Şəhidlərimizin qəhrəmanlığı, şərəfli ömür yolu gənclərimiz üçün hər zaman örnək olub
Şəhidlik elə bir uca zirvədir ki, ana Vətən uğrunda canını qurban
verib bu zirvəyə yüksələn oğullarımız bizim aramızda olmasa da, ürəklərimizdə
hər zaman yaşayırlar. Torpaqlarımızın qorunması, Vətənimizin müdafiəsi uğrunda
canından, qanından keçərək şəhidlik zirvəsinə ucalanların xatirəsini daim yüksək
tutmaq, onları gəncliyə nümunə göstərmək isə hər kəsin vətəndaşlıq borcudur. Bu
gün hər birimiz ölkəmizdə vətənpərvərliyin təbliği işini uğurla aparmalıyıq. Müasir
yeniyetmə və gənclərimizə Vətənimizi sevməyi, onun uğrunda canından keçən şəhidlərimizi
heç vaxt unutmamağı, onlarla daim fəxr etməyi öyrətməliyik. Hər bir gəncə şəhidlərimizin
qısa, lakin şərəfli ömür yolundan özlərinə örnək götürmələrini, qəhrəmanlığı
onlardan öyrənməli olduqlarını təbliğ etməliyik. Hər bir gənc bilməlidir ki, ulu
öndər Heydər Əliyev siyasi kursunun layiqli davamçısı, ölkə başçısı İlham
Əliyevin rəhbərliyi ilə Azərbaycan bu gün dünya miqyasında seçilən ölkələr
sırasında yer alır. Ən əsası da müstəqilliyimizi, ərazi bütövlüyümüzü qorumağa
qadir olan müzəffər orduya sahibik və əminliklə deyə bilərik ki, tez bir
zamanda əzəli və əbədi ata-baba yurdlarımıza qayıdacağıq. Üçrəngli bayrağımız
Qarabağda Şuşada, Xankəndidə dalğalananda, Vətən uğrunda son damla qanına qədər
vuruşaraq şəhid olan igid oğullarımızın ruhları rahatlıq tapacaq. Bu
gün düşmənlə 168 km sərhəddi olan, 5 kəndi daim mənfur
düşmən gülləsinin atəşinə məruz qalan, Bağanıs Ayrım, Xeyrımlı, Barxudarlı, Sofulu, Qızılhacılı, Yuxarı Əskipara və Aşağı Əskipara kimi
7 kəndi hələ də düşmən tapdağı altında olan Qazax rayonunda da vətənpərvərlik hissi, döyüş ruhu hər zaman yüksək
səviyyədə olub və bu, bundan sonra da belə olacaqdır. Qazaxlı gənclərdə ən ali
səviyyədə olan bu hiss sayəsində bu gün Qazax rayonu yüzlərlə şəhid
verib. 280-dən çox şəhidi olan, 7
nəfər igid oğlu Azərbaycanın Milli Qəhrəmanı adına layiq görülən Qazaxda hər
bir gənc torpaqlarımızın qorunması, vətənimizin müdafiəsi uğrunda canından,
qanından keçərək şəhidlik zirvəsinə ucalmağa hazırdır. Qazaxda Vətən torpaqlarının
azadlığı uğrunda canından keçmiş şəhidlərimizin xatirəsi hər zaman uca
tutulur. Rayonda Vətənin müstəqilliyi və ərazi bütövlüyü naminə canından
keçən şəhidlərimizə, onların ailə üzvlərinə olan qayğı hər zaman diqqət
mərkəzində saxlanılır. Rayon rəhbərinin ilk gündən şəhidlərimizə xüsusi diqqət
ayırması, onların ailə üzvlərinə daim qayğı ilə yanaşması, şəhidlərimizin
uyuduğu qəbiristanlıqların, onların xatirəsinə ucaldılmış abidələrin,
parkların, bulaqların, xiyabanların abadlaşdırılması, əsaslı şəkildə təmir
edilməsi, xüsusilə də şəhərin mərkəzində yerləşən Şəhidlər xiyabanında aparılan
abadlıq işləri və şəhidlərimizin adı, şəkli əks olunmuş lövhələrin vurulması bu
istiqamətdə görülən əməli işlərin bariz nümunəsidir. Rayonumuza gələn hər bir
qonağın, eləcə də adi rayon sakinlərinin şəhərin mərkəzində yerləşən bu
müqəddəs məkana – Şəhidlər xiyabanına baş çəkməsi, əziz xatirələrini ehtiramla
yad etmələri şəhidlərə olan böyük ehtiramdan xəbər verir. Rayonda keçirilən
tədbirlərin öncə bu müqəddəs məkanı ziyarətlə başlaması, məktəblilərin mütəmadi
olaraq xiyabanı ziyarət etmələri, hər bir Vətən oğlunun doğum və ya anım
günündə Şəhidlər xiyabanında ruhlarına dualar oxunması, əziz xatirələrinin
dərin ehtiramla yad olunması şəhidlərimizin daim qəlblərdə yaşaması
deməkdir. GOYEZEN.AZ saytı da mütəmadi
olaraq şəhidlərimizlə bağlı silsilə yazılar dərc edir, Vətən uğrunda canından
keçmiş, doğum və anım günü olan şəhidlərimizin əziz xatirələrini
yad edir. Bu həftə də doğum günü olan, şəhidlik adlı zirvəyə ucaldıqları
günləri qeyd olunan şəhidlərimizdən Saleh Həsənovun, Şahin
Mustafayevin, Qoşqar
Qurbanovun, İsmayıl
Musayevin, Alı
Eminovun, Yaşar Hüseynovun əziz xatirəsini yad edir. Allah bütün
şəhidlərimizə rəhmət eləsin. Həsənov Saleh Hüseyn oğlu Həsənov Saleh Hüseyn oğlu 14
oktyabr 1957-ci ildə Ermənistan Respublikasının İcevan rayonunun Ağkilsə kəndində
anadan olmuşdur. 23 aprel 1992-ci il tarixdə Qazax rayonunun Ağköynək kəndində
"Nohur” meşəsi deyilən ərazidə odun qırarkən minaya düşmüşdür. Evli idi. 1
övladı var. Qarapapaq kənd qəbiristanlığında dəfn edilmişdir. Mustafayev Şahin Cəmşid oğlu Mustafayev
Şahin Cəmşid oğlu 1 iyul 1975-ci ildə İcevan rayonunun, Mirteyl kəndində anadan
olmuşdur. 1993-cü ildə Milli Ordu sıralarına çağırılan Şahin 888-ci briqadada hərbi
xidmətə başlamışdır. 703 saylı hərbi hissənin tərkibində Tərtər su anbarı və
"Qlobus” yüksəkliyi uğrunda gedən döyüşlərdə daha inamla döyüşərək yoldaşları
ilə birlikdə məkrli niyyətləri olan erməniləri torpaqlarımızdan uzaqlaşdırmağa
can atır. İgid əsgər 1994-cü il aprel ayının 25-də Ağdərə istiqamətində gedən
döyüşlərdə şəhid olaraq əbədiyyətə qovuşur. Qurbanov
Qoşqar Məqsəd oğlu Qurbanov Qoşqar Məqsəd oğlu 26 aprel 1980-ci
ildə Qazax rayonunun Fərəhli kəndində anadan olmuşdur. 1987-ci ildə Fərəhli kənd ümumi orta məktəbinin birinci
sinfinə daxil olmuş, 1995-ci ildə həmin məktəbin
səkkizinci sinfini bitirmişdir. 1995-99-cu illərdə Qazax rayon Kənd Təsərüfatı Texnikumunda təhsil
almışdır. 1999-2001-ci illərdə Azərbaycan Milli Ordu sıralarında xidmət etmiş,
həqiqi hərbi xidmətini başa vurduqdan sonra 2001-2014-cü illərdə fərdi əməklə məşğul
olmuşdur. 2014-cü ildə Azərbaycan Milli Ordu sıralarında
müddətsiz hərbi xidmətə daxil olaraq kiçik çavuş rütbəsi ilə xidmət etmişdir. 7 dekabr 2014-cü ildə Qazax rayonunun Cəfərli
kəndi istiqamətində hərbi vəzifə borcunu yerinə yetirərkən hərbi texnika ilə düşmən tərəfindən basdırılmış minaya
düşərək şəhid olmuşdur. Fərəhli kəndində
dəfn edilmişdir. Evli idi. Hazırda həyat yoldaşı Aygül Məmmdova,
oğlu Elmir Qurbanov və qızı Hamaya Qurbanova Qazax şəhərində yaşayırlar. Müdafiə Naziri general-polkovnik Zakir Həsənovun
əmri ilə "Hərbi xidmətdə fərqlənməyə görə”
3-cü dərəcəli medalı ilə təltif edilmişdir. Qazax Rayon İcra Hakimiyyətinin başçısı Rəcəb
Babaşovun təşəbbüsü ilə Qazax şəhəri M.Rəsulzadə küçəsində adına bulaq
kompleksi inşa edilmişdir. Şəhidin vəfatının 4-cü ildönümü günündə həmin bulaq
kompleksinin açılışı olmuşdur. Musayev İsmayıl Ürfət oğlu Musayev
İsmayıl Ürfət oğlu 27 aprel 1973-cü ildə Qazax rayonunun Qarapapaq kəndində
anadan olmuşdur. 1979-cu ildə kənd məktəbinə getmiş və 1987-ci ildə səkkizinci
sinfi bitirmişdir. 117 saylı texniki peşə məktəbində təhsilini davam
etdirmişdir. 1992-ci
ilin əvvəllərində hərbi komissarlığa müraciət etmiş İsmayıl Musayevi 707 saylı
hərbi hissənin 1-ci taborunda xidmət etməyə göndərmişlər. Bir
ay təlim keçdikdən sonra İsmayıl Bala Cəfərli, Böyük Cəfərli və Ballıqaya yüksəkliyi
uğrunda gedən döyüşlərdə iştirak etmiş, öz qorxmazlığı ilə yoldaşlarına nümunə
olmuşdur. Lakin belə igid bir döyüşçünün döyüş yolu çox qısa olmuşdur. O,
1992-ci il iyul ayının 20-də Ballıqaya yüksəkliyi uğrunda gedən döyüşdə qəhrəmancasına
vuruşmuş və 19 yaşında şəhidlik zirvəsinə ucalmışdır. Eminov Alı Məhəmməd oğlu Eminov
Alı Məhəmməd oğlu 15 iyul 1970-ci ildə Qazax rayonunun Əli Bayramlı (hazırkı Aslanbəyli) kəndində anadan olmuşdur. 1976-cı
ildə Əli Bayramlı (hazırkı Aslanbəyli) kənd
orta məktəbin birinci sinfinə getmiş, 1986-cı ildə həmin orta məktəbin onuncu
sinfini bitirmişdir. 1993-cü ildə Qazax rayon hərbi komissarlığından Azərbaycan
Ordusu sıralarına çağırılmışdır. 27 aprel 1994-cü ildə Qazax rayonunun Aslanbəyli
kəndinin Ermənistan Respublikası ilə sərhədində
minaya düşərək şəhid olmuşdur. Aslanbəyli kənd qəbiristanlığında dəfn olunmuşdur. Hüseynov Yaşar
Eldar oğlu Hüseynov
Yaşar Eldar oğlu 14 may 1966-cı ildə Qazax rayonunun Barxudarlı kəndində anadan
olmuşdur. 28 aprel 1994-cü ildə Ağdərə rayonu ərazisində gedən döyüşlərdə şəhid olmuşdur. 1994-cü ildən şəhid statusu
verilib.
Facebook-da paylaş