Qazaxda “Hər bir azərbaycanlı üçün inam və ümid günü - Zəfər Qurultayı” adlı tədbir keçirilib
Aprelin
27-də Qazax Rayon İcra Hakimiyyətinin və Qazax Rayon Heydər Əliyev Mərkəzinin birgə
təşkilatçılığı ilə "Hər bir azərbaycanlı
üçün inam və ümid günü - Zəfər Qurultayı” adlı tədbir
keçirilib. 22 aprel 2022-ci il tarixdə Şuşa şəhərində keçirilmiş Dünya Azərbaycanlılarının
V Qurultayı - Zəfər Qurultayına həsr olunmuş tədbirdə xalqımızın yaddaşına
qızıl hərflərlə yazılan həmin tarixi günün əhəmiyyətindən söhbət açılıb. Tədbirdə Qazax
Rayon İcra Hakimiyyəti başçısının müavini-İctimai-siyasi və humanitar məsələlər
şöbəsinin müdiri Gulaya Həsənova, Bakı Dövlət Universitetinin Qazax filialının,
Qazax Dövlət Sosial-İqtisadi Kollecin müəllimləri, Təhsil şöbəsinin
əməkdaşları, məktəb direktorları, müəllimlər, muzey rəhbərləri və mədəniyyət
işçiləri iştirak ediblər. Tədbir Şuşa
şəhərinə 3D qrafik təsvirli virtual səyahət formatında filmin nümayişi ilə
başlayıb.
Qazax Rayon İcra
Hakimiyyəti başçısının müavini-İctimai-siyasi və humanitar məsələlər şöbəsinin
müdiri Gulaya Həsənova giriş sözü ilə çıxış edərək tədbir iştirakçılarını
salamlayıb qarşıdan gələn Ramazan bayramı münasibətilə təbrik edib, xoş
arzularını çatdırıb. Aprelin 22-də Şuşada keçirilmiş Dünya Azərbaycanlılarının V Qurultayı - Zəfər Qurultayı haqqında geniş məlumat verərək həmin tarixi günün
xalqımızın yaddaşına əbədi həkk olunduğunu bildirib. Həmin Qurultayda Dünya Azərbaycanlılarının
vahid milli dövlətçilik və Azərbaycançılıq ideyası ətrafında birləşməsinin Ulu
Öndər Heydər Əliyevin adı ilə bağlı olduğunu diqqətə çatdırıb. Müavin
G.Həsənova qeyd edib ki, Ümummilli Liderin Azərbaycanın birlik və həmrəyliyi
ilə bağlı ideyalarının həyata keçirilməsi bu gün Prezident İlham Əliyevin siyasətinin
əsasını təşkil edir. İllər sonra Dünya Azərbaycanlılarının V Qurultayının
Şuşada keçirilməsi məhz Prezident İlham Əliyevin uğurlu idarəçilik və liderlik
qabiliyyətinin nümunəsidir. Tarixi qələbəmizdən sonra azad Şuşada keçirilən
Zəfər Qurultayı bir daha Azərbaycanın gücünün, qüdrətinin dünyaya bəyan
etdirilməsi deməkdir. Müavin G.Həsənova bu gün vətəndaş olaraq 44 günlük Vətən müharibəsində
qazandığımız tarixi Qələbəyə, Zəfərə görə Müzəffər Ali Baş Komandan İlham
Əliyevə, Azərbaycan Ordusuna, hərbçilərimizə, şəhidlərimizə, qazilərimizə
borclu və minnətdar olduğumuzu dilə gətirib. Bu gün Şuşada yaşanan bütün qürurverici anların
müəllifləri olan Ali Baş Komandanın, şəhidlərimizin, qazilərimizin yaddaşlara
əbədi həkk olunduqlarını bir daha qeyd edib. Sonra BDU-nun Qazax filialının
tədris və elmi işlər üzrə direktor müavini, dosent Məmməd
Yusifov, filialın Dil, Ədəbiyyat və onların tədrisi metodikası kafedrasının
dosenti, filologiya üzrə elmlər doktoru Valeh Nəsibli, həmin kafedranın baş
müəllimi Mustafa Mustafayev, Qazax
Tarix-Diyarşünaslıq Muzeyinin direktoru Gülnaz Alişanova, Qazax Rayon Gənclər və
İdman İdarəsinin rəisi Vüqar Nəbiyev, Qazax Uşaq-Gənclər İnkişaf Mərkəzinin
direktoru Gövhər Rəhimova, Qazax Rayon Təhsil Şöbəsinin müdir müavini Əziz Məmmədov,
Qazax Dövlət Sosial-İqtisadi Kollecin Qiymətləndirmə və Monitorinq Şöbəsinin
müdiri Elvira Əfəndiyeva çıxış edərək milyonlarla xaricdə yaşayan azərbaycanlının
V Qurultayının - Zəfər Qurultayının Şuşada keçirilməsinin xalqımız üçün böyük məna
kəsb etməsindən, Ulu Öndər davamçılarının həmrəylik və birlik bayramlarını
Şuşada keçirmələrinin tarixi əhəmiyyətindən danışıblar. Çıxışlarda ümumi fikir
ifadə olunub ki, mədəniyyət paytaxtımız Şuşada keçirilən Zəfər Qurultayı hər
bir azərbaycanlı üçün inam və ümid günüdür. Çıxış edənlər qeyd ediblər ki, xalqımız
tarixin müəyyən dönəmlərində sınaqlarla üz-üzə qalsa da hər zaman birlik və həmrəylik
sayəsində milli dövlətçilik və bütöv Azərbaycan naminə birləşməyi bacarmış, ümummilli
ideyalar naminə müqəddəs və məsuliyyətli mübarizələrdə hər zaman qalib olmuşlar.
Bundan sonra da xalqımız müzəffər xalq kimi əbədi yaşayacaq və ölkədə xalq-iqtidar
birliyi davam edəcəkdir.
GOYEZEN.AZ
Facebook-da paylaş