2 Fevral - Gənclər Gününün 25 illiyinə həsr olunmuş "Gələcəyə əmin addımlarla" başlığı altında toplantı keçirilib
Yanvarın 28-də Azərbaycan Respublikası Gənclər
və İdman Nazirliyinin təşəbbüsü ilə 2 Fevral - Gənclər Gününün 25 illiyinə həsr
olunmuş "Gələcəyə əmin addımlarla" başlığı
altında toplantı keçirilib. "Gənclər
həftəsi" çərçivəsində keçirilən tədbir Qazax Rayon Gənclər və
İdman İdarəsi və "Qazax Gənclər evi” sosial xidmət müəssisəsinin birgə
təşkilatçılığı ilə reallaşıb. Qazax Gənclər evində təşkil olunan tədbirdə əvvəlcə
Vətən uğrunda canlarından keçmiş şəhidlərin əziz xatirəsi bir dəqiqəlik sükutla
yad edilib.
Tədbiri giriş sözü ilə açan
Qazax Rayon Gənclər və İdman İdarəsinin rəisi Vüqar Nəbiyev tədbir
iştirakçılarını salamlayıb, 2 Fevral - Gənclər Günü
münasibətilə səmimi təbriklərini çatdırıb. V.Nəbiyev qeyd edib ki, 44
gün davam edən müharibə dövründə "Dəmir yumruq" əməliyyatı həyata
keçirən ölkəmiz erməni işğalçılarını diz çökdürdü. Nəticədə Ermənistan
kapitulyasiya aktını imzalamağa məcbur oldu. İkinci Qarabağ müharibəsi
Azərbaycan tarixinə qızıl hərflərlə yazıldı. Azərbaycanın
qəhrəman oğulları otuz ilə yaxın bir müddət ərzində düşmən tapdağı altında olan
torpaqlarımızı işğaldan azad etməklə Azərbaycan xalqına böyük qələbə yaşatdı. V.Nəbiyev
bildirib ki, bu gün Azərbaycan bütün dünyada qalib
bir ölkə kimi tanınırsa, şanlı ordumuzun gücü, qüdrəti
sayəsində işğalda olan torpaqlarımız azad edilibsə, buna görə bir vətəndaş
olaraq hər birimiz Ali Baş Komandan İlham Əliyevə, torpaqlarımız uğrunda canını
fəda edən əsgər və zabitlərimizə, sağlamlığını itirən qazilərimizə minnətdar
olmalı, qanları ilə dastan yazan şəhidlərimizin ruhları qarşısında baş əyməliyik.
Vətən naminə döyüşən və yaralanan qazilərimizlə, canlarından keçən şəhidlərimizlə
hər zaman qürur duymalı, onları tanımalı və tanıtmalıyıq. Azərbaycanın
bütövlüyü, toxunulmazlığı və azadlığı uğrunda canından keçən şəhidlərimizin
ömür yolu bütün gənclərə örnəkdir. Onları tanımaq, xatirələrini əbədi tutmaq isə
hər bir azərbaycanlının vətəndaşlıq borcudur. Daha
sonra "Qazax Gənclər evi” sosial xidmət müəssisəsinin direktoru
Vüsal Hüseynov, "Döyüşdə fərqlənməyə görə”, "Cəsur döyüşçü” medalları ilə təltif edilmiş, Vətən müharibəsi
iştirakçısı, qazi Cavid Musayev, Qazax Rayon
Gənclər və İdman İdarəsinin
könüllüləri Aycun Quliyeva və Süleyman Süleymanov çıxış edərək 44 günlük Vətən
müharibəsindən, qazandığımız tarixi Qələbədən söz açıblar. Qanları ilə tarix
yazan oğullarımızla, gənclərimizlə fəxr etdiklərini dilə gətiriblər. Sonda Real
TV-nin təşkilatçılığı ilə lentə alınan "Dəmir Yumruq” sənədli filmi
nümayiş etdirilib. Filmdə Azərbaycanın cənubunda, şimalında, şərqində və qərbində
yaşayan azsaylı xalqların gənc oğullarının Vətənin çağırışına necə sevgiylə
cavab verdiklərindən bəhs edilir. Həmçinin filmdə Azərbaycan Respublikasının
Prezidenti, Ali Baş Komandan İlham Əliyevin rəhbərliyi ilə 44 gün davam edən və
Azərbaycanın tarixi Qələbəsi ilə başa çatan Vətən müharibəsində Silahlı Qüvvələrimiz
tərəfindən əks-hücum əməliyyatları zamanı ölkəmizdə yaşayan milli azlıqların
nümayəndələrinin yumruq tək birləşərək göstərdikləri qəhrəmanlıq nümunələri əksini
tapıb.
GOYEZEN.AZ
Facebook-da paylaş