Məzəmdə istinad divarlarının çəkilişi başa çatıb
Vətən torpaqlarının ərazi bütövlüyü uğrunda 285 şəhid verən, 7 nəfər igid
oğlu Azərbaycanın Milli Qəhrəmanı adına layiq görülən, 168 km məsafədə düşmənlə
sərhəddi olan, Bağanıs Ayrım, Xeyrımlı, Barxudarlı, Sofulu, Qızılhacılı, Yuxarı
Əskipara və Aşağı Əskipara kimi 7 kəndi hələ də düşmən tapdağı altında qalan Qazaxda
Vətənin ərazi bütövlüyü, sərhəddə yaşayan sakinlərə göstərilən diqqət və qayğı
hər şeydən üstün tutulur.
25 ildən çoxdur
ki, rayonun işğal altında olan kəndləri ilə yanaşı, 5 kəndi də daim erməni
silahlı birləşmələrinin atəşi altındadır. Bunlardan sərhədə ən yaxın olanı isə
rayonun Məzəm kəndidir. Digər kənd sakinləri kimi Məzəmdə yaşayan sakinlər də düşmən
tərəfindən elan olunmamış müharibənin ağrı-acılarını yaşayırlar. Münaqişə
başlayan vaxtdan bəri 65 evdən ibarət olan bu kənd də 8 şəhid verib. Onlardan 4
hərbçi öz torpaqlarının müdafiəsi yolunda canından keçib. 4 nəfər kənd sakini
isə düşmən gülləsinin qurbanı olub. 1 nəfər kənd sakini Mərfət Nəsibov
Azərbaycanın Milli Qəhrəmanı adına layiq görülüb.
Qazax Rayon İcra Hakimiyyətinin başçısı Rəcəb
Babaşov rəhbər kimi fəaliyyətə başladığı ilk gündən düşmənlə sərhəddə yerləşən Məzəm
kəndi və orada yaşayan sakinləri daim diqqət mərkəzində saxlayır. Rayon rəhbərinin
sərhəd bölgəsində yaşayan məzəmlilərə qayğı ilə yanaşması, qarşılaşdıqları
problem və çatışmazlıqların yerindəcə həll etməsi, ən əsası da onlarla mütəmadi
olaraq görüşlər keçirməsi bunu bir daha sübut edir. Məhz bu qayğının
nəticəsidir ki, sakinlərin istər yaşayış şəraitlərinin yaxşılaşdırılması,
istərsə də təhlükəsizliklərinin təmin olunması istiqamətində əhəmiyyətli işlər
görülür.
Düşmənin 6 atəş
nöqtəsindən atəşə məruz qalan kənd sakinləri daim qorxu altında yaşayırdılar.
Hər zaman düşmən gülləsi ilə üz-üzə dayanan kənd sakinləri normal şəkildə
yaşaya bilmirdilər.
Rayon
rəhbərliyi elə ilk gündən yaranmış təhlükəli vəziyyəti nəzərə alaraq atəş
nöqtələrinə ən yaxın məsafədə yerləşən evlərin qarşısına müdafiə hasarlarının
çəkilməsi barədə göstəriş vermişdi. Ötən il kənddəki 21 evin qarşısına istinad
divarları çəkilmişdir. 1381 p/m uzunluğunda olan bu hasarlar kənd sakinlərini
düşmənin atdığı güllələrdən qoruyur. Daha yaşlı adamlarla yanaşı, uşaqlar da öz
evlərində rahat yaşaya bilirlər.
Sevindirici hal
isə odur ki, Məzəm kəndində evlərin qarşısına müdafiə hasarlarının çəkilməsi
işi bu il də davam etdirildi. İcra başçısı vətəndaşların müraciətlərini nəzərə
alaraq kənddə daha 12 evin qarşısına müdafiə hasarlarının çəkilməsi barədə
göstəriş verdi.
Artıq həmin evlərin
qarşısına istinad divarlarının çəkilməsi tam başa çatıb. Çəkilməsi nəzərdə
tutulan 238 p/m (714 kv.m) uzunluğu və 3 metr hündürlüyü olan bu müdafiə
hasarları sayəsində kənd sakinləri öz həyətlərində qorxusuz hərəkət edirlər. Evlərinin
qarşısına istinad divarları çəkilmiş sakinlərdən Vüqar Nəsibov, Rafiq Məmmədov,
Şofiq Məmmədov, Misir Məmmədov, Varis Məmmədov, Akif Məmmədov və başqaları
sərhəd kəndində yaşayan sakinlərə göstərilən diqqət və qayğıya, xüsusilə də
istinad divarlarının çəkilməsinə görə ölkə başçısı İlham Əliyevə bütün kənd
sakinləri adından dərin minnətdarlıqlarını bildirirlər. Onlara göstərdiyi
diqqət və qayğıya görə rayon rəhbərliyinə sonsuz təşəkkürlərini çatdırırlar.
Sakinlər qeyd
edirlər ki, bu gün biz rahat şəraitdə yaşayırıqsa, bizim təhlükəsizliyimiz üçün
bu cür istinad divarları çəkilirsə, bu, dövlətin və Prezidentin biz sadə
vətəndaşlara göstərdiyi qayğının bariz nümunəsidir. Minnətdarlıq dolu ürək
sözlərini çatdıran kənd sakinləri öz doğma kəndlərini hər an müdafiə etməyə və
Ali Baş Komandanın əmri ilə işğal altında olan torpaqlarımızı azad etməyə hazır
olduqlarını bildirirlər. GOYEZEN.AZ
Facebook-da paylaş