Ümummilli Lider Heydər Əliyevin səsləndirdiyi “Dünya azərbaycanlılarının həmrəyliyi gününün dövlət bayramı kimi qeyd edilməsi xalqımızın milli azadlıq mübarizəsinin məntiqi nəticəsi olaraq artıq xoş ənənəyə çevrilmişdir. Qədim və zəngin tarixə malik olan Azərbaycan xalqının dirçəlişini, tərəqqisini və milli birliyini əks etdirən, onu müstəqil dövlətçilik uğrunda müqəddəs və məsuliyyətli mübarizəyə səfərbər edən həmrəylik günü hər bir azərbaycanlı üçün inam və ümid anıdır. Dünyanın müxtəlif ölkələrində milyonlarla soydaşımız yaşayır, işləyir, fəaliyyət göstərir. Buna baxmayaraq, onların milli-mənəvi varlığını yaşadan yeganə bir dövlət var. Bu, müstəqil, suveren Azərbaycan Respublikasıdır. Dünya azərbaycanlılarının birliyi və həmrəyliyi ideyasının əsasını da məhz Azərbaycan dövlətçiliyinə, xalqımızın dilinə, dininə, milli-mənəvi varlığına və ümumbəşəri dəyərlərə hörmət, onların daim qorunmasına, yaşamasına qayğı təşkil edir” dəyərli sözlərini bu gün də minnətdarlıqla xatırlayırıq.  

Həmrəylik günü milli birlik, Azərbaycana məhəbbət, milli-mənəvi dəyərlərimizə hörmət, Vətənə bağlılıq hisslərini özündə təcəssüm etdirir. Dünya azərbaycanlıları yaşadıqları ölkələrin sosial-iqtisadi, ictimai-siyasi və mədəni həyatında daha fəal rol oynayır, respublikamızla qarşılıqlı əlaqələrin genişlənməsinə böyük töhfə verir, Azərbaycan həqiqətlərinin dünya ictimaiyyətinə çatdırılmasında, zəngin mədəni irsimizin təbliğində, erməni lobbi dairələrinin ideoloji təxribatlarının qarşısının alınmasında qətiyyət nümayiş etdirirlər. Bu gün fəxrlə deyə bilərik ki, artıq xalqımız, bütün dünya azərbaycanlıları 31 Dekabr - Dünya Azərbaycanlılarının Həmrəyliyi Gününü qalib, suveren, müstəqil dövlətin vətəndaşları olaraq qürurla qeyd edirlər. 

Dekabrın 30-da Qazax Rayon İcra Hakimiyyətinin başçısı Rəcəb Babaşov icra aparatının məsul əməkdaşlarını, RİH başçısının şəhər İnzibati Ərazi Dairəsi üzrə nümayəndəliyinin, Qazax Mənzil İstismar Sahəsinin, Qazax şəhər Kommunal Müəssisələri Kombinatının, şəhər Bələdiyyəsinin əməkdaşlarını qəbul edib. İcra başçısı 2024-cü ilin uğurlu nəticələrlə yanaşı, xalqımızı üzən hadisələrlə də yadda qaldığını söyləyərək ilk növbədə dekabrın 25-də “Azərbaycan Hava Yolları” şirkətinə məxsus Bakı-Qroznı istiqamətində uçan sərnişin təyyarəsinin qəzaya uğraması nəticəsində həlak olanların ailələrinə bir daha dərin hüznlə başsağlığı verib, xəsarət alanların tezliklə şəfa tapmasını diləyib, baş vermiş hadisəni ürəkağrısı ilə diqqətə çatdırıb. Rayon rəhbəri icra aparatının məsul işçilərini, digər əməkdaşları 31 Dekabr - Dünya Azərbaycanlılarının Həmrəyliyi Günü və Yeni il münasibətilə təbrik edərək səmimi arzularını çatdırıb.

“Hər zaman olduğu kimi, qarşıdan gələn 2025-ci ildə də vətəndaş məmnunluğunun təmin olunması hər birimiz üçün ən ümdə iş olmaldır. Hər bir dövlət məmurunun vəzifə borcu vətəndaşı qəbul edib onun müraciətini dinləmək, onlara layiqli xidmət göstərərək vətəndaş məmnunluğunu təmin etməkdir”, - deyən icra başçısı bu günə kimi olan ənənənin növbəti ildə də davam etdiriləcəyini qeyd edib. Rayon rəhbəri görüşdə iştirak icra aparatının məsul işçilərinə, edən idarə, müəssisə, təşkilat, eləcə də xidmət sahələri rəhbərlərinə dövlət məmuru olaraq vətəndaşlara, xüsusilə də şəhid ailələrinə, qazilərə, müharibə iştirakçılarına, məcburi köçkün ailələrinə, sərhəddə yaşayan sakinlərə qarşı hər zaman qayğı ilə yanaşmalı, daim diqqət ayırmalı, qaldırılan hər bir məsələyə həssaslıqla baxmalı olduqlarını bildirib.

Bu gün həm də Respublika Prezidenti İlham Əliyevin 24 iyun 2024-cü il tarixli Sərəncamına əsasən dövlət qulluğunda səmərəli fəaliyyətinə görə “Tərəqqi” medalı ilə təltif olunmuş Vəliyev Akif Sozalı oğluna təltif olunduğu medal təqdim olunub.

İcra başçısı Rəcəb Babaşov medalı sahibinə təqdim edərək təbriklərini, səmimi ürək sözlərini bölüşüb, A.Vəliyevə gələcək fəaliyyətində uğurlar arzulayıb. 

Akif Vəliyev dövlət qulluqçularının, o cümlədən də onun fəaliyyətinə, əməyinə verdiyi yüksək qiymət və dəyərə görə Respublika Prezidenti İlham Əliyevə bir daha dərin minnətdarlığını bildirib.