“Qəhrəmanlar unudulmur" devizi altında keçirilən mini futbol turniri başa çatıb
2022-ci
il 4-8 aprel tarixlərdə "Gəncliyin Təşəbbüsü” Maarifləndirmə İctimai
Birliyi Azərbaycan Respublikasının Qeyri-Hökumət Təşkilatlarına Dövlət
Dəstəyi Agentliyinin dəstəyi ilə "Vətən müharibəsi şəhidlərini tanıyaq və tanıdaq”
adlı layihəsinin icrası çərçivəsində 44 günlük Vətən müharibəsi zamanı Qazax
rayonundan olan 51 şəhidimizin xatirəsinə həsr olunmuş mini futbol üzrə
turnir keçirilib. Aprelin 8-də turnirin açılışı və final görüşləri olub.
Əvvəlcə Azərbaycan Respublikasının suverenliyi, torpaqlarımızın azadlığı
uğrunda şəhid olmuş bütün qəhrəmanların əziz xatirəsi bir dəqiqəlik sükütla yad
edilib. Layihənin rəhbəri, Əməkdar məşqçi Azər Əliyev turnir
və donor haqda ətraflı məlumat verərək final iştirakçılarına uğurlar arzulayıb. "Azərbaycan Qarabağ
Müharibəsi Əlilləri, Veteranları və Şəhid Ailələri” İctimai Birliyinin Qazax
rayon şöbəsinin sədri Xasay Balayev,Azərbaycan Respublikası Müharibə, Əmək və Silahlı Qüvvələr
Veteranları Şurasının Qazax rayon şöbəsinin sədri Azər Məmmədov, qazi Kamran
Alməmmədov çıxış edərək şəhidlərimizin şərəfli yolu haqda danışıb, vətənpərvər
çıxışlar edərək gənclərə uğurlar arzulayıblar. Şəhidlərimizlə bağlı bu cür
layihələrin təşkil olunmasını yüksək qiymətləndiriblər. Çıxışlardan
sonra final görüşünə start verilib. Gərgin idman mübarizəsi şəraitində keçən turnirdə
üçüncü yer uğrunda Qazax şəhər Səməd Vurğun adına 2 nömrəli tam orta məktəbin
komandası ilə Qazax rayon Alı Mustafayev adına Qazaxbəyli kənd tam orta
məktəbin komandası qarşılaşıb. Görüş 8-5
hesabı ilə 2 nömrəli məktəbin xeyrinə başa çatıb. Qazax şəhər Səlim
Əfəndiyev adına 1 nömrəli tam orta məktəbin komandası ilə Qazax rayon İsmayıl
Şıxlı adına Kosalar kənd tam orta məktəbin komandası birinci yer uğrunda
mübarizə aparıblar. 4-3 hesabı ilə başa çatan görüşün qalibi 1 nömrəli
məktəbin komandası olub. Yekun
nəticələrə görə Qazax şəhər Səlim Əfəndiyev adına 1 nömrəli tam orta məktəbin
komandası I yerin, Qazax rayon İsmayıl Şıxlı adına Kosalar kənd tam orta
məktəbin komandası II yerin, Qazax şəhər Səməd Vurğun adına 2 nömrəli
tam orta məktəbin komandası isə III yerin qalibi olub. Qaliblər medal və diplomlarla
mükafatlandırılıblar. Turnirin sonunda
iştirakçılar və şəhid ailə üzvləri Azərbaycan Respublikasının Qeyri-Hökumət
Təşkilatlarına Dövlət Dəstəyi Agentliyinə dəstək verdikləri üçün öz
minnətdarlıqlarını bildiriblər. Belə turnirlərin tez-tez keçirilməsini arzu
ediblər.
GOYEZEN.AZ
Facebook-da paylaş