Uşaq dünyamız
Bəli, mənim üçün ən önəmli,
yaddaqalan gün! Hansı ki, insan həyatının silinməz anı. Mən sizlərə rayonumuzun
gözəl ab-havası sayılan uşaq-körpə çağların firavan günlərini yada salmaq istərdim.
Belə bir sevincli, firavan günlərdən biri də rayonumuzda açılan 3 saylı körpələr
evi-uşaq bağçasının açılışında yaşandı desək lap yerinə düşər. Mən bu uşaq
bağçasının təntənəli açılış mərasimində Qazax şəhər 4 saylı tam orta məktəbin
bir müəllimi, valideyni kimi çıxış etdim. Bu çıxış mənim üçün olduqca fəxrdir,
sevincdir. Ona görə ki, bir vaxtlar 3 övladım bu bağçanın məzunu olub. İndi isə
bir nənə kimi çıxış etdim. Deyə bilərəm ki, körpəlik çağları, uşaq dünyası
insan yaddaşına həmişəlik həkk olunur. Körpə sevinci, körpə gülüşü hər bir
insanın ruhunu oxşayır. Doğrudan da az bir vaxtda
tikintisi başa çatmış, yeni avadanlıqlarla təchiz olunmuş və açılışını
etdiyimiz 3 saylı körpələr evi-uşaq bağçası da körpə dünyasını bəzəyir. Bütün
bunlar, məhz Prezidentimiz İlham Əliyev və onun xanımı Mehriban Əliyevanın körpələrə
olan qayğısından və "Uşaqlar bizim gələcəyimizdir” devizi altında verilən
fikirlərdən irəli gəlir. Bu fikri, şüarı əldə dəstək tutan rayonumuzun icra başçısı
Rəcəb Babaşovun adını fəxrlə çəkə bilərəm. Bu insan rayonumuza ayaq basdığı
gündən xeyirxah, xeyriyyəçi insan kimi tanındı. Hamının istəklisinə çevrildi.
Rayonumuzun hər sahədə abadlaşması Rəcəb müəllimin əsas amalı olmuşdur. Elə bu
amaldan biri də rayonumuzda istifadəyə verilən çoxsaylı körpələr evi-uşaq
bağçaları oldu. Həmin bağçalara misal olaraq son 2 ildə Qazaxbəyli kəndi ərazisində məcburi
köçkünlər üçün salınmış yeni qəsəbədə tikilmiş Aşağı Əskipara kənd körpələr
evi-uşaq bağçasını, şəhər bağçalarından 100 yerlik 1 saylı körpələr evi-uşaq
bağçası üçün yeni binanın tikilməsini, 2 saylı uşaq bağçasının, Daş Salahlı kənd
2 və 3 saylı, Kosalar kənd 2 və 3 saylı, Xanlıqlar kənd körpələr evi-uşaq
bağçalarının, Cəfərli kənd uşaq bağçasının əsaslı şəkildə yenidən qurulmasını,
Canalı, Quşçu Ayrım və Bala Cəfərli kənd uşaq bağçalarının əsaslı təmir
olunmasını göstərmək olar. Bundan başqa şəhər 6 saylı və İkinci Şıxlı kənd 2
saylı körpələr evi-uşaq bağçalarında da əsaslı şəkildə yenidənqurma işlərinin
başlanılması körpələrə olan diqqət və qayğını bir daha sübut edir. Mən bu açılışda hər bir körpənin
gözlərində sevinc, qəlblərində fərəh hissi hiss etdim. Valideynlərin uşaqları
üçün yaradılmış yeni bağçaya görə nə qədər sevindiyini duydum. Əllərində şar,
üçrəngli bayraq tutmuş bu balaca fidanlara isə sanki dünyanı bağışlamışdılar. Mən
bu bağçada hər bir uşağa təlim-tərbiyə göstərən müəllimlərdən ağızdolusu
danışmaq istərdim. Axı, körpə ilə davranmaq, onun dilini tapmaq müəllimdən cəsarət
tələb edir. Mən belə müəllimlərdən bağçanın müdiri Asya xanıma öz təşəkkürümü
bildirmək istərdim. Eyni zamanda bağçanın qabaqcıl, işgüzar müəllimlərindən Kəmalə.
Aygün, Təranə və Aynur kimi müəllimlərin öz təşəkkür payı var. Bu təşəkkür, təbrik payını məhz
nəvəmin söz dünyasından istifadə edərək sizlərə söyləyirəm. Axı, nəvə şirin nemətdir.
Qoy, hamı da mənim kimi, nənə adını daşısın və nəvəsinin şad günündə öz ürək
sözlərini söyləsinlər. Sevinirəm təzə adına, Sevinirəm körpə adına. Allah sizləri qorusun, Körpələrə sevinc, pənah gətirsin. Mən sonda bir daha bütün
valideynlər adından və ən əsası da bir nənə kimi Qazax rayonunda görülən
genişmiqyaslı tikinti-quruculuq və abadlıq işlərinə görə Respublika Prezidenti
İlham Əliyevə, Rayon İcra Hakimiyyətinin başçısı Rəcəb Babaşova öz dərin
minnətdarlığımı bildirirəm. Rayonda görülən hər bir işi və uşaqlara olan qayğını
yüksək qiymətləndirirəm. Nazilə SANIYEVA
Facebook-da paylaş