Qazaxda “Narkomaniya ilə mübarizə hər bir vətəndaşın mənəvi borcu olmalıdır!” mövzusunda növbəti maarifləndirici tədbir keçirilib
Əsrin bəlasına çevrilən
narkomaniya bəşəriyyəti narahat edən ən mühüm problemlərdən biri kimi bu gün də
gündəmdə qalmaqdadır. Bu təhlükəli bəlaya qarşı mübarizədə cəmiyyətin hər bir
üzvü fəal iştirak etməlidir. Ən əsası da narkomaniya ilə mübarizə hər bir vətəndaşın
mənəvi borcu olmalıdır. Qazaxda da
narkomaniyanın cəmiyyətə, insanların sağlamlığına vurduğu ziyanı vətəndaşlara,
xüsusilə də gənclərə, məktəblilərə çatdırmaq məqsədilə mütəmadi olaraq
maarifləndirici tədbirlər keçirilir. Növbəti
maarifləndirici tədbir aprelin 8-də Qazax Rayon İcra Hakimiyyəti, Rayon Polis
Şöbəsi və Yeni Azərbaycan Partiyası Qazax Rayon Təşkilatının birgə təşkilatçılığı
ilə təşkil olunub. Qazax Rayon İcra Hakimiyyəti başçısı aparatı yanında
"Narkotik Vasitələrin Qanunsuz Dövriyyəsinə Qarşı Mübarizə üzrə Rayon
Komissiya”sı tərəfindən keçirilən tədbirdə narkotik vasitələrin,
psixotrop maddələrin və onların prekursorlarının qanunsuz dövriyyəsinə və
narkomanlığa qarşı mübarizə ilə əlaqədar görülmüş işlərdən danışılıb. Narkomaniyanın törətdiyi fəsadlardan, narkotik vasitələrin zərərlərindən,
insan və cəmiyyət üçün yaratdığı problemlərdən geniş şəkildə bəhs edilib. Gənclər
Mərkəzində keçirilən tədbirdə Qazax Rayon İcra Hakimiyyətinin başçısı Rəcəb
Babaşov, icra aparatının məsul işçiləri, rayonun hüquq-mühafizə orqanlarının
rəhbərləri, şəhər və kəndlər üzrə Polis sahə rəisləri, RİH başçısının şəhər və
kənd İnzibati Ərazi Dairələri üzrə nümayəndələri, Bələdiyyə sədrləri, məktəb
direktorları, rayon ziyalıları, ağsaqqalları iştirak ediblər. Qazax Rayon İcra Hakimiyyətinin başçısı Rəcəb Babaşov tədbiri giriş sözü ilə açaraq iştirakçıları
salamlayıb, tədbirin məqsəd və əhəmiyyətindən söz açıb. İcra başçısı bildirib
ki, ilk gündən söylədiyim kimi, insanların təhlükəsizliyi, vətəndaşların haqqı
hər zaman qorunmalıdır. Qeyd edib ki, bugünkü tədbirin əsas məqsədi bəşəriyyətin ən ağrılı problemlərindən olan, cəmiyyətin
ciddi bəlasına, xalqın, millətin təhlükə mənbəyinə çevrilən narkomaniyaya, "ağ
ölüm”ə qarşı mübarizə tədbirlərini daha da möhkəmləndirmək və təkmilləşdirməkdir.Ölkə Prezidenti İlham Əliyev, Birinci vitse-prezident Mehriban Əliyeva tərəfindən
görülmüş işlərdən, həyata keçirilən layihələrdən, qəbul edilən Dövlət Proqramlarından
söz açan icra başçısı bu sahədə olan mübarizə tədbirlərinin bu gün də davam
etdirildiyini söyləyib. Respublika Prezidentinin 2019-cu
il 22 iyul tarixli 1334 nömrəli Sərəncamı ilə "Narkotik vasitələrin, psixotrop maddələrin və onların
prekursorlarının qanunsuz dövriyyəsinə və narkomanlığa qarşı mübarizəyə
dair 2019-2024-cü illər üçün Dövlət Proqramı” təsdiq edilib ki,
bunun bariz nümunəsidir. Rayon rəhbəri
vurğulayıb ki, bundan sonrakı fəaliyyətdə də 2019-2024-cü illəri əhatə edən
Dövlət Proqramının və Komissiyasının İş Planının müvafiq bəndlərinin icrasına nəzarəti
daha da artırmalı, narkomanlığa qarşı mübarizədə koordinasiya işini gücləndirməli,
yeniyetmə və gənclər arasında aparılan maarifləndirmə işlərinin davamlılığını təmin
etməliyik. Həyata keçirilən tədbirlərin nəticəsini təhlil edərək qiymətləndirməli
və bu istiqamətdə mütəmadi olaraq müzakirələr aparmalıyıq. Təbliğat işlərinin təsirliyinin
artırılması istiqamətində vətəndaş cəmiyyəti institutları ilə əməkdaşlığın mütəmadi
xarakter daşımasına çalışmalıyıq. Üzərimizə düşən vəzifələri layiqincə yerinə
yetirməli, birlikdə mübarizə aparmalı, maarifləndirici və profilaktik tədbirlər
həyata keçirməliyik. İcra başçısı bütün sahələri olduğu kimi, narkomaniya ilə
mübarizə sahəsini də daim diqqət mərkəzində saxladığını, ilk gündən barışmaz
mövqedə olduğunu qeyd edib. Pandemiya dövrünə qədər belə maarifləndirmə tədbirlərinin
keçirildiyini, illər öncə aparılan mübarizə tədbirlərinin bundan sonra da davam
etdiriləcəyini, bu cür görüşlərin daha sıx təşkil ediləcəyini vurğulayıb. Narkomaniya
ilə mübarizə sahəsində daha kəskin addımların atılacağını, bunun üçün də
kimliyindən asılı olmayaraq hər kəsin bu mübarizədə dəstək olmalı olduğunu
bildirib. Bütün sahələrdə, mübarizələrdə olduğu kimi, cəmiyyət olaraq əl-ələ
verib narkomaniya ilə mübarizədə də qalib gəlmək üçün böyük səylə çalışmalı
olduğumuzu, baş vermiş hadisələrə göz yummamağı söyləyib. Tutduğu vəzifəsindən
asılı olmayaraq narkomaniya ilə mübarizə sahəsində həyata keçirilən işlərə
biganə yanaşan, səhlənkarlıq və məsuliyyətsizlik edən hər kəs barəsində ciddi tədbirlər
görüləcəyini bildirib.
Yeni Azərbaycan
Partiyası Qazax Rayon Təşkilatının sədri Anar Nəbiyev çıxış edərək tədbir iştirakçılarını salamlayıb,
narkomaniya ilə mübarizəyə həsr olunmuş tədbirin təşkilnə görə rayon
rəhbərliyinə razılığını ifadə edib. A.Nəbiyev qeyd edib ki, Ulu Öndər Heydər
Əliyevin söylədiyi kimi, gənclər müstəqil Azərbaycanımızın gələcəyidir.
Ümummilli Liderin gənclərə olan qayğısı ölkə Prezidenti İlham Əliyev tərəfindən
uğurla davam etdirilir və bu hər birimizin gözü önündə baş verir. "Dövlətimizin
qayğı göstərdiyi gələcəyimiz olan gəncləri qorumaq hər birimizin borcudur”, -
deyən natiq gəncləri cəmiyyətimizdə "ağ ölüm” adlandırılan narkotiklərdən
qorumaq üçün hər kəsin səfərbər olmalı olduğunu qeyd edib. Əsrin bəlasına çevrilən
"ağ ölüm”lə mübarizə sahəsində dövlətimiz tərəfindən həyata keçirilən tədbirlərdən
danışan A.Nəbiyev 4 mühüm Dövlət Proqramının
qəbul edildiyini, həmin proqramların uğurla icra olunduğunu diqqətə çatdırıb.
Ölkə vətəndaşı olaraq həmin proqramların icrasından irəli gələn vəzifələrin
layiqincə yerinə yetirilməsi, gənclərin narkotik adlı bəladan xilas olması
naminə onlara narkomaniyanın törətdiyi fəsadları çatdırmaq, bu sahədə mütəmadi
olaraq məlumatlandırmaq üçün böyük səylə çalışmalı olduğumuzu bir daha
vurğulayıb. Bu sahədə aparılan mübarizdə təkcə hüquq-mühafizə orqanlarının
deyil, bütöv cəmiyyət olaraq hər bir vətəndaşın üzərinə böyük məsuliyyət və yük
düşdüyünü qeyd edib. YAP Qazax Rayon Təşkilatı olaraq öz növbələrində gənclərlə
bu sahədə işləri daha sıx şəkildə aparacaqlarını söyləyib. Bu gün 73 ərazi ilk
partiya təşkilatında 10334 nəfərin birləşdiyini qeyd edib. Hazırda ərazi ilk
partiya təşkilatının sayının 75-ə çatdığını, əsasən də fevral, mart, aprel
ayında 199 nəfərin YAP sıralarına daxil olduğunu, onların böyük əksəriyyətinin
gənclər təşkil etdiyini diqqətə çatdırıb. A.Nəbiyev xüsusilə də ağsaqqal öyüt-nəsihəti,
el-oba qınağı, kollektiv məzəmmət, ictimai qınaq kimi təsiredici vasitələrdən
istifadə etməklə hər kəsi gənclərin narkomaniya adlı bəladan uzaq durmasına,
narkomaniyaya yox deməsinə dəstək olmağa, narkomaniya ilə mübarizədə fəallıq
nümayiş etdirməyə səsləyib. Rayon Polis Şöbəsinin
rəisi, polis polkovniki Sənan Əsədov çıxış edərək
iştirakçıları salamlayıb, keçirilən tədbirin məqsəd və əhəmiyyətini qeyd edib.
Əsrin bəlası olan narkomaniyaya qarşı mübarizəni təmin etmək məqsədilə belə
görüşlərin keçirilməsinin mühüm əhəmiyyət daşıdığını diqqətə
çatdırıb. Polis rəisi sağlam cəmiyyətin formalaşması istiqamətində ən
ciddi təhlükələrdən olan narkomaniyanın törətdiyi fəsadlar barədə ətraflı məlumat
verib. İstər narkotiklərin qanunsuz dövriyyəsinə qarşı mübarizənin, istərsə də
narkomaniya əleyhinə aparılan maarifləndirmə tədbirlərinin bu gün aktual
xarakter aldığını, hər zaman ölkə rəhbərliyinin diqqət mərkəzində olduğunu qeyd
edib. Ölkəmizdə "Narkotik vasitələrin, psixotrop maddələrin və
onların prekursorlarının qanunsuz dövriyyəsinə və narkomanlığa qarşı mübarizəyə
dair 2019-2024-cü illər üçün Dövlət Proqramı”nın icrası istiqamətində müvafiq tədbirlərin
keçirildiyini qeyd edən polis rəisi bugünkü tədbirin də məhz bu məqsədə xidmət
etdiyini qeyd edib. Polis rəisi bildirib
ki, əsrin bəlasına çevrilən "ağ ölüm” zəmanəmizin ən aktual problemləridən
biri olaraq qalır. Azərbaycanda da narkotik vasitələrdən istifadəyə görə, yüzlərlə
insan sağalmaz xəstəliklərin və hətta ölümün qurbanına çevrilir. Polis rəisi bir
dəfə narkotikadan istifadə edən şəxsin artıq ondan asılı vəziyyətə düşdüyünü, hətta
özü ilə bərabər xeyli sayda gənci də öz ətrafına toplaya bildiyini vurğulayıb.
Ona görə də gənclər və yeniyetmələrin narkotik vasitələrdən bir dəfə istifadə
etməsinə belə yol verməməyə çalışmalı olduğumuzu söyləyib. Bugünkü görüşün də əsas
məqsədinin narkomaniyanın necə ağır bəla olduğunu bir daha çatdırmaq olduğunu
vurğulayıb. S.Əsədov sonda bir daha gələcəyimiz olan gənclərin zərərli vərdişlərdən
uzaq durması, sağlam həyat tərzi keçirməsi üçün bu sahədə hər bir ölkə vətəndaşının
mübarizə aparmalı olduğunu, ictimai qınaq deyilən insitutun yenidən işə
salınmasını olduqca vacib hal kimi qeyd edib. Polis rəisi Narkomanlığa
və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət
Komissiyası tərəfindən ölkəmizdə narkotik vasitələrin və
narkomanlığın yayılmasının qarşısını almaq məqsədilə aidiyyəti təşkilatlarla və
vətəndaşlarla operativ qaydada əlaqələndirməni təmin edən "802” çağrı xidmətinin
fəaliyyət göstərdiyini diqqətə çatdıraraq "ağ ölüm”lə mübarizədə hər
birimizin səfərbər olmalı olduğumuzu diqqətə çatdırıb. Narkomaniya ilə mübarizənin
təkcə hüquq-mühafizə orqanlarının deyil, cəmiyyətin hər bir vətəndaşının üzərinə
düşən əsas iş olduğunu bir daha söyləyib. Bu sahədə hər kəsi kompleks şəkildə
mübarizə aparmağa səsləyib.
Qazax Rayon
Prokuroru Rauf Gözəlov çıxış edərək
narkomaniya ilə mübarizə aparmağın hüquq-mühafizə orqanları ilə bərabər,
vətəndaşların da işi olduğunu qeyd edib. Vəzifəsindən, tutduğu mövqeyindən
asılı olmadan cəmiyyətin hər bir fərdinin üzərinə böyük məsuliyyət düşdüyünü
bildirib. Narkomaniya ilə mübarizədə hər kəsi hüquq-mühafizə orqanlarına dəstək
olmağa çağırıb. Qazax Rayon
Məhkəməsinin sədri Nemət Musayev çıxışında qeyd edib ki, narkotiklərin qanunsuz dövriyyəsi və
narkomanlıq bu gün dünyamızı narahat edən problemlərdən biridir. Bu təhlükəli təzahür
insan cəmiyyətinin mənəvi və əxlaqi dəyərlərinə zərbə vuran, sosial-iqtisadi
inkişafa mənfi təsir göstərən, insanların həyat və sağlamlığına ciddi təhlükə
yaradan, cinayətkarlığın artmasına səbəb olan amildir. Ölkəmizdə narkotiklərin
qanunsuz dövriyyəsi və narkomanlıqla mübarizə sahəsində dövlət siyasətinin
strateji istiqamətləri müəyyən olunmuş, təşkilati-hüquqi və praktiki tədbirlər həyata keçirilmişdir.
Narkotik vasitələrin, psixotrop maddələrin və onların prekursorlarının qanunsuz
dövriyəsi və narkomanlığın yayılması ilə mübarizə sahəsini tənzimləyən normativ
hüquqi baza təkmilləşdirilmiş, beynəlxalq standartlara uyğunlaşdırılması
istiqamətində müvafiq işlər görülmüş, ölkəmizin narkotiklərlə mübarizə üzrə
beynəlxalq təşəbbüslərində iştirakı daha intensiv xarakter almışdır.
Narkomanlığın yayılması və qanunsuz dövriyyəsinə qarşı mübarizə tədbirlərini
gücləndirmək məqsədilə əhali arasında maarifləndirmə işləri gücləndirilmiş, belə
xəstəliyə düçar olanlar müəyyən edilərək müalicəyə cəlb olunmuş, narkoxəssəli
bitkilərin əkilib becərilməsi və yabanı bitənlərin erkən aşkarlanaraq məhv
edilməsi sahəsində aidiyyəti orqanlar tərəfindən lazımi tədbirlər həyata
keçirilmişdir. Məhkəmə sədri sonda müasir dövrümüzün ən aktual problemlərindən
biri olan narkomaniya ilə mübarizədə hər kəsin səfərbər olmalı olduğunu bir
daha qeyd edib. Tədbirdə
iştirak edən ağsaqqallardan Rayon Ağsaqqallar Şurasının sədri Ramiz Mansurov, Çaylı
kəndindən Qəzənfər Qocayev, Cəfərli kəndindən Seyfəddin Vəliyev, Kosalar
kəndindən Tariyel Nəsibov, Ağköynək kəndindən Azər Namazov, Daş Salahlı
kəndindən Nemət Əliyev, Dəmirçilər kəndindən Nazim Həsənov, Orta Salahlı
kəndindən Sirac Hacıyev, Aşağı Salahlı kəndindən Ayvaz Osmanov, Yuxarı Salahlı
kəndindən Məhəmməd Vəkilov, Aslanbəyli kəndindən Tanrıverdi Kosayev, Birinci
Şıxlı kəndindən Sadıq Balcanov, Kəmərli kəndindən Rəhim Rəhimov narkomaniya ilə
mübarizə sahəsində keçirilən bugünkü tədbiri vacib və yerində keçirilən bir
tədbir kimi qiymətləndiriblər. Gələcəyimiz olan gənclərin sağlamlığı və təhlükəsizliyi
naminə aparılan mübarizə tədbirlərinə, bu cür tədbirin təşkilinə görə
minnətdarlıqlarını bildiriblər. Çıxış edənlər məktəbdə müəllimlərin, evdə
valideynlərin, cəmiyyətdə ağsaqqalların, ziyalıların, hər kəsin narkomaniya ilə
mübarizəyə dəstək olmalı olduqlarını vurğulayıblar. Ziyalı, ağsaqqal olaraq
üzərilərinə böyük məsuliyyət düşdüyünü, gələcəyimiz olan gəncləri məhv edən narkomaniya
ilə mübarizənin hər kəsin işi olduğunu söyləyiblər. Onu da qeyd
edək ki, bu gün RİH başçısının Ağköynək kənd İnzibati Ərazi Dairəsi üzrə
nümayəndəsi Aydın Hacıyev işində yol verdiyi nöqsana görə tutduğu vəzifədən
azad edilib.
GOYEZEN.AZ
Facebook-da paylaş