Lənkəran rayonu ilə tanışlıq qazaxlı məktəblilərdə zəngin təəssürat oyadıb
"Ölkəmizi
tanıyaq” devizi ilə keçirilən maarifləndirici tur-aksiyanın iştirakçısı olan qazaxlı
məktəblilər Gəncə şəhərinin, paytaxtın Xətai və Səbail, eləcə də Gədəbəy, Samux, Daşkəsən,
Şəmkir, Ağstafa rayonlarının
məktəbliləri ilə birlikdə bu gün Lənkəran rayonuna səyahət ediblər. GOYEZEN.AZ tur rəhbəri Kəmalə Cəfərovanın verdiyi məlumata əsasən xəbər verir ki,
tur-aksiyanın iştirakçıları səhər yeməyindən sonra Lənkərandakı "Xanbulan”
istirahət mərkəzi və Hirkan Milli Parkı, eyni zamanda şəhərlə tanış olublar. Hirkan
Milli Parkının direktoru Azər Mirzəyev məktəblilərə məlumat verərək bildirib ki,
bu park Respublika Prezidenti İlham Əliyevin 9 fevral 2004-cü il tarixli Sərəncamı
ilə yaradılıb. Milli Park Hirkan qoruğunun və qoruğa bitişik meşə fondunun
ərazisini əhatə edir. Azərbaycan Respublikasının cənub-şərqində, Xəzər dənizi
sahilində, 3 rayonda - Lerik, Astara və Lənkəran inzibati ərazisində yerləşir.
40 min 358 hektar ərazisi vardır. Ekologiya
və Təbii Sərvətlər Nazirliyinin təklifi əsasında Hirkan Milli Parkı YUNESKO-nun
Ümumdünya Mədəni və Təbii İrs Siyahısına daxil edilməsi üçün qeydiyyata alınıb.
Bildirib ki, Hirkan Milli Parkı çoxlu sayda endemik relikt növlərin mövcud
olduğu təbiət muzeyidir. Flora və fauna növləri ilə daha zəngindir. Bu muzeyin
yaşı min illərlə ölçülür. Direktor
qeyd edib ki, son vaxtlar parka əcnəbi turistlərin, respublikamızın müxtəlif
bölgələrindən olan məktəblilərin gəlməsi onu göstərir ki, Hirkan Milli Parkı
günü-gündən inkişaf edir, əlaqələrimiz genişlənir. Məktəblilər
Xanbulan kəndindəki göl, burada salınmış sitrus meyvə bağları və çay
plantasiyaları ilə də yaxından tanış olublar. Tur-aksiyanın iştirakçılarına
cənub bölgəsində çayçılığın inkişaf tarixi, müəssisədə aparılan elmi-tədqiqat
işləri, təcrübələr və onların nəticələri barədə ətraflı məlumat verilib. Günün
ikinci yarısında isə tur-aksiya iştirakçıları Lənkəran şəhərindəki Heydər
Əliyev Xatirə Parkında ümummilli liderin abidəsi önünə gül dəstələri düzərək xatirəsini
ehtiramla yad edib, ulu öndərin adını daşıyan Mərkəzdə böyük rəhbərin zəngin və
mənalı ömür yolunu əks etdirən eksponatlar və fotoşəkillərlə tanış olublar. Lənkəran
şəhərindəki "Qoşa Qala qapıları”, "Mayak” binası, "Dairəvi Qala”, Bayraq
Meydanı, Tarix-Diyarşünaslıq Muzeyi, Gənclər Mərkəzi ilə tanışlıq məktəblilərin
böyük marağına səbəb olub. Daha
sonra tur-aksiyanın iştirakçıları iki dəfə Sovet İttifaqı Qəhrəmanı, tank
qoşunları general-mayoru Həzi Aslanovun möhtəşəm abidəsini ziyarət edib,
qəhrəmanın Lənkəran şəhərindəki ev-muzeyində nümayiş etdirilən eksponatlarla
tanış olublar. Burada şagirdlərə igid qəhrəmanın İkinci Dünya müharibəsində
keçdiyi döyüş yolu barədə ətraflı məlumat verilib. Axşam
saatlarında məktəblilər "Palıdlı sahil” istirahət mərkəzində onlar üçün təşkil edilmiş müxtəlif əyləncəli
proqramlarda iştirak ediblər.
Facebook-da paylaş