Kosalar kəndində 2018-ci ildə görülmüş işlərə dair hesabat yığıncağı keçirilib
Qazax Rayon İcra Hakimiyyəti başçısının Kosalar kənd İnzibati Ərazi Dairəsi
üzrə nümayəndəliyində 2018-ci ildə görülmüş işlər və qarşıda duran vəzifələrə
dair hesabat yığıncağı keçirilib. Hesabat yığıncağında Qazax Rayon İcra Hakimiyyəti başçısının birinci
müavini Məmməd Alıyev, aparatın Sənədlərlə
və vətəndaşların müraciətləri ilə iş şöbəsinin müdiri Gündüz Abışov, kənd
sakinləri iştirak ediblər. Yığıncağı aparmaq
üçün sədr və katib seçildikdən sonra gündəlikdə duran məsələlər barədə məlumat
verilib. Kosalar kənd İƏD-si üzrə nümayəndə Ramiz Əsədov hesabat məruzəsi ilə
çıxış edərək bildirib ki, 2018-ci il Azərbaycan dövlətinin və cəmiyyətinin
qarşısında duran vəzifələrin həyata keçirilməsi, daxili və xarici siyasət məsələlərinin
həlli baxımından mühüm il olub. Ölkə iqtisadiyyatının inkişaf dinamikası,
iqtisadi və sosial proqramların icrası, əhalinin rifah halının yüksəldilməsi
üçün zəruri tədbirlər həyata keçirilib. Prezident İlham Əliyevin müstəqil,
düşünülmüş və çevik siyasi kursu sayəsində Azərbaycan öz uğurlu inkişafını
davam etdirib. İcra nümayəndəsi qeyd edib ki, respublikamızda gedən iqtisadi inkişaf
rayonumuzda da öz əksini tapmışdır. İcra başçısı Rəcəb Babaşovun gərgin əməyi nəticəsində
son iki il yarım ərzində Qazax şəhərində və eləcə də kəndlərimizdə 10 illərə bərabər
işlər görülmüşdür. R.Əsədov nümayəndəlik haqqında məlumat verərək bildirib ki, Kosalar kəndinin
1151 təsərrüfatı, 4511 nəfər əhalisi vardır. Nümayəndəliyin ərazisində 1 bələdiyyə,
1 tam orta məktəb, 1 mədəniyyət evi, 1 kitabxana, 1 həkim məntəqəsi, 3 bağça, 1
poçt şöbəsi, 1 EATS fəaliyyət göstərir. Hesabat
dövründə nümayəndəlikdə 64 nəfərin doğum, 39 nəfərin isə ölüm qeydiyyatı
aparılmışdır. Kosalar kənd tam orta məktəbində 572 nəfər şagird təhsil alır. 65 nəfər
müəllim və 21 nəfər texniki işçi kollektivi çalışır. Məktəbin məzunlarından 4 nəfəri
respublikanın ali məktəblərinə daxil olmuşdur. Kənd təsərrüfatı sahəsində görülən işlərdən danışan icra nümayəndəsi
bildirib ki, 2018-ci ilin məhsulu üçün kənd əhalisi 368,93 hektar sahədə
payızlıq taxıl əkmişdir. Bundan 346,76 hektarı buğda, 22,17 hektarı isə
arpadır. 2,26 hektarda dən üçün qarığdalı, 226,71 hektarda yonca, 2,02 hektarda
bostan, 8,04 hektarda tərəvəz, 1,05 hektarda kartof və s. kənd təsərrüfatı
bitkiləri əkib becərmişlər. Kənd sakinləri 2019-cu ilin məhsulu üçün sentyabr–dekabr
aylarında 270 hektarda payızlıq taxıl əkmişlər. İndiyə kimi suvarılan sahələrdə
120 hektarda suvarma aparılmışdır. Bundan əlavə, 2016-2018-ci
illər ərzində Kosalar kəndində 4000 ədəd tut tingi əkilmiş və yüksək
aqrotexniki qaydada becərilir. 2018-ci ildə 623 nəfər kənd sakininə əkin sahələrinin becərilməsində istifadə
etdiyi yanacaq və motor yağlarına görə dövlət büdcəsinin vəsaiti hesabına ümumilikdə
45532,90 manat pul yardımı edilmiş, 113 nəfər sakinə isə 46 tona yaxın güzəştli
yolla mineral gübrə satılmışdır. Kənddə bitkiçiliklə yanaşı heyvandarlıq sahəsinin
inkişafına da diqqət yetirilir. 2018-ci təsərrüfat ilində 1487 baş iribuynuzlu
mal-qara, 4660 baş xırdabuynuzlu davarlar qeydə alınmışdır. Hesabat ili ərzində
epizodik müalicə tədbirləri planına uyğun olaraq 1400 baş mal-qarada və 3450
baş davarlarda müvafiq olaraq dabaq, qarayara, çiçək xəstəliklərinə, təkdırnaqlı
heyvanlardan 34 başda manqo, 9827 baş ev quşlarında isə taun əleyhinə dərmanlama
işləri aparılmışdır. İcra nümayəndəsi qeyd edib ki, kənddə qarşıya çıxan sosial-iqtisadi
problemlərin həllində ictimaiyyət nümayəndələrinin iştirakına üstünlük
verilmişdir. 2018-ci fəaliyyət dövründə vətəndaşların qəbulu həyata keçirilmiş,
onların ərizə, şikayət və təkliflərinə baxılaraq lazımi tədbirlər görülmüş və nəticəsi
barədə vətəndaşlara məlumat verilmişdir. Hesabat dövrü ərzində vətəndaşlardan
13 yazılı ərizə daxil olmuşdur. Ərizələrin 12-si təsərrüfat məsələsinə, 1-i isə
suvarma məsələsinə aiddir. Vətəndaşları narahat edən və ya müxtəlif formada
şifahi şikayətlə bağlı qəbula gələnlərin sayı il ərzində 8 nəfər olmuşdur.
Şifahi qəbula gələnlərin şikayət və müraciətləri müxtəlif forma və məzmunda
olmaqla suvarma işi, içməli suya olan tələbatın ödənilməsi, ailə daxili münaqişələr,
əmlak məsələləri, istismara yararsız elektrik dirəklərinin dəyişdirilməsi və s.
bu kimi məsələlərdən ibarət olmuşdur. İstər daxil olan yazılı ərizələr, istərsə
də şifahi şikayətlər, müraciətlər vaxtında nümayəndəlikdə və yaxud yerlərdə gecikdirilmədən
vətəndaşın özünün iştirakı ilə baxılaraq həll edilmişdir. 2018-ci ildə yuxarı
icra orqanlarından, idarə, təşkilat və müəssisələrdən cəmi 39 məktub, sənəd, qərar
və sərəncamlar daxil olmuşdur. Kosalar kənd icra nümayəndəliyi tərəfindən isə
yuxarı icra orqanlarına, idarə və müəssisələrə, vətəndaşlara il ərzində 1203
müxtəlif məzmunlu və təyinatlı məktublar və arayışlar göndərilmişdir.
Kəndin abadlaşdırılmasında, əhalinin sosial vəziyyətinin
yaxşılaşdırılmasında yerli özünüidarəetmə orqanı olan bələdiyyələrin də böyük
rolu var. 2018-ci ildə əhalinin suvarma suyuna olan təlabatının ödənilməsində,
taxıl sahələrində biçinin aparılması üçün texnikanın cəlb edilməsində yaxından
köməklik göstərilmişdir. Bundan əlavə, Kosalar kəndi ərazisində böyük zibilxana
təmizlənərək, ərazidə səliqə-səhman yaradılmışdır. Kənd sakinlərinin iştirakı
ilə qəbiristanlıqlarda təmizlik işləri aparılmışdır. Kosalar kəndində olan şəhid
ailələri, Qarabağ müharibəsi əlilləri, kimsəsiz, imkansız ailələr dini və milli
bayramlarda yad edilmiş, onlara maddi yardımlar göstərilmişdir. Kənddəki elektron ATS-də 692 ədəd telefon nömrələri və 308 evdə isə
internet provayderi yüksək səviyyədə xalqın istifadəsindədir. Kosalar kəndi ərazisində yeni salınmış iki məhəllələrdən
birində 500 m uzunluğunda SİP kabel xətti çəkilmiş, 22 ədəd yeni telefon nömrəsi
əhalinin istifadəsinə verilmiş, 4 ədəd köhnə rabitə dayağı yenisi ilə dəyişdirilmişdir. Məruzə ətrafında çıxış edən kənd sakinlərindən Tarıyel Nəsibov
bildirib ki, kəndimiz rayon rəhbərliyinin diqqət və qayğısı ilə tam əhatə
olunub. Bunun nəticəsidir ki, Kosalar kəndi gündən-günə daha da inkişaf edir,
abadlaşır. Bu gün kəndin müasir standartlara cavab verən yolu, uşaq bağçaları
var. Kənddə məktəb və bir bağçanın təmiri nəzərdə tutulub ki, o da həyata
keçiriləcəkdir. Biz sakinlər əminik ki. kəndimiz bundan sonra da rayon rəhbərliyinin
qayğısı sayəsində gözəlləşəcəkdir. Kənddə görülmüş işləri yüksək qiymətləndirən T.Nəsibov Prezident İlham Əliyevə, Rayon İcra
Hakimyyətinin başçısı Rəcəb Babaşova kənd sakinləri adından öz dərin minnətdarlığını bildirib.
Qazax Rayon İcra Hakimiyyəti başçısının birinci müavini Məmməd Alıyev
hesabat yığıncağında çıxış edərək rayon rəhbərliyinin adından kənd sakinlərini
salamlayıb, səmimi ürək sözlərini çatdırıb. Qeyd edib ki, əsası ulu öndər
Heydər Əliyev tərəfindən qoyulan dövlət siyasəti Prezident İlham Əliyevin
rəhbərliyi altında yüksək səviyyədə həyata keçirilir. Birinci müavin
bildirib ki, dövlət başçısının uzaqgörən siyasəti nəticəsində ölkəmiz son 15
ildə bütün sahələrdə uğurlar əldə edib. Ölkəmizin beynəlxalq aləmdə mövqeyi və
nüfuzu daha da möhkəmlənib. Azərbaycan Respublikasının Prezidenti İlham
Əliyevin sədrliyi ilə Nazirlər Kabinetinin 2018-ci ilin sosial-iqtisadi
inkişafının yekunlarına və qarşıda duran vəzifələrə həsr olunan iclasındakı
nitqindən bir daha aydın oldu ki, Azərbaycan gündən-günə inkişaf edir və bütün
dünyada böyük söz sahibi olan qüdrətli dövlətə çevrilir. M.Alıyev vurğulayıb
ki, 2018-ci il Qazax rayonu üçün hər bir sahədə uğurlu il olub. Ölkə başçısının
yürütdüyü siyasətin Qazaxda rayon rəhbərliyi tərəfindən olduğu kimi icra
olunması sayəsində rayonda bütün sahələr üzrə uğurlu nəticələr əldə edilib. Bu
gün tam əminliklə deyə bilərik ki, Qazaxda elə bir sahə olmaz ki, diqqətdən kənarda
qalsın. Bunu istər sosial obyektlərin inşası, istər kənd təsərrüfatının
inkişafı, istərsə də təhsil, səhiyyə, mədəniyyət, idman sahələrində əldə
etdiyimiz nailiyyətlər söyləməyə əsas verir. "2018-ci ilin Qazax
rayonu üçün eyni zamanda tikinti-quruculuq ili kimi yadda qaldığını”, - deyən
müavin son iki il yarımda görülən işlərdən də söz açıb. ”Azərxalça” ASC
tərəfindən tikilən xalça müəssəsinin, ”Mətanət A” şirkəti tərəfindən inşa
edilmiş Əhəng zavodunun, hazırda son tamamlanma işləri aparılan İkinci Şıxlı
kəndində ”İnvestel GROUP” MMC tərəfindən tikilən Aqroparkın, "Gedik
Carçı Qaynaq” LTD şirkəti tərəfindən inşa
edilən "Gedik-Carçı” Elektrod Zavodunun, 145 çarpayılıq rayon
mərkəzi xəstəxanasının, rayonun Qazaxbəyli-Orta Salahlı-Aşağı Salahlı, Yuxarı
Salahlı-Kəmərli, Kosalar, Quşçu Ayrım, Canalı, Çaylı, Bala Çaylı, Hüseynbəyli,
Cəfərli kəndlərində yeni asfalt yolların çəkilişini, Daş
Salahlı-Ürkməzli-Dəmirçilər kənd yolunun yenidən bərpasını, Qazax rayonu üzrə
olan 25 bağçadan 18-də müassir standartlara cavab verən şəraitin yaradılmasını,
şəhərdə yerləşən 6 saylı körpələr evi-uşaq bağçasının yenidən qurulmasını,
rayonda olan 163 ədəd çoxmənzilli yaşayış binasından artıq 129-nun yüksək
səviyyədə təmir olunmasının və sakinlərin istifadəsinə verilməsini, bundan
əlavə, rayonda sakinlərin istəyini nəzərə alaraq çoxmənzilli binaların
həyətlərində xeyir-şər evlərinin tikilməsini 2018-ci ilin uğurlu il olmasının əyani
sübutu kimi qiymətləndirib. Müavin qeyd edib
ki, Qazax rayonunda başqa sahələrlə yanaşı, kənd təsərrüfatına da böyük
diqqət və qayğı göstərilir. Bunun nəticəsidir ki, əkin sahələri ildən-ilə
artır. Rayonumuzda barama, tütün, kartof və taxıl sahələrindən götürdüyümüz bol
məhsuldarlıq sayəsində deyə bilərik ki, 2018-ci il kənd təsərrüfatı üçün
məhsuldar bir il olub. Bundan əlavə, kənd təsərrüfatının inkişaf etdirilməsi
rayonda əhalinin məşğulluğunun təmin olunmasında da böyük rola malikdir. Rayon
sakinlərinin işlə təmin olunmasında mühüm əhəmiyyət kəsb edir. Ona görə də
2018-ci il bu sahədə də yaddaqalan oldu. Hazırda rayonda kənd
təsərrüfatının inkişaf etdirilməsi, yeni iş yerlərinin açılması və
şəhərimizin abadlaşması istiqamətində işlər uğurla davam etdirilir.
GOYEZEN.AZ
Facebook-da paylaş