Qazaxda həm nəqliyyat vasitələrinin, həm də piyadaların rahat və təhlükəsiz hərəkəti yüksək səviyyədə təmin edilir
Ölkə Başçısının tapşırığına əsasən yol infrastrukturunun inkişafı istiqamətində həyata keçirilən məqsədyönlü tədbirlər respublikamızın hər yerində olduğu kimi, Qazax rayonunda da uğurla davam etdirilir. Bu istiqamətdə son iki il ərzində rayonun Kosalar, Canalı, Kommuna, Çaylı, Hüseynbəyli, Cəfərli kəndlərinə yeni asfalt yolların çəkilməsi bunun bariz nümunəsidir.
Sevindirici haldır ki, rayonda yeni yolların çəkilməsi ilə yanaşı, avtomobil yollarında həm nəqliyyat vasitələrinin, həm də piyadaların rahat və təhlükəsiz hərəkətini təmin etmək məqsədilə də bir sıra işlər görülür. Mütəmadi olaraq şəhərin prospekt və küçələrində avtobus dayanacaqlarının önündə, yolun hərəkət hissəsi ilə səki arasında xüsusi nişanlanma xətləri çəkilir.
Şəhərin Heydər Əliyev prospektində piyada zolaqlarının yenidən rənglənməsi və yolun hərəkət hissəsi ilə səki arasında yeni xətlərin çəkilməsi işləri aparılıb. Piyadaların yollardan təhlükəsiz və rahat şəkildə keçməsini təmin etmək məqsədilə məlumatverici üfüqi nişanlanma xətlərinin çəkilməsi sakinlər tərəfindən də böyük minnətdarlıq hissi ilə qarşılanıb.
Facebook-da paylaş