İyulun 14-də Azərbaycan Respublikasının Mədəniyyət Nazirliyi, Heydər Əliyev Fondu, Azərbaycan Yazıçılar Birliyi (AYB) və Qazax Rayon İcra Hakimiyyətinin birgə təşkilatçılığı ilə Qazaxda Vaqif Poeziya Günləri çərçivəsində Azərbaycan ədəbiyyatının görkəmli nümayəndələrindən biri, dərin fəlsəfi yaradıcılığı və orijinal ədəbi üslubu ilə tanınan Xalq yazıçısı Yusif Səmədoğlunun anadan olmasının 90 illiyinə həsr olunmuş konfrans keçirilib.

Qazax Müəllimlər Seminariyası ADA Universiteti Qazax Mərkəzində təşkil olunmuş konfransda Qazax Rayon İcra Hakimiyyətinin başçısı Rəcəb Babaşov, icra aparatının məsul şəxsləri, Azərbaycan Respublikası Milli Məclisinin Beynəlxalq münasibətlər və parlamentlərarası əlaqələr komitəsinin sədri, Avropa İttifaqı Parlament Əməkdaşlıq Komitəsindəki nümayəndə heyətinin rəhbəri Səməd Seyidov, köməkçisi Akif Əmirov, Azərbaycan Yazıçılar Birliyinin (AYB) katibi Səlim Balbullaoğlu, AYB-də Poeziya sektorunun rəhbəri İbrahim İlyaslı, professor, tənqidçi, ədəbiyyatşünas Rüstəm Kamal, gənc şair, “Ulduz” jurnalının şöbə müdiri Taleh Mansur, şairə Xatirə Fərəcli, şəhid ailələri, ziyalılar, təhsil, mədəniyyət işçiləri, ictimaiyyət və KİV nümayəndələri iştirak ediblər.

Tədbirin aparıcısı, Azərbaycan Yazıçılar Birliyinin Qazax bölməsinin sədri, Əməkdar incəsənət xadimi, şair Barat Vüsal konfransı açıq elan edərək iştirakçıları və qonaqları salamlayıb, səmimi ürək sözlərini bölüşüb. B.Vüsal bu gün Qazaxdan start götürən Vaqif Poeziya Günlərinin təməlinin Ümummilli Lider Heydər Əliyevin təşəbbüsü ilə 1982-ci ildə Şuşada qoyulduğunu bildirib. Məhz həmin tarixdə Ulu Öndərin iştirakı ilə Molla Pənah Vaqifin məqbərəsi və Poeziya Evinin təntənəli şəkildə açıldığını və onun tapşırığı ilə Vaqif Poeziya Günlərinin keçirilməsinə qərar verildiyini qeyd edib. Şair vurğulayıb ki, 1991-ci ilə qədər hər il təşkil olunan bu poeziya bayramı ənənəvi olaraq şairin Vətəni Qazaxdan başlayır və Şuşanın əsrarəngiz Cıdır düzündə başa çatırdı. Şair Şuşa düşmən tapdağında olduğu dövrdə də Vaqif Poeziya Günlərinin Qazaxda keçirildiyini, əsasını Ulu Öndərin qoyduğu ənənənin davam etdirildiyini söyləyib. B.Vüsal Respublika Prezidenti İlham Əliyevin rəhbərliyi ilə rəşadətli Azərbaycan Ordusunun şanlı Qələbəsi nəticəsində Şuşa şəhəri işğaldan azad olunduqdan sonra Vaqif Poeziya Günlərinin yenidən Azərbaycanın mədəniyyət paytaxtında keçirilməyə başlandığını, hər il olduğu kimi, bu il də Vaqif Poeziya Günlərinin poeziya, ədəbiyyat və mədəniyyət həvəskarlarına unudulmaz anlar yaşadacağını diqqətə çatdırıb. İyulun 15-də Gəncə şəhərində, iyulun 16-da isə Ağdam rayonunda davam edəcək Poeziya Günlərinin iyulun 17-18-də Azərbaycanın mədəniyyət paytaxtı Şuşa şəhərində yekunlaşacağını, xalqımızın daha bir poeziya bayramına şahidlik edəcəyini bildirib. B.Vüsal Vaqif Poeziya Günləri çərçivəsində Azərbaycan ədəbiyyatının görkəmli nümayəndələrindən olan Xalq yazıçısı Yusif Səmədoğlunun anadan olmasının 90 illiyinə həsr olunmuş konfransın keçirilməsinin mühüm əhəmiyyət daşıdığını söyləyib. “Yusif Səmədoğlu hər şeydən öncə yaxşı insan idi, yaxşılıq simvolu idi. Yusif Səmədoğlu şair ailəsində doğulduğu üçün yazıçı olmamışdı, o, yazıçı olmaq üçün doğulmuşdu”, - deyən B.Vüsal Xalq yazıçısı haqqında, onun həyat və yaradıcılığı barədə fikirlərini bölüşüb.  

Qazax Rayon İcra Hakimiyyətinin başçısı Rəcəb Babaşov giriş sözü ilə çıxış edərək tədbir iştirakçılarını salamlayıb, səmimi ürək sözlərini bölüşərək şairlər, aşıqlar, tarixi şəxsiyyətlər yurdu, Qərbin qapısı hesab edilən Qazaxda keçirilən tədbirdə onları görməkdən məmnunluq hissi duyduğunu söyləyib. İcra başçısı bu gün möhtəşəm bu təhsil məbədində daha bir qazaxlı ziyalı, Vəkilovlar nəslinin nümayəndəsi, yazıçı, ictimai xadim, Azərbaycan nəsrinin görkəmli simalarından olan Xalq yazıçısı Yusif Səmədoğlunun 90 illik yubileyinə həsr olunmuş konfransın keçirildiyini qeyd edib. İcra başçısı bildirib ki, Yusif Səmədoğlu XX əsr Azərbaycan ziyalılığının ən ali keyfiyyətlərini öz şəxsiyyətində daşıyan, mənsub olduğu nəsli təmsil edən bir insan olmuşdur. O, həyatı boyu, həm ədəbi, həm də ictimai-siyasi fəaliyyətində azərbaycançılıq mövqeyində durmuş, azadlıq, demokratiya, müstəqillik duyğusu ilə yaşamışdır. Millilik, milli-mənəvi dəyərlərimizin qorunub saxlanılması, milli mədəniyyətin, milli əxlaqın gənc nəslə çatdırılması baxımından onun əsərləri dəyərli və güclüdür. Yazıçı azad, müstəqil və mədəni həyat yolu keçmişdir. Onda Vətən sevgisi güclü idi. O, həyati mövzular yazmış, zamanın nəbzini tutaraq günün mühüm məsələlərinə toxunmuş, mənəvi-ictimai problemləri ön plana çəkmiş, dövrün, yaşadığı mühitin eybəcərliklərini ifşa və tənqid hədəfinə çevirmişdir. Azərbaycan mədəniyyətinin inkişafında böyük xidmətləri olmuş yazıçının "Azərbaycan" və "Ulduz" jurnallarının baş redaktoru, Yazıçılar Birliyinin katibi kimi işləyərkən gənc nəslin istedad və bacarıqlarının üzə çıxarılmasında, onların milli ruhda formalaşmasında, ziyalıların düzgün istiqamətləndirilməsində də müstəsna rolu olmuşdur. Onun keçdiyi şərəfli ömür yolu həqiqi mənada nəsillərə nümunədir. Yazıçının 16 hekayəsi və 1 “Qətl günü” romanı nəşr edilmişdir. Roman 2014-cü ildə “XX əsrin ən yaxşı Azərbaycan romanı” nominasiyasına layiq görülmüşdür. Ölümündən sonra 1999-cu ildə işıq üzü görən “Deyilənlər gəldi başa. Hekayələr və romanlar” kitabı onun ailə üzvləri, dostları, həmkarları, qələm yoldaşları və sözsüz ki, sadiq oxucuları üçün xüsusi dəyərə malikdir. Hər birimizə məlumdur ki, Ümummilli Lider Heydər Əliyev Azərbaycan ədəbiyyatına, ədəbiyyat xadimlərinə daim xüsusi qayğı və həssaslıqla yanaşmışdır. Xalq yazıçısı Yusif Səmədoğlunun  da yaradıcılığı, fəaliyyəti daim Ulu Öndərin diqqət mərkəzində olmuşdur. Ümummilli Lider Heydər Əliyev Yusif Səmədoğlunun 60 illik yubleyi ilə bağlı çıxışında ədibin yaradıcılığına yüksək qiymət verərək bildirmişdi: "Yusif Səmədoğlu bizim millətimizin xoşbəxt insanlarından biridir. Çünki o, böyük şair, böyük insan, böyük alim Səməd Vurğunun oğludur. Səməd Vurğunun övladı olmaq, onun tərbiyəsini almaq, onun ailəsində böyümək özü böyük bir nemətdir, böyük bir xoşbəxtlikdir. Bəlkə elə bu bəs olardı. Ancaq bununla yanaşı, bu kökün üstündə, bu ailə ab-havasının içində böyüyüb, ərsəyə gəlib atasının yolunu davam etdirmək və cəmiyyətdə özünəməxsus, məhz özünəməxsus yer tutmaq, - bu, böyük xoşbəxtlikdir, cəmiyyətimizin içində insan üçün, şübhəsiz ki, nemətdir...” Yusif Səmədoğlunun xəstəliyindən xəbər tutan Ulu Öndər onun sağalması üçün bütün mümkün imkanlardan istifadə etmiş, yazıçının müalicəsi ilə bağlı xüsusi göstəriş vermişdi. Lakin bütün cəhdlərə baxmayaraq, Yusif Səmədoğlu 1998-ci il avqustun 16-da dünyaya gözünü əbədi yumdu və böyük yazıçı Fəxri xiyabanda dəfn edildi. Əlbəttə ki, yazıçının xatirəsi günümüzdə də dərin ehtiramla anılır. Ötən dövr ərzində yazıçının 70 illiyi, 80 illiyi yüksək səviyyədə qeyd edilmişdir. Bu onun göstəricisidir ki, görkəmli yazıçı, tanınmış ictimai xadim və səmimi insan Yusif Səmədoğlunun əziz xatirəsi xalqımızın qəlbində həmişə yaşayır və yaşayacaq!.

Azərbaycan Respublikası Milli Məclisinin Beynəlxalq münasibətlər və parlamentlərarası əlaqələr komitəsinin sədri, Avropa İttifaqı Parlament Əməkdaşlıq Komitəsindəki nümayəndə heyətinin rəhbəri Səməd Seyidov çıxış edərək tədbir iştirakçılarını salamlayıb, səmimi ürək sözlərini bölüşərək konfransın işinə uğurlar arzulayıb. Millət vəkili Qazaxda keçirilən tədbirlərin yüksək səviyyədə təşkil olunmasına görə rayon rəhbərliyinə ziyalılar adından razılığını ifadə edib. ADA Universitetinin "Bir müəllimin manifesti” təşəbbüsü çərçivəsində tariximizin incisi olan Qazax Müəllimlər Seminariyasının binasını bərpa etməsini, Qazax Müəllimlər Seminariyası ADA Universiteti Qazax Mərkəzi kimi fəaliyyət göstərməsini, bu gün ali təhsil ocağında tələbələrin təhsil almasını Qazaxda təhsil sahəsinə olan qayğının bariz nümunəsi kimi qiymətləndirib. Millət vəkili bütün bu işlərə və Qazaxın timsalında bölgələrimizdə təhsil sahəsinə göstərilən dövlət qayğısına görə rayon ictimaiyyəti, ziyalılar, təhsil işçiləri adından ölkə başçısı İlham Əliyevə, Birinci vitse-prezident Mehriban xanım Əliyevaya, ADA Universitetinin rektoru Hafiz Paşayevə təşəkkürünü çatdırıb. “Bu gün Qazaxımız şeiri, sözü, təhsili, şəxsiyyətləri, Yusif Səmədoğlu, Vaqif Səmədoğlu, Səməd Vurğun kimi ziyalıları ilə elə bir yüksək zirvəyə qalxıb ki, bu, ümumilikdə Azərbaycan poeziyasının zirvəyə qalxması deməkdir”, - deyən millət vəkili qazaxlı olması ilə fəxr etdiyini dilə gətirib.

Azərbaycan Yazıçılar Birliyinin (AYB) katibi Səlim Balbullaoğlu çıxış edərək tədbir iştirakçılarını Azərbaycan Yazıçılar Birliyinin sədri, Xalq yazıçısı Anarın adından salamlayıb, səmimi ürək sözlərini çatdırıb. Vaqif Poeziya Günləri və Xalq yazıçısı Yusif Səmədoğlu barədə ürək sözlərini bölüşən natiq bu günün əhəmiyyətindən söz açıb.

AYB-də Poeziya sektorunun rəhbəri İbrahim İlyaslı çıxış edərək tədbir iştirakçılarına səmimi ürək sözlərini çatdırıb. Azərbaycan ədəbiyyatının görkəmli nümayəndələrindən olan Xalq yazıçısı Yusif Səmədoğlunun həyat və yaradıcılığı haqqında fikir bildirməyin böyük məsuliyyət olduğu qədər, həm də qürurverici olduğunu söyləyib. Natiq Yusif Səmədoğlunun fəaliyyəti dövründə Azərbaycan ədəbiyyatına bəxş etdiyi töhfədən, “Ulduz” jurnalından da söz açıb. Yazıçının “Qətl günü” romanı haqqında fikirlərini bölüşən natiq həmin əsərin bu gün də maraqla oxunduğunu söyləyib. Natiq sonda Yusif Səmədoğluna həsr etdiyi şeiri səsləndirməklə əziz xatirəsini ehtiramla anıb. 

Professor, tənqidçi, ədəbiyyatşünas Rüstəm Kamal, AYB Qazax bölməsində ədəbi məsləhətçi Mustafa Rasimoğlu, şairə Xatirə Fərəcli, Ağstafada fəaliyyət göstərən Hüseyn Arif Ədəbi Məclisinin rəhbəri Saqif Qaratorpaq, AYB-nin üzvlərindən şairə Tamella Poladlı, gənc şair, “Ulduz” jurnalının şöbə müdiri Taleh Mansur, gənc şair Rüfət Axundlu çıxış edərək Qazaxdan start götürən Vaqif Poeziya Günləri, bu bayram çərçivəsində anadan olmasının 90 illiyini qeyd etdiyimiz Azərbaycan ədəbiyyatının görkəmli nümayəndələrindən biri, dərin fəlsəfi yaradıcılığı və orijinal ədəbi üslubu ilə tanınan Xalq yazıçısı Yusif Səmədoğlunun həyat və yaradıcılığından danışıblar. Çıxış edənlər yazıçının yaradıcılığı, xüsusilə XX əsr Azərbaycan ədəbiyyatının şah əsərlərindən sayılan “Qətl günü” romanı, həmçinin müəllifin yazdığı ssenarilər ətrafında geniş söhbət açıblar. Çıxışlarda Yusif Səmədoğlunun ədəbi irsinin çağdaş dövrdə də aktuallığını qoruduğu, onun əsərlərinin dərin fəlsəfi və mənəvi qatlara malik olduğu vurğulanıb. Bugünkü konfransın Yusif Səmədoğlunun zəngin ədəbi irsinin təbliği və yeni nəsil oxuculara tanıdılması baxımından mühüm əhəmiyyət daşıdığı bildirilib.