatına olan qayğı
respublikamızın hər yerində olduğu kimi, Qazaxda da artırılıb. Məhz bu qayğının nəticəsidir ki, rayonda əkin sahələrinin miqdarı ildən-ilə
genişləndirilir. Bunu rayonda artırılan əkin sahələrinin müqayisəsindən da
aydın şəkildə görmək olar. Belə ki, 2016-cı ildə 16520,6 hektarda, 2017-ci
ildə 18694,37 hektarda əkin aparılmışdısa, 2018-ci ildə bu rəqəm 20682 hektar
olmuşdur. 2019-cu ildə isə 21481,30 hektarda əkin işlərinin aparılması nəzərdə
tutulmuşdur.
Bu gün Qazaxda mətbəximizdə istifadə etdiyimiz və çörəkdən sonra ən
çox ehtiyac duyulan qida növü kimi kartofun da əkin sahələri genişləndirilir. Fermerlər
tərəfindən kartofçuluğun inkişafına böyük maraq göstərilir. Bunu hər il
rayonda kartof sahələrinin genişləndirilməsi bir daha sübut edir.
2016-cı ildə rayonda 433 kektar sahədə kartof
əkilmişdisə, 2017-ci ildə bu rəqəm 809,1 hektara çatdırılmışdır. 376,1 hektar
artıq sahədə kartof becərən kəndlilər bu il də kənd təsərrüfatının başqa sahələrində
olduğu kimi, kartofçuluqda nümunəvi işlər görmüşlər. Kartof becərən
sakinlər bu sahənin gəlirli olduğunu nəzərə alaraq 2018-ci ildə əkin sahələrini
daha da genişləndirərək 1118 hektara çatdırmışlar. Bu da ötən illə müqayisədə
308,9 hektar çoxdur. İldən-ilə kartof sahələrini genişləndirən qazaxlı
sahibkarlar, sadə kəndlilər 2019-cu ildə də kartof sahələrini genişləndirməyi
düşünürlər. Belə ki, bu il ötən ilə nisbətən əkin sahəsinin 82 hektar artırılaraq
1200 hektara çatdırılması nəzərdə tutulmuşdur.
Bu gün Qazax Rayon İcra Hakimiyyətində
kartof əkini ilə məşğul olan bir qrup sahibkarlarla görüş keçirilib.
Rayon İcra Hakimiyyəti başçısının
birinci müavini Məmməd Alıyev çıxış edərək qeyd edib ki, bu gün istər dövlət, istərsə də rayon rəhbərliyi
tərəfindən sadə kəndlilərə verilən dəstək, göstərilən diqqət və qayğı onlarda
böyük ruh yüksəkliyi yaradır. Daha çox məhsul istehsal etməyə sövq edir. Müavin
bildirib ki, ildən-ilə əkin sahələrinin artırılması eyni zamanda əhalinin məşğulluğunun
təmin olunması və maddi rifah halının yaxşılaşdırılması deməkdir.
Sahibkarlarla keçirilən görüşdə bu il kartof əkiləcək
sahələrin mövcud vəziyyəti də müzakirə olunub. Əkin aparılması üçün istər
toxumun alınmasında, istər mineral gübrələrin verilməsində, istərsə də texnika
ilə təminatda heç bir problemin olmadığı diqqətə çatdırılıb. Ötən il olduğu
kimi, bu il də əkin sahələrinin suvarma suyu ilə təmin olunması üçün lazımi
hazırlıq işlərinin görüldüyü, bununla bağlı rayonda olan arx və kanallarda təmizlik
işlərinin aparıldığı qeyd olunub.
Təklif və istəklərini bildirən sahibkarlar
respublikamızda, eləcə də bölgələrimizdə kənd təsərrüfatının inkişaf etdirilməsinə
görə ölkə başçısı İlham Əliyevə minnətdarlıqlarını bildiriblər. Rayon rəhbərliyinin
verdiyi dəstəyi yüksək qiymətləndirən sahibkarlar bundan sonra da əkin sahələrinin
genişləndirilməsi üçün daha böyük səylə çalışacaqlarını vurğulayıblar. Hər
zaman olduğu kimi, bu il də əkiləcək kartof sahələrinin rayonda sakinlərin işlə
təmin olunmasında böyük rol oynayacağını qeyd ediblər.
GOYEZEN.AZ
Facebook-da paylaş