Fərəhli kəndində yaşayan sakinlərlə səyyar görüş keçirilib
Müstəqil Azərbaycanın son 15 ildə keçdiyi inkişaf və
yüksəliş yolu hər kəsə yaxşı məlumdur. Bu gün dövlətimiz və xalqımız Prezident
İlham Əliyevin rəhbərliyi altında həmin inkişafa doğru uğurlu göstəricilərlə
addımlayır. Ölkə başçısının ulu öndər Heydər Əliyevin cəsarətli və qətiyyətli
siyasətini olduğu kimi davam etdirməsi, həyata keçirilən işlərin təməlində müstəqil
Azərbaycanın inkişafının dayanması bir daha onu sübut edir ki, ölkəmiz güclü
dövlət kimi bundan sonra da bütün dünyada öz sözünü deyəcəkdir. Tam əminliklə söyləyə biləcəyimiz məqamlardan biri
də odur ki, ölkə başçısının uzaqgörən siyasəti nəticəsində ölkəmizdə həyata
keçirilən genişmiqyaslı layihələr, tədbirlər, bir sözlə, aparılan sürətli və
dinamik inkişaf paytaxtla yanaşı, bölgələrimizdə də uğurla davam etdirilir. Ötən
son iki il yarım ərzində Qazaxda aparılan abadlıq, tikinti-quruculuq işlərinin
geniş miqyas alması, bundan əlavə, təhsil, səhiyyə, mədəniyyət, idman və digər
sahələrdə əldə edilən uğurların, nailiyyətlərin gündən-günə artması bunun bariz
nümunəsidir. Bu gün Qazaxda bütün sahələrlə yanaşı, daim diqqət mərkəzində saxlanılan
sahələrdən biri də vətəndaşlara göstərilən xidmət və onlara olan qayğıdır.
Qazax Rayon İcra Hakimiyyətinin başçısı Rəcəb Babaşovun fəaliyyətə başladığı
ilk gündən istər şəhər, istərsə də kənd sakinləri ilə keçirdiyi səyyar görüşlər
və bu görüşlərdə icra başçısının sakinlərin müraciətlərini dinləməsi,
qaldırılan hər bir məsələyə diqqət və qayğı ilə yanaşması vətəndaş amilinin ön
plana çəkilməsi deməkdir. Bu qayğının nəticəsidir ki, Qazaxda rayon rəhbərinin
sakinlərlə keçirdiyi görüşlər artıq bir ənənə halını alıb. İcra başçısı bu gün ümumilikdə altı dəfə olmaqla, rayonun sərhəd kəndi
olan Fərəhlidə yaşayan sakinlərlə ikinci dəfə səyyar görüş keçirib. Görüşdə RİHB aparatının məsul şəxsləri, aidiyyəti idarə, müəssisə və təşkilat
rəhbərləri də iştirak ediblər. Bayram ərəfəsində keçirilən səyyar görüşdə
rayonumuzda, eləcə də kənddə görülən tikinti-quruculuq işlərindən,
sosial-iqtisadi sahədə əldə edilən göstəricilərdən söz açılıb, qazanılan
uğurlardan danışılıb, sakinləri narahat edən qayğılarla maraqlanılıb. Qazax Rayon İcra Hakimiyyətinin başçısı Rəcəb Babaşov görüşdə çıxış edərək
sakinləri salamlayıb, qarşıdan gələn 31 Dekabr - Dünya Azərbaycanlılarının
Həmrəylik Günü və Yeni il münasibətilə səmimi qəlbdən təbrik edib, xoş
arzularını çatdırıb. Hər zaman olduğu kimi, bugünkü görüşün də əsas məqsədi siz
sakinləri narahat edən məsələləri öz dilinizdən eşitmək və həlli istiqamətində
əməli işlər görməkdir, – deyən rayon rəhbəri bildirib ki, səyyar görüşlər ölkə
başçısının tapşırığına əsasən keçirilir. Bu cür səyyar görüşlər bir amala
xidmət edir ki, onun da kökündə siz sakinlər və qayğılarınız dayanır. İcra
başçısı dövlət siyasətinin prioritet
istiqamətlərindən birini təşkil edən vətəndaş amilinin Qazaxda hər zaman ön
plana çəkildiyini vurğulayaraq fəaliyyətə başladığı ilk gündən
sakinlərin arasında olmağı, onları narahat edən qayğıları öz dillərindən
eşitməyi qarşıya məqsəd qoyduğunu bildirib. "Regionların sosial-iqtisadi inkişafı Dövlət Proqramı”na uyğun olaraq respublikamızın
hər yerində olduğu kimi, Qazax rayonunun da inkişaf etdiyini bildirən icra
başçısı son iki il yarım ərzində bu inkişafın daha geniş vüsət aldığını
bildirib. 2016, 2017-ci illərlə nisbətdə bu il rayonumuzda aparılan quruculuq
işlərini müqayisə edən rayon rəhbəri istifadəyə verilən çoxsaylı sosial
obyektlərin inşasından, yeni iş yerlərinin yaradılmasından, rayonun
sosial-iqtisadi göstəricilərinin gündən-günə artmasından da söz açıb. Bu gün Qazaxda elə bir sahə yoxdur ki, orada inkişaf, tərəqqi olmasın, -
deyən icra başçısı bildirib ki, "Azərxalça” ASC tərəfindən xalça
müəssisəsi tikilib və 150 nəfərin çalışması nəzərdə tutulub ki, bu da yeni iş
yerlərinin açılması baxımından böyük əhəmiyyət kəsb edir. Rayon rəhbəri
"Mətanət A” şirkəti tərəfindən inşa edilmiş Əhəng zavodunun istifadəyə tam
hazır olduğunu, hazırda İkinci Şıxlı kəndində "İnvestel GROUP” MMC
tərəfindən tikilən Aqroparkda, "Gedik Carçı Qaynaq”
LTD şirkəti tərəfindən inşa edilən "Gedik-Carçı” Elektrod
Zavodunda, 145 çarpaylıq rayon Mərkəzi Xəstəxanasında da son tamamlanma
işlərinin aparıldığını və bütün müəssisələrdə avadanlıqların quraşdırıldığını
bildirib. Ölkə başçısının respublika və yerli əhəmiyyətli yolların yenidən qurulması,
ən ucqar dağ kəndlərinə belə yeni yolların çəkilməsi ilə bağlı imzaladığı
çoxsaylı Sərəncamların Qazax rayonunda da uğurla icra olunduğunu qeyd edən icra
başçısı bu sahədə məqsədyönlü işlərin görüldüyünü bildirib. Respublika Prezidentinin 19 avqust 2016-cı il tarixli Sərəncamına əsasən 6
min nəfər əhalisi olan 2 yaşayış məntəqəsini birləşdirən Qazax-Kosalar
avtomobil yolunun tikintisinə başlanılmasını, həmin ilin oktyabrın 19-da isə
cənab Prezidentin yeni avtomobil yolunun açılışında iştirak etməsini bu sahədə
görülən işlərin əyani sübutu kimi qiymətləndirib. Bundan əlavə,
Qazax rayonunun Qazax–Uzuntala (9 km)–Cəfərli avtomobil yolunun tikintisi ilə
bağlı tədbirlər haqqında imzaladığı 8 iyun 2018-ci il tarixli Sərancamın bu
inkişafın davamı olaraq bölgələrimizdə yeni asfalt yolların çəkilməsinə böyük
təkan verdiyini bildirib. Qeyd edib ki, imzalanmış həmin Sərəncamın nəticəsidir
ki, bu gün Cəfərli kənd sakinləri yeni asfalt yoldan rahat şəkildə istifadə edə
bilirlər. İcra başçısı bildirib ki, dövlət başçısının avtomobil yollarının tikintisi
ilə bağlı imzaladığı çoxsaylı Sərancamlara əsasən rayonumuzda yeni asfalt
yolların çəkilişi bir daha onu sübut edir ki, bu istiqamətdə görülən işlər
bundan sonra da uğurla davam etdiriləcəkdir. Bu gün bu inkişafı rayonun
Qazaxbəyli-Orta Salahlı-Aşağı Salahlı, Yuxarı Salahlı-Kəmərli, Kosalar, Quşçu
Ayrım, Canalı, Çaylı, Bala Çaylı, Hüseynbəyli, Cəfərli kəndlərinə yeni asfalt
yolların çəkilməsindən aydın şəkildə görmək olar. Qazaxda son iki il yarım ərzində Kosalar, Canalı, Kommuna, Çaylı,
Hüseynbəyli, Cəfərli kəndlərinə yeni asfalt yolların çəkilməsi, uzun illərdən
bəri yaranmış problemin öz müsbət həllini tapması onu deməyə əsas verir ki,
rayonumuzda yolla bağlı görülən işlər geniş miqyas alıb. Qazax rayonunda yol
infrastrukturunun inkişaf etdirilməsi istiqamətində görülən məqsədyönlü işlərin
ildən-ilə artmasının nəticəsidir ki, bu il Qazaxda daha bir avtomobil
yolunun çəkilişinə başlanılıb. 2019-cu ildə çəkilməsi nəzərdə tutulan və
uzunluğu 16 km olan Daş Salahlı-Ürkməzli-Dəmirçilər kənd yolunun yenidən
qurulması bölgələrimizdə yol infrastrukturunun uğurla davam etdirilməsi
deməkdir. Artıq Dəmirçilər kəndində yeni asfalt yolun çəkilməsinin başa
çatdığını qeyd edən rayon rəhbəri digər kəndlərdə olduğu kimi, Fərəhli kəndinə
yeni asfalt yolun çəkilməsi üçün bu kəndin də növbəti dövlət proqramına
salınmasının nəzərdə tutulduğunu bildirib. Lakin buna baxmayaraq nəqliyyat
vasitələrinin və sakinlərin gediş-gəlişini yaxşılaşdırmaq üçün kəndarası
yollara qum-çınqıl töküldüyünü qeyd edib.
Ölkə başçısının təhsil sahəsinə göstərdiyi diqqət və qayğıdan danışan icra
başçısı Qazax müəllimlər seminariyasının 100 illik yubileyinin qeyd
edilməsi haqqında Respublika Prezidentinin 3 noyabr 2018-ci il tarixli
Sərəncamını bu qayğının əyani sübutu kimi qiymətləndirib. Qeyd edib ki, bu
Sərəncam bir daha onu sübut etdi ki, ölkə başçısı Qazax ziyalılarına hər zaman
böyük önəm verib. Bu gün ali məktəblərə qəbulun nəticələrinə görə respublika
məktəbləri arasında rayonumuzun üçüncü yerdə olmasını qeyd edən rayon rəhbəri dövlətimizin
təhsilə olan qayğısının bəhrəsi kimi dəyərləndirib. Vurğulayıb
ki, Respublika Prezidenti İlham Əliyevin məqsədyönlü fəaliyyətinin
nəticəsidir ki, şəhərdə yerləşən S.Vurğun adına 2 nömrəli tam orta məktəb
əsaslı şəkildə təmir olunur və yaxın vaxtlarda istifadəyə veriləcəkdir. Hazırda
məktəbdə avadanlıqlar yerləşdirilir. Bundan əlavə, 2019-cu ildə əsaslı şəkildə
təmir edilməsi nəzərdə tutulan 3 məktəb - Kosalar, Qaymaqlı, Kəmərli kənd tam
orta məktəbləri də müasir standartlara cavab verən səviyyəyə çatdırılacaqdır. İcra başçısı bildirib ki, ötən ay "Ölkəmizi
tanıyaq” layihəsində qazaxlı məktəblilərin Azərbaycan İntellektual Klublar
Assosiasiyası tərəfindən təşkil olunmuş "Nə?, harada?, nə zaman?” adlı
bilik yarışmasından qalib kimi qayıtması bunu bir daha sübut etdi ki, təhsilə
göstərilən qayğı öz bəhrəsini verir. Qeyd edib ki, 9 rayon üzrə 6 komanda
olmaqla, ümumilikdə 54 komandanın iştirak etdiyi yarışda rayonumuzun "Göyəzən”
komandasının 1-ci yeri qazanaraq Assosiasiya tərəfindən Kuboka, Sertifikata və
medallara layiq görülməsi, bundan əlavə, məktəblilərin "Asan həyat"
kompleksindəki "İntellektual mərkəz"də "Breyn Rinq"
yarışmasından da qalib kimi dönmələri təhsil sahəsinə göstərilən qayğıya əsl
töhfədir. Rayon rəhbəri son illər Qazaxda azyaşlı körpələrə göstərilən diqqət və
qayğıdan, onların sağlam, hərtərəfli və düzgün böyüməsi, təlim-tərbiyə olunması
üçün yaradılan şəraitdən də danışıb. Bildirib ki, bu gün tam əminliklə deyə bilərik ki, rayon üzrə olan 25
bağçadan 16-sı müasir standartlara cavab verən səviyyəyə çatdırılıb. Şəhər
bağçalarından - 1,2,3,4,5 saylı, kənd bağçalarından - Qazaxbəyli kəndi
ərazisində məcburi köçkünlər üçün salınmış yeni qəsəbədə yerləşən Aşağı
Əskipara, Daş Salahlı kənd 2 və 3 saylı, Kosalar kənd 2 və 3 saylı, Xanlıqlar, İkinci
Şıxlı kənd 2 saylı körpələr evi-uşaq
bağçaları, Cəfərli, Canalı, Quşçu Ayrım, Bala Cəfərli kənd uşaq bağçaları bu
dediklərimizin əyani sübutudur. Şəhərdə yerləşən 6 saylı körpələr evi-uşaq bağçasının da əsaslı şəkildə
yenidən qurulduğunu qeyd edən icra başçısı bu gün rayonda daha 8 bağçanın
- İkinci Şıxlı kəndində 2, Aşağı Salahlı, Qazaxbəyli, Hüseynbəyli, Kosalar, Daş
Salahlı, Dəmirçilər kəndlərinin hər birində 1 bağçanın da təmir olunmasının, Fərəhli
kəndində də bağçanın olması üçün lazımi tədbirlərin görülməsinin nəzərdə
tutulduğunu bildirib. Bu gün rayonda uşaqlara və bağçalara göstərilən diqqət və
qayğının, istər bağçalardakı ərzaq təminatının, istərsə də yaradılan şəraitin
ən yüksək səviyyədə olduğunu qeyd edib. Şəhid ailələrinə, Qarabağ Müharibəsi əlillərinə,
veteranlarına göstərilən diqqət və qayğıdan danışan rayon rəhbəri bu gün 168 km
məsafədə düşmənlə sərhəddi olan Qazax rayonunun da torpaqlarımızın ərazi
bütövlüyü uğrunda 285 şəhid verdiyini, 7 igid oğlunun Azərbaycanın Milli
Qəhrəmanı adına layiq görüldüyünü bildirib. Rayon rəhbəri kimi fəaliyyətə
başladığı ilk gündən bu sahəyə xüsusi diqqət ayırdığını bildirib.
Şəhidlərimizin uyuduğu qəbiristanlıqların, onların xatirəsinə ucaldılmış
abidələrin, parkların, bulaqların, xiyabanların abadlaşdırılmasının,
yenilənməsinin, əsaslı şəkildə təmir edilməsinin bunun bariz nümunəsi olduğunu
diqqətə çatdırıb. Şəhərin mərkəzində şəhidlərimizin əziz xatirəsinə yaradılmış
Şəhidlər Xiyabanının bütün şəhidlərimizə verilən ən yüksək qiymət olduğunu
bildirib. İcra başçısı rayonumuza gələn qonaqların fəxr yerimiz
olan bu müqəddəs məkana baş çəkdiyini, igid oğullarımızın şəkli əks olunmuş
lövhə önündən keçərək əziz xatirələrini ehtiramla yad etdiklərini qeyd edib.
Rayonumuzda keçirilən tədbirlərin öncə bu müqəddəs məkanı ziyarətlə
başlamasını, məktəblilərin mütəmadi olaraq xiyabanı ziyarət etməsini gələcək
nəsillərin vətənpərvər ruhda tərbiyə olunmasında atılan uğurlu addım kimi
qiymətləndirib və böyük rol oynadığını vurğulayıb. Fərəhli kəndinin də xeyli sayda şəhid verdiyini
bildirən rayon rəhbəri bu kəndin oğlu olan Aprel şəhidimiz kapitan Mühüd
Orucovun keçdiyi döyüş yolundan söz açaraq onun əziz xatirəsinin hər zaman yad
olunduğunu, daim qəlblərdə yaşadığını bildirib. Şəhərin mərkəzində yerləşən
Şəhidlər Xiyabanında şəklinin əks olunduğu lövhənin vurulduğunu, yenə də
şəhərin mərkəzində və doğulduğu kənddə adına bulaqlar tikildiyini diqqətə
çatdırıb. Rayon rəhbəri qeyd edib ki, ölkə başçısının rəhbərliyi altında bu gün
görülən bütün işlər, həyata keçirilən genişmiqyaslı layihələr, əldə edilən
bütün uğurlar bir amala və məqsədə xidmət edir ki, onun da kökündə vətəndaş
amili dayanır. Hər bir iş vətəndaş üzərində qurulub və onların rifah halının
yaxşılaşdırılmasına yönəlib. Aztəminatlı ailələrə
birdəfəlik yardım verilməsi haqqında Azərbaycan Respublikası Prezidentinin 19
dekabr 2018-ci il tarixli Sərəncamını bu sahədə görülən işlərin əyani sübutu
kimi qiymətləndirən rayon rəhbəri əhalinin sosial rifah halının
yaxşılaşdırılması istiqamətində atılan uğurlu addım olduğunu bildirib. İcra başçısı rayonda mövsümlə əlaqədar olaraq istər elektrik enerjisinin
gərginliyinin, istərsə də qazın təzyiqinin normal səviyyədə olması üçün
məqsədyönlü işlər görüldüyünü və bununla bağlı aidiyyəti üzrə tapşırıqlar
verildiyini qeyd edib. Bildirib ki, rayonda əhalinin yüksək keyfiyyətli
elektrik enerjisi ilə təmin olunması üçün müsbət işlər görülür ki, bunlardan
biri də müasir tələblərə cavab verən yeni transformatorların və elektrik
xətlərinin çəkilməsi, SİP kabelləşmə işinin
aparılmasıdır. Bu gün sərhəd kəndlərindən olan Məzəm, Quşçu Ayrım, Cəfərli,
Bala Cəfərli kəndlərində bu işin başa çatdığını, Fərəhli kəndində isə davam
etdiyini bildirib. Rayon rəhbəri qeyd edib ki, kənd təsərrüfatının inkişaf etdirilməsi,
məhsuldarlığın artırılması istiqamətində görülən məqsədyönlü işlərin
nəticəsidir ki, son 2 il yarım ərzində əkin sahələrində xeyli sayda artım
olmuşdur. 2016-cı ildə əkin sahəsi 16520,6 hektar olmuşdursa, 2019-cu ildə
21476,30 hektarda əkin işlərinin aparılması nəzərdə tutulmuşdur. Rayon rəhbəri
bildirib ki, digər kəndlərdə olduğu kimi, Fərəhli kəndində əkin sahələri ildən-ilə
genişləndirilir. Əgər 2018-ci ildə kənddə 530,2 hektar sahədə əkin aparılmışdırsa,
bu il 564 hektarda nəzərdə tutulub. Bu günə kimi 480 hektar torpaq sahəsi
şumlanmışdır. 101 hektar sahədə buğda, 345 hektar sahədə arpa olmaqla, 446
hektar sahədə səpin aparılmışdır. Rayonumuzda tütünçülüyün inkişaf etdirilməsi istiqamətində görülən işlərin Fərəhli
kəndində də uğurla həyata keçirildiyini bildirən icra başçısı bu il kənddə 4
hektar ərazidə tütün əkildiyini bildirib. Həmin hektardan 6,533 ton məhsul təhvil
verildiyini qeyd edib. Kənd sakinlərindən -
Fərəhli kənd ümumi orta məktəbin Azərbaycan dili və ədəbiyyat müəllimi Əsmər
Məmmədova, tarix-coğrafiya müəllimi Alı Həsənov, Mustafa Abdullayev, Nürəddin
Məmmədov, Bafadar Məmmədov, Nigar Mustafayeva, Svet Məmmədova, Ziyaddın
Məmmədov və başqaları çıxış edərək qeyd
ediblər ki, bizim
xoşbəxtliyimiz ondadır ki, müstəqil, azad dövlətdə Azərbaycan Respublikasının
vətəndaşı kimi yaşayırıq və bunu qiymətləndirməliyik, müstəqilliyi hər şeydən
üstün tutmalıyıq. Respublikamızda, eləcə də Qazax rayonunda görülən genişmiqyaslı işlər
isə göz qabağındadır. İstər respublikamızda, istərsə də rayonumuzda olan bu
inkişafı yüksək qiymətləndirən kənd sakinləri buna görə Prezident İlham Əliyevə
dərin minnətdarlıqlarını bildiriblər. Çıxış edən sakinlər ötən müddət ərzində Qazaxda həyata
keçirilən abadlıq və quruculuq işlərini böyük sevinc hissi ilə qarşıladıqlarını
qeyd ediblər. Digər kəndlərdə olduğu kimi, Fərəhli kəndində də abadlıq
işlərinin aparıldığını bildirərək, xüsusilə kəndarası yollara qum-çınqıl
döşənməsinə, kənddə marşurut məsələsinin həll olunmasına görə rayon
rəhbərliyinə təşəkkürlərini çatdırıblar. Keçirilən səyyar görüşü yüksək qiymətləndirən kənd sakinləri minnətdarlıqla
yanaşı, öz arzu və istəklərini çatdırıb, onları narahat edən bir sıra
məsələlərdən də söz açıblar. Sakinlər tərəfindən səsləndirilən müraciətləri dinləyən
rayon rəhbəri qaldırılan hər bir məsələyə diqqətlə baxılacağını bildirib. İcra başçısı Rəcəb Babaşov görüşə yekun vuraraq bir daha bütün kənd
sakinlərini qarşıdan gələn yeni il münasibətilə təbrik edib, müstəqil
Azərbaycanın çiçəklənməsi, gündən-günə inkişaf etməsi naminə yeni-yeni
nailiyyətlər qazanmağı arzulayıb. Rayon rəhbəri bildirib ki, ölkə başçısı İlham
Əliyevin siyasətinin təməlində xalqa xidmət dayanır. Biz də öz işlərimizi bundan
sonra da həmin təməl üzərində quraraq uğurla həyata keçirəcəyik. GOYEZEN.AZ
Facebook-da paylaş