Qazaxda Vətən müharibəsi şəhidlərinin xatirəsinə həsr olunmuş sərbəst güləş üzrə Uşaq-Gənclər İdman Məktəbinin birinciliyi keçirilib
İyunun 18-də Qazax Rayon
Gənclər və İdman İdarəsinin və idarənin nəzdində fəaliyyət göstərən Uşaq-Gənclər
İdman Məktəbinin birgə təşkilatçılığı ilə Vətən müharibəsi şəhidlərinin xatirəsinə
həsr olunmuş sərbəst güləş üzrə UGİM-nin birinciliyi keçirilib. Qazax rayon Araz
Əmilov adına Daş Salahlı kənd 1 nömrəli tam orta məktəbin idman zalında 2010-2011-ci
il təvəllüdlü yeniyetmələr arasında keçirilən yarışda qalib adı uğrunda 144 nəfər
idmançı mübarizə aparıb. Yarışdan əvvəl Daş
Salahlı kənd Şəhidlər xiyabanında uyuyan şəhidlərimizin məzarları ziyarət
olunaraq gül dəstələri düzülüb, əziz xatirələri ehtiramla anılıb.
Yarışın açılış mərasimində
əvvəlcə Azərbaycan Respublikasının Dövlət Himni səsləndirilib, şəhidlərimizin əziz
xatirəsi 1 dəqiqəlik sükutla yad edilib. Qazax Rayon Gənclər və
İdman İdarəsinin rəis müavini Sahib Namazov, Qazax Rayon Gənclər və İdman İdarəsinin
nəzdində UGiM-nin məşqçi-müəllimləri, sərbəst güləş üzrə SSRİ idman ustası, Əməkdar
məşqçi, Qarabağ müharibəsi veteranı Fazil İsmayılov, sərbəst güləş üzrə SSRİ
idman ustası, Əməkdar məşqçi, Qarabağ müharibəsi veteranı, ehtiyatda olan
kapitan Müşviq Eyyubov, Qarabağ müharibəsi veteranı Eldəniz Əlvəndov, Qarabağ
müharibəsi qazisi Xaliq Həsənov çıxış edərək şəhidlik zirvəsinin müqəddəsliyindən
danışıb, Vətən uğrunda canlarını fəda edən bütün şəhidlərimizin xatirəsinin
xalqımızın qəlbində daim yaşayacağını bildiriblər. Bu cür yarışların keçirilməsində
əsas məqsədin şəhidlərimizin xatirəsini əbədiləşdirmək, onların şərəfli həyat
yolunu təbliğ etmək, yeniyetmələr arasında vətənpərvərlik hissini gücləndirmək,
ümumtəhsil məktəblərində təhsil alan şagirdlərin asudə vaxtının səmərəli təşkili,
onlarda idmana olan marağın artırılmasından ibarət olduğunu qeyd edərək, yarış
iştirakçılarına uğurlar arzulayıblar.
Sonra Vətən müharibəsi
şəhidi, ölümündən sonra "Vətən uğrunda”, "Şuşanın azad olunmasına
görə”, "Hərbi xidmətlərə görə”, "Xocavəndin azad olunmasına görə” medalları ilə
təltif olunmuş leytenant Mayis Yaqubovun atası Rəhim Yaqubov şəhid ailələrinə
göstərilən xüsusi diqqət və qayğıya görə ölkə Prezidenti İlham Əliyevə, Birinci
vitse-prezident Mehriban Əliyevaya, rayon rəhbərliyinə minnətdarlığını
bildirib. Şəhidlərimizin xatirəsinə həsr olunmuş tədbirə görə təşkilatçılara razılığını
ifadə edib. Gərgin və maraqlı
idman mübarizəsi şəraitində keçən yarışda 1,2,3 yerləri tutmuş idmançılar təşkilatçılar tərəfindən müvafiq Diplom və
medallarla təltif olunublar.
GOYEZEN.AZ
Facebook-da paylaş