Xanlıqlar kəndi hesabat verib
Bu gün Qazax Rayon İcra
Hakimiyyəti başçısının Xanlıqlar kənd İnzibati Ərazi Dairəsi üzrə nümayəndəliyində
keçirilən hesabat yığıncağında 2018-ci ildə görülmüş işlər müzakirə olunub və
2019-cu ildə qarşıda duran vəzifələrdən danışılıb. Hesabat yığıncağında Qazax Rayon İcra Hakimiyyəti
başçısının birinci müavini Məmməd Alıyev, aparatın Ərazi idarəetmə və
yerli özünüidarəetmə orqanları ilə iş şöbəsinin müdiri Adil Vəliyev,
şöbənin baş məsləhətçisi Qərib Bayramov və kənd sakinləri iştirak ediblər. Yığıncağı
aparmaq üçün sədr və katib seçildikdən sonra gündəlikdə duran məsələlər barədə
məlumat verilib. Xanlıqlar kənd İƏD-si üzrə
nümayəndə Xasay Balayev hesabat məruzəsi ilə çıxış edərək ötən ilin Qazax rayonu üçün uğurlu olduğunu bildirib. Qeyd edib ki, son illər respublikamızın həyatı
yaddaqalan tarixi hadisələrlə zəngin olmuşdur. Bu nailiyyətlər ölkə başçısının
uzaqgörən, məqsədyönlü daxili və xarici siyasətindən irəli gəlir. Ötən 2018-ci
ildə respublikamız həm daxili, həm də xarici siyasətində bir çox uğurlara imza
atmışdır. Müstəqil Azərbaycan dövlətinin gündən-günə inkişaf etməsi, dünya dövlətləri
sırasında qabaqcıl yer tutması və suveren bir dövlət kimi dünya əhəmiyyətli tədbirlərə
ev sahibliyi etməsi bütün bunların bariz nümunəsidir. İcra nümayəndəsi qeyd
edib ki, ötən il rayonumuz, o cümlədən Xanlıqlar kəndi üçün də uğurlu olmuşdur.
Qazax Rayon İcra Hakimiyyətinin başçısı Rəcəb Babaşovun rəhbərliyi ilə Qazaxda həyata
keçirilən genişmiqyaslı yenidənqurma işlərindən danışan X.Balayev son iki il
yarımda çoxmənzilli binaların əsaslı şəkildə təmir olunmasını, Çaylı, Bala
Çaylı, Kosalar, Hüseynbəyli, Canalı, Dəmirçilər, Cəfərli kəndlərinə yeni asfalt
yolların, Ermənistanla həmsərhəd olan Quşçu Ayrım, Məzəm, Bala Cəfərli kəndlərində
əhalinin təhlükəsizliyini təmin etmək məqsədilə istinad divarlarının çəkilməsini
bu istiqamətdə görülən işlərin ən bariz nümunəsi olduğunu bildirib. Rayon rəhbərliyi tərəfindən Qazaxda
azyaşlı körpələrə göstərilən diqqət və qayğıdan, onların sağlam, hərtərəfli və
düzgün böyüməsi, təlim-tərbiyə olunması üçün yaradılan şəraitdən danışan icra
nümayəndəsi rayon üzrə olan 25 bağçadan 18-nin müasir standartlara cavab verən
səviyyəyə çatdırıldığını bildirib. Daş Salahlı, Kosalar, İkinci Şıxlı, Cəfərli, Canalı, Quşçu Ayrım, Bala Cəfərli kəndlərində olduğu kimi
Xanlıqlar kəndində də bağçanın əsaslı şəkildə yenidən qurularaq körpə
fidanların istifadəsinə verildiyini diqqətə çatdırıb. Qeyd edib ki, hesabat
ili dövründə rayonumuzla yanaşı Xanlıqlar kəndində də bir sıra təqdirəlayiq işlər
görülmüşdür. Kənd əhalisi ilə mütəmadi olaraq görüşlər keçirilmiş, onların
problemləri ətraflı araşdırılmış və lazımi tədbirlər planı hazırlanaraq
icrasına başlanılmışdır. Hesabat ili ərzində
əhalinin qaldırdığı problemlərin bir çoxu artıq öz həllini tapmışdır.
Kənd haqqında məlumat
verən icra nümayəndəsi bildirib ki, Xanlıqlar kəndinin əsası XVII əsrə təsadüf
edir. Əvvəllər "Baba Dərviş”, imperiya dövrünədək "Xanlıqlar”, sovet hakimiyyəti
dövründə "Musaköy”, müstəqilliyimizi qazandıqdan sonra isə yenidən "Xanlıqlar”
adlandırılan kənd qərbdən 29 km Ermənistanla həmsərhəddir. Hal–hazırda
Xanlıqlar kəndində 3647 nəfər əhali yaşayır ki, bunlar da 935 təsərrüfatda cəmləşir.
2018-ci ildə Xanlıqlar kəndində 2 nigah, 56 doğum, 17 ölüm qeydə alınmışdır. Kəndin
ümumi ərazisi 3805 hektardır. Həyətyanı və tikililər altında olan torpaq sahəsi
141 hektardır. Kənddə aparılan torpaq islahatı nəticəsində torpaqların 457 hektarı
dövlət mülkiyyətinə, 2285 hektarı bələdiyyə mülkiyyətinə, 873 hektarı isə 840
ailəyə pay torpağı kimi verilmişdir. Xanlıqlar kənd əhalisi əsasən
əkinçilik və heyvandarlıq məhsullarının istehsalı ilə məşğuldur. Torpaq
islahatından sonra əhalinin güzəranı yaxşılaşmış, bir çox sahələrdə: yaşayış
evlərinin tikintisində, şəxsi mal-qaranın sayında, bu və ya digər sahələrdə əvvəlki
illərə nisbətən irəliləyişə nail olunmuşdur. 2018-ci təsərrüfat ilində əkinçilərimiz
526 hektarda payızlıq taxıl, 25 hektarda qarğıdalı, 120 hektarda kartof, 228
hektarda yonca, 65 hektarda tərəvəz əkib becərmişlər. Ölkə Prezidentinin kənd
təsərrüfatının inkişafına göstərdiyi diqqət və qayğının nəticəsində yerlərdə kənd
təsərrüfatı məhsulları istehsalçıları güzəştli şərtlərlə yanacaq, motor
yağları, mineral gübrələr və kənd təsərrüfatı texnikaları ilə təmin olunmuşlar.
Kənd ərazisində kənd təsərrüfatı texnikalarının kifayət qədər olması və əvvəlki
illərə nisbətən suvarma suyunun səmərəli verilməsi nəticəsində ötən il daha çox
kənd təsərrüfatı məhsulları istehsal olunmuşdur. 2018-ci təsərrüfat ilində
17000 sentner taxıl, 1000 sentner qarğıdalı, 24000 sentner kartof, 13650 sentner
tərəvəz, 2340 ton yonca istehsal edilmişdir. Baramaçılığın inkişafı məqsədilə
Xanlıqlar kəndinin ərazisində 500–dən çox tut tingi əkilmişdir. 2017-ci ildə
baramaçılarımız 300 kq barama təhvil verdiyi halda 2018-ci ildə bu rəqəm
406 kq-a yüksəlmişdir. 2018-ci ildə kənd təsərrüfatı
məhsullarının istehsalçılarına əkin sahələrinin becərilməsində istifadə etdikləri
yanacaq və motor yağlarına görə dövlət büdcəsinin vəsaiti hesabına əkin
aparılmış 695.33 hektar sahə üçün 420 vətəndaşa kart vasitəsilə 49672 manat
yardım verilmiş, ehtiyacı olanlara 70 faiz güzəştlə mineral gübrələr
satılmışdır. Əhalidə olan mal-qaranın
cins tərkibi yaxşılaşdırılmaqla sayı ildən-ilə artır. 1 yanvar 2019-cu il tarixə
kənd əhalisinin 1765 baş iribuynuzlu, 5540 baş xırdabuynuzlu mal-qarası, 17430
ev quşları qeydə alınmışdır. Qarayara, quduzluq, dabaq xəstəliklərinə qarşı
rayon Baytarlıq İdarəsinin Xanlıqlar kənd sahə həkimləri tərəfindən dövlət vəsaiti
hesabına pulsuz profilaktiki tədbirlər aparılmış və daim nəzarət altında saxlanılır.
Hesabat ilində kənd əhalisinin
sosial-iqtisadi vəziyyətinin yaxşılaşdırılması istiqamətində də bir sıra məqsədyönlü
işlər görülmüşdür. Kənddə əhali ilə canlı ünsiyyətə, qarşıya çıxan
sosial-mədəni problemlərin həllində ictimaiyyət nümayəndələrinin yaxından
iştirakına üstünlük verilmişdir. Kənddə görülməsi vacib olan məsələlər ilin
əvvəlindən perspektiv iş planına daxil edilmiş, icrası kənddə fəaliyyət
göstərən idarə, müəssisə və təşkilat rəhbərlərinə həvalə edilmişdir. Belə ki,
2018-ci ildə nümayəndəliyin iş planına
vətəndaşların qəbulu, ərizə və şikayətlərinə baxılması, əhalinin fasiləsiz elektrik
enerjisi ilə təmin edilməsi, kəndarası yolların təmiri, gənclərin hərbi vətənpərvərlik
ruhunda tərbiyə edilməsi, hərbi çağırışın təşkili, ekologiya və sanitariya
işlərinə nəzarət, əkinçilik işlərində və heyvandarlığın inkişafında əhaliyə
köməklik, səhiyyə, təhsil, mədəniyyət, rabitə və ticarət müəssisələrinin
fəaliyyəti, kənd ərazisində yaşayan şəhid ailələrinə, Qarabağ müharibəsi
əlillərinə, imkansız və kimsəsizlərə qayğı göstərmək, əhalinin maddi və sosial
vəziyyətinin yaxşılaşdırılması, kənd ərazisində milli və ümumi bayramların qeyd
edilməsi, kənd ərazisinin, qəbiristanlıqların təmiz saxlanılması məqsədilə mütəmadi
iməciliklər keçirilməsi və bu kimi məsələlər daxil edilmişdir. Xanlıqlar kəndində həkim məntəqəsi,
512 nömrəlik EATS, poçtamt, Qazax Peşə liseyi, "İmperial” MMC, "Azərcell” və "Bakcell” mobil telefon stansiyaları, 35/10
kv-luq yarımstansiya, məişət xidməti obyektləri, mağazalar, təhsil və
mədəniyyət müəssisələri fəaliyyət göstərir. Xanlıqlar kənd kitabxanasının
binası qəzalı vəziyyətdə olduğundan kitabxana tərəfimizdən yeni binaya
köçürülmüş, təmir edilərək oxucuların istifadəsinə verilmişdir. Xanlıqlar kənd əhalisinin maddi
rifah halının yaxşılaşdırılmasında və kəndin abadlaşdırılmasında nümayəndəlik
öz işini bələdiyyə ilə birgə qurmuş, elektrik transformatorlarının, subartezian
quyularının daim işləməsini, içməli su xəttinin, təbii bulaqların dayanıqlığını,
kəndarası yolların 6 km-nə yaxın hissəsinin təmir olunmasını təmin etmişdir.
Kənddə yaşayan şəhid ailələrinə, Qarabag müharibəsi əlillərinə, imkansız və kimsəsizlərə
keçirilən bayram tədbirlərində maddi və mənəvi köməkliklər göstərilmişdir. 5
nəfər Qarabağ əlili həyətyanı torpaq sahəsi ilə təmin edilmişdir. Kənd ərazisində bir Peşə liseyi, bir
tam orta ümumtəhsil məktəbi, bir əsas ümumtəhsil məktəbi və bir körpələr
evi-uşaq bağçası fəaliyyət göstərir. Ş.Şahvələdov adına Xanlıqlar kənd tam orta
ümumtəhsil məktəbində 330 şagird təhsil alır ki, bunların da təlim-tərbiyəsi ilə
49 müəllim və 22 texniki işçi məşğul olur. 2018-ci il ərzində məktəbi 25 şagird bitirmişdir. Onlardan 7
nəfər ali, 3 nəfər isə orta ixtisas məktəblərinə daxil olmuşdur. Ali məktəblərə
qəbul olmuş 7 məzundan 1 nəfəri - İsmayılova Mələk Şəmistan qızı 641 bal
toplayaraq Azərbaycan Tibb Universitetinə, 1 nəfəri - Mahmudova Tərlan Saməddin
qızı 622 bal toplayaraq Bakı Dövlət Universitetinə daxil olmuşdur. Hər iki
tələbə Qazax Rayon İcra Hakimiyyətinin başçısı Rəcəb Babaşov tərəfindən mükafatlandırılmışdır.
3 nəfər məzun 350 baldan yuxarı nəticə göstərmişdir. Azad Mikayılov adına əsas
ümumtəhsil məktəbində isə 88 şagird təhsil alır. Ötən dərs ilində məktəbi 3
şagird bitirmiş, onların hər üçü Qazax peşə liseyinə daxil olmuşdur. Xanlıqlar kənd körpələr evi-uşaq
bağçasında 55 uşağın təlim-tərbiyəsi ilə 21 nəfər müəllim və texniki işçi
məşğul olur. Xanlıqlar kəndində fəaliyyət
göstərən həkim məntəqəsi 2018-ci ildə əsaslı təmir olunmuşdur. Kənd həkim
məntəqəsində fəaliyyət göstərən həkim personalı daim uşaqlar arasında müxtəlif
peyvənd işləri aparmış, onların sağlamlığının qorunmasını diqqətdə saxlamışlar. Respublikamızın dinamik inkişafında,
xalqın sosial rifahının yaxşılaşdırılmasında enerji daşıyıcılarının rolu
əvəzsizdir. Xanlıqlar kəndində bu sahədə çox işlər görülmüşdür. Əhaliyə 24 saat
fasiləsiz elektrik enerjisi və mavi qaz yanacağı verilir. Lakin kəndin 100-dən
çox yaşayış evinin 35 kv-luq elektrik xəttinin altında yerləşməsi kənd
əhalisini düşündürən və narahat edən ən vacib məsələlərdən biridir. Bundan
başqa, Xanlıqlar kəndində yeni salınmış yaşayış massivlərinə elektrik, qaz
xəttinin çəkilməsinə və telefon dirəklərinin, kabellərin dəyişdirilməsinə ehtiyac
vardır. Xanlıqlar kəndində SİP kabelləşmənin davam etdirilməsi, kəndin mərkəzi
yollarının asfaltlaşdırılması da kənd sakinlərinin qaldırdığı məsələlərdəndir. Bununla yanaşı kənddə 1 ədəd
artezian quyusu qazılaraq istifadəyə verilmişdir. Ötən ildə qazılmış artezian
quyusunun yanında sakinlərin istifadəsi üçün Xanlıqlar bələdiyyəsinin hesabına
hündürlüyü 14 metr, tutumu 15 ton olan su çəni quraşdırılmışdır. Kəndin əsas içməli su mənbəyi
olan "Bayramov” su xəttinin üzərində təmir işləri aparılmışdır. Bu təmir nəticəsində
içməli su ilə kəndin 80 faizi təmin edilir. Bundan başqa, bələdiyyə tərəfindən
"Karqaya" bulağının da borularında təmir-bərpa işləri aparılmış, 2300 metr boru
xətti yenisi ilə əvəz olunaraq suyun kəndə gəlməsi təmin edilmişdir. Yaxın günlərdə
həmin bulaqda yeni su anbarının tikilməsi nəzərdə tutulmuşdur. Hesabat ili ərzində
Xanlıqlar kənd sakinlərinin ərizə və şikayətlərinə baxılması, onların qəbul
edilərək tələb və təkliflərinin yerinə yetirilməsi sahəsində müsbət işlər
görülmüşdür. İl ərzində vətəndaşlardan 20 ərizə və 38 şifahi müraciət daxil
olmuşdur. Ərizələr məzmun etibarı ilə təsərrüfatdan ayrılma və sosial yönümlü
müraciətlərdən ibarətdir. Şifahi müraciətlərin əksəriyyəti isə torpaq sərhədləri,
yol, suvarma suyu və qonşu münasibətləri ilə əlaqədar olan məsələlərdir. Həmin
şifahi müraciətlər və verilmiş ərizələr vətəndaş müraciət etdiyi gündən dərhal
sonra münaqişəli tərəflərin birgə iştirakı ilə yerində həll edilmişdir. İl ərzində
nümayəndəliyə yuxarı təşkilatlardan 28 ədəd məktub, qərar və sərəncam daxil
olmuşdur. Məktublara aidiyyəti olaraq cavab verilmiş, qərar və sərəncamların icrası üçün isə lazımi tədbirlər görülmüşdür.
2018-ci ildə icra nümayəndəliyində keçirilmiş 13 iclasda 26 məsələ müzakirə
olunmuşdur. Kənd sakinləri adından
çıxış edən Xanlıqlar kənd tam orta məktəbin biologiya müəllimi Xatın
Hüseynxanova söz alaraq hesabat ilində kənddə görülmüş işləri yüksək qiymətləndirib.
2018-ci ildə respublikamızda, eləcə də bölgələrimizdə görülən işlərə, əhalinin
maddi-rifah halının yaxşılaşdırılmasına, əhaliyə göstərdiyi diqqət və qayğıya
görə Xanlıqlar kənd camaatı adından Prezident İlham Əliyevə və Qazax Rayon İcra
Hakimiyyətinin başçısı Rəcəb Babaşova öz dərin minnətdarlığını bildirib.
Hesabat
yığıncağında iştirak edən Qazax Rayon İcra Hakimiyyəti başçısının birinci
müavini Məmməd Alıyev kənd sakinlərini salamlayıb, yeni ilin qədəm qoyması ilə
əlaqədar rayon rəhbərliyinin səmimi arzularını çatdırıb, ən xoş arzularını
bildirib. Qeyd edib ki, hər il olduğu kimi yola saldığımız 2018-ci il ölkəmiz
və xalqımız üçün uğurlu bir il olmuşdur. Qurucusu və memarı ulu öndər Heydər
Əliyevin olduğu Azərbaycanın ölkə prezidenti İlham Əliyevin rəhbərliyi altında həyatın
bütün sahələrində yeni nailiyyətlərə imza ataraq qarşıya qoyulan hədəflərə
doğru inamla irəlilədiyini bildirib. M.Alıyev
respublikamızda olan inkişafın bölgələrimizdə də davam etdiyini bildirib. Qazax
Rayon İcra Hakimiyyətinin başçısı Rəcəb Babaşovun rəhbərliyi altında rayonda
bütün sahələrdə uğurlu nəticələrin əldə olunduğunu qeyd edib. Bildirib ki, bu gün Qazaxda elə bir sahə yoxdur ki,
orada inkişaf, tərəqqi olmasın. "Azərxalça” ASC tərəfindən xalça
müəssisəsi tikilib ki, bu da yeni iş yerlərinin açılması baxımından böyük
əhəmiyyət kəsb edir. "Mətanət A” şirkəti tərəfindən inşa edilmiş Əhəng
zavodunun istifadəyə tam hazır olduğunu, hazırda İkinci Şıxlı kəndində
"İnvestel GROUP” MMC tərəfindən tikilən Aqroparkda, "Gedik Carçı
Qaynaq” LTD şirkəti tərəfindən inşa edilən "Gedik-Carçı”
Elektrod Zavodunda, 145 çarpaylıq rayon Mərkəzi Xəstəxanasında da son
tamamlanma işlərinin aparıldığını diqqətə çatdırıb. Rayonda
yeni iş yerlərinin yaradılması istiqamətində həyata keçirilən tədbirlərdən də
danışan müavin başlanılması nəzərdə tutulan su-kanalizasiya xəttinin, Gəncə-Qazax-Gürcüstan
dövlət sərhəddi avtomobil yolunun çəkilməsinin, "Saloğlu” fərdi mebel
firması tərəfindən yeni tikiləcək fabrikin bu istiqamətdə görülən işlərin əyani
sübutu olduğunu bildirib. İstər açılışı gözlənilən, istərsə də tikintisi nəzərdə
tutulan bütün işlərin bir amala – vətəndaşların rifah halının
yaxşılaşdırılmasına xidmət etdiyini vurğulayıb. GOYEZEN.AZ
Facebook-da paylaş