Sabah, noyabrın 14-də Azərbaycan Respublikasının Müdafiə Nazirliyi və Qazax rayon İcra Hakimiyyətinin birgə təşkilatçılığı ilə “Ordumuz-qürurumuz, xalqımız-dayağımız” devizi altında kütləvi vətənpərvərlik bayramı keçiriləcəkdir. Xalqla ordunun birliyinə həsr olunmuş bu möhtəşəm tədbirə bir neçə gündür ki, geniş hazlırlıq işləri görülür.

Qazax rayon İcra Hakimiyyətinin başçısı Rəcəb Babaşov hazırlıq işləri ilə tanış olmaq üçün bu gün axşam saatlarında tədbirin keçiriləcəyi Heydər Əliyev adına parka gəlib. Müdafiə Nazirliyinin müşaviri, əməkdar incəsənət xadimi Abdulla Qurbani tədbirə hazırlıq barədə rayon rəhbərliyinə məlumat verib. Sonra İcra Başçısı tədbir iştirakçılarının məşqlərinə baxaraq yüksək qiymətləndirib.

Qazax Xeyriyyə Cəmiyyəti Ağsaqqal Şurasının sədri Vidadi Bayramov da hazırlıq işlərinə baxışda iştirak edib və vətənpərlik ruhunda sabah keçiriləcək tədbirin əhəmiyyətinin yüksək olduğunu qeyd edərək öz ağsaqqal xeyir-duasını verib.

“Ordumuz-qürurumuz, xalqımız-dayağımız” devizi altında keçiriləcək kütləvi vətənpərvərlik bayramı sabah saat 10:30-da şəhərdəki Heydər parkında başlanacaqdır.