Qazaxda şəhid ailələri və Qarabağ müharibəsi əlilləri üçün bayram süfrəsi açılıb
Azərbaycanın suverenliyi, ərazi bütövlüyü uğrunda canlarından və
qanlarından keçərək şəhidlik zirvəsinə ucalanların xatirəsi hər zaman yüksək
tutulur. Respublikamızda şəhid ailələrinə göstərilən yüksək diqqət və qayğı
özünü Qazax rayonunda da göstərməkdədir. Bu gün düşmənlə 168 km sərhəddi olan, 5 kəndi daim
mənfur düşmən gülləsinin atəşinə məruz qalan, Bağanıs Ayrım, Xeyrımlı,
Barxudarlı, Sofulu, Qızılhacılı, Yuxarı Əskipara və Aşağı Əskipara kimi 7 kəndi hələ də düşmən tapdağı
altında olan Qazax rayonu da yüzlərlə şəhid verib. Bu gün Qazaxın Vətən uğrunda
canından keçən 285 nəfər şəhidi var ki, onlardan 7 nəfər igid oğlu Azərbaycanın
Milli Qəhrəmanı adına layiq görülüb.Bütün respublikamızda olduğu kimi, Qazax rayonunda şəhid ailələri dövlət
təminatı ilə əhatə olunub, qanunvericilikdə şəhid ailələri üçün nəzərdə
tutulmuş bütün güzəşt və imtiyazlardan istifadə edirlər. Rayonun bütün idarə,
müəssisə və təşkilatlarında şəhid ailələrinə hər zaman diqqətlə, ehtiramla
yanaşılır. Rayonumuzda
hər bayram və əziz günlərdə olduğu kimi, Novruz bayramında da şəhid ailələri
unudulmayıb, onlar üçün bayram süfrəsi açılıb. Həmin ənənə bu il də davam etdirilib. Qazax
Rayon İcra Hakimiyyəti tərəfindən Birinci Şıxlı kəndindəki "Lalə” şadlıq evində
şəhid ailələri və Qarabağ müharibəsi əlilləri üçün təşkil olunmuş bayram tədbirində
şəhidlərin yaxınları və doğmaları iştirak edib. Tədbirdə
öncə torpaqlarımız uğrunda canlarından keçən Vətən oğul və qızlarının ruhlarına
fatihə surəsi oxunub.
Qazax
Rayon İcra Hakimiyyətinin başçısı Rəcəb Babaşov bayram tədbirini giriş sözü ilə
açaraq şəhid ailələri və Qarabağ müharibəsi əlillərini Novruz bayramı
münasibətilə səmimi qəlbdən təbrik edib, onlara ən xoş arzularını bildirərək
bol ruzi və bərəkət arzulayıb. İcra
başçısı dövlət və ölkə rəhbəri tərəfindən şəhid ailələrinə göstərilən diqqət və
qayğıdan söz açıb. Bu istiqamətdə imzalanan Sərəncam və Fərmanlardan danışıb. Qeyd edib ki, ölkə prezidentinin Azərbaycan
Respublikasının ərazi bütövlüyü uğrunda həlak olmuş, ölmüş və hərbi
əməliyyatlarla əlaqədar xəbərsiz itkin düşdüyünə görə ölmüş elan edilmiş hərbi
qulluqçuların ailə üzvlərinin sosial müdafiəsinin yaxşılaşdırılması ilə bağlı
əlavə tədbirlər haqqında imzaladığı 19 aprel 2018-ci il tarixli Fərmanı şəhid
ailələrinə olan qayğı deməkdir. Ölkə başçısı bu Fərmanı ilə bir daha sübut etdi
ki, şəhid ailələrinin maddi rifah halının yaxşılaşdırılmasını hər şeydən üstün
tutur. Rayon rəhbəri dövlət başçısının birdəfəlik ödəmə ilə bağlı
Fərmana dəyişiklik etməsini və 11 min manat məbləğində birdəfəlik ödəmənin
bütün şəhid ailələrinə şamil edilməsini şəhidlərimizin ailələrinə olan hörmət
və ehtiramın əyani sübutu olduğunu bildirib. Vurğulayıb ki, bundan əlavə, şəhid
ailəsi üçün Azərbaycan Respublikası Prezidentinin təqaüdünün artırılması
haqqında Respublika Prezidentinin Fərmanına əsasən həmin təqaüdün məbləğinin
242 manatdan 300 manata çatdırılması, eyni zamanda, şəhid ailələrinin
mənzillərlə təmin olunması istiqamətində də məqsədyönlü işlərin görülməsi, şəhidlərimizə
və onların ailə üzvlərinə dövlət tərəfindən göstərilən diqqət və qayğının bariz
nümunəsidir.
Rayon
rəhbəri qeyd edib ki, fəaliyyətə başladığım ilk gündən demişəm ki,
şəhidlərimizin ruhu mənim üçün hər zaman əzizdir. Onların ailəsi mənim öz doğma
ailəmdir. Bu gün biz azad və suveren bir ölkədə yaşayırıqsa, bu, şəhidlərimizin
şücaəti sayəsindədir. Biz hər şeyə görə onlara borcluyuq. Onlar bizim aramızda
olmasalar da, hər zaman bizim qəlbimizdə əbədi olaraq yaşayırlar. Şəhidlərimizin
adını uca tutmaq, əbədiləşdirmək, onların yaxınlarına, doğmalarına, ailə
üzvlərinə diqqət və qayğı göstərmək isə bizim hər birimizin vətəndaşlıq
borcumuz, ən əsas vəzifəmizdir. Çünki onlar bu millət, bu torpaq uğrunda canlarından
keçiblər. İcra
başçısı Qarabağ müharibəsi əlilləri və veteranlarına da həmişə diqqət və qayğı
göstərdiyini, onlar üçün əlindən gələni əsirgəmədiyini, qaldırdıqları
məsələlərə həssaslıqla yanaşdığını qeyd edib. Bildirib ki, şəhid ailələri kimi
rayonumuzda yaşayan müharibə əlilləri və veteranları da dövlət qayğısı ilə tam
təmin olunub. Rəcəb Babaşov çıxışının sonunda bütün şəhidlərimizə Allahdan
rəhmət diləyərək onların ailə üzvlərini bir daha bayram münasibətilə təbrik
edib, ən xoş arzularını bildirib. Sonra
Rəcəb Babaşov bir-bir stollara yaxınlaşaraq şəhid ailələrinin üzvləri və
Qarabağ müharibəsi əlilləri ilə görüşüb, onların bayramlarını təbrik edib.
Tədbirdə
şəhid atası Sarı Hüseynov və şəhid anası Tamella Süleymanova çıxış edərək hər
zaman onlara diqqət və qayğı göstərdiyinə görə Prezident İlham Əliyevə şəhid
ailələri adından öz dərin minnətdarlıqlarını bildiriblər. Onların problemləri
ilə yaxından maraqlandığına, bu bayram günlərində onları yaddan çıxartmayaraq
bayram süfrəsi ətrafında bir yerə topladığına və öz qayğısını onların üstündən
heç zaman əsirgəmədiyinə görə Rayon İcra Hakimiyyətinin başçısı Rəcəb Babaşova
səmimi ürək sözlərini söyləyib, təşəkkürlərini çatdırıblar. Qeyd ediblər ki,
biz təkcə bu gün deyil, hər zaman arxamızda bir güc, bir qüvvə hiss etmişik.
Bizlərə həm ata, həm qardaş, həm də oğul hissini yaşatmısınız. Buna görə biz
şəhid doğmaları sizə uzun ömür və cansağlığı, bundan sonrakı gələcək
işlərinizdə uğurlar arzu edirik. Şəhər
1 saylı tam orta məktəbin direktoru Bəsdi Ələkbərova, "Azərbaycan Qarabağ Müharibəsi Əlilləri, Veteranları və Şəhid
Ailələri” İctimai Birliyinin Qazax rayon şöbəsinin sədr müavini, I qrup Qarabağ müharibəsi əlili
Namiq Alıyev, Qazax Gənclər Mərkəzinin direktoru İsmayıl Süleymanov çıxış
edərək Prezident İlham Əliyevin, Birinci
vitse-prezident Mehriban xanım Əliyevanın şəhid ailələrinin sosial müdafiəsinin
gücləndirilməsi, mənzil məişət şəraitlərinin yaxşılaşdırılması istiqamətində
həyata keçirdiyi işlərdən söz açıblar. Respublika Prezidenti İlham
Əliyev tərəfindən şəhid ailələrinə göstərilən diqqət və qayğıya görə sonsuz
təşəkkürlərini ifadə ediblər. Rayon rəhbərliyi tərəfindən hər il təşkil olunan
bayram tədbirini yüksək qiymətləndirərək Rayon İcra Hakimiyyətinin başçsı Rəcəb
Babaşova bütün rayon sakinləri adından öz dərin minnətdarlıqlarını bildiriblər. Tədbirdə
iştirak edən gənclərdən Bakı Dövlət Universiteti Qazax filialının tələbələri
Fəridə İsgəndərova və Səbinə Camalova, Qazax Dövlət Sosial-İqtisadi Kollecin tələbəsi
Cavid Nağızadə çıxış edərək Qazax rayonunda
Azərbaycanın suverenliyi, ərazi bütövlüyü uğrunda canlarından keçərək şəhidlik
zirvəsinə yüksəlmiş insanların şərəfli ömür yolunun gənclər üçün örnək olduğunu
bildiriblər. Qeyd ediblər ki, hər bir Azərbaycan vətəndaşı, o cümlədən də biz
gənclər öz şəhidlərimizi tanımalı, onların keçdiyi həyat yolunu öyrənməliyik. Vurğulayıblar ki, bu gün biz gənclər rahat şəkildə yaşayırıqsa,
azad və firəvan bir ölkənin vətəndaşıyıqsa, bu, siz qəhrəman şəhid analarının Vətən
üçün böyütdüyü igid, qəhrəman oğulların şəhidliyi sayəsində mümkün olmuşdur. Biz
gənclər bu gün uca və ali zirvəyə - şəhidlik zirvəsinə yüksələn şəhidlərimizlə
qürur duyuruq. Hər zaman onların müqəddəsliyi, ruhları qarşısında baş əyirik.
Çünki şəhidlər bizim keçmişimizlə gələcəyimizi bizlərə bağışlayan və üçrəngli
Azərbaycan bayrağını biz gənclərə əmanət edən dəyərli şəxslərdir. Onları yad
etmək, xatirələrini əziz tutmaq biz gənclərin ən ümdə vəzifəsidir. Bu gün biz
gənclərin üzərinə elə bir vəzifə düşür ki, onu yerinə yetirməli, ölkə başçısı
İlham Əliyevin ətrafında sıx birləşərək Vətəni bizlərə əmanət edən
şəhidlərimizin qisasını almalıyıq. Ali Baş Komandanın əmrinə hər an hazır
dayanan müsəlləh əsgərlər olmalıyıq. Bayram şənliyi aşıqlardan Camoy Qurbanovun, Saqif Məzəmlinin, Yaşar
Gülümcanovun, Şahin Süleymanovun, gənc müğənni Nəsimi Aşbazovun ifasında səslənən
bir-birindən şən-şux musiqi sədaları altında davam edib. GOYEZEN.AZ
Qazax Rayon İcra Hakimiyyətinin başçısı Rəcəb Babaşov da mütəmadi olaraq Milli
Qəhrəmanların və şəhidlərin ailə üzvləri ilə görüşlər keçirir, onların
problemlərini dinləyir, əlamətdar günlərdə, Ramazan bayramı, Qurban bayramı,
Yeni il və Novruz bayramlarında bu kateqoriyadan olan insanlara baş çəkir,
mənəvi köməklik göstərir.
Facebook-da paylaş