Prezident İlham Əliyev: “Neftçilərin əməyi əsl qəhrəmanlıqdır”
Azərbaycan Respublikasının Prezidenti İlham
Əliyev sentyabrın 19-da Heydər Əliyev adına Bakı dərin özüllər zavodunda
"Abşeron” yatağının dəniz əməliyyatlarının təməlqoyma mərasimində iştirak edib. "Abşeron” yatağında quraşdırılacaq dayaq
blokları və digər sualtı qurğular barədə məlumat verildikdən sonra Prezident
İlham Əliyev Azərbaycan Televiziyasına, İctimai Televiziyaya və Real
Televiziyasına müsahibə verib. Ölkə Prezidenti qeyd edib ki: "Abşeron”
qaz-kondensat yatağının yeni mərhələsi ilə Azərbaycan öz neft-qaz
strategiyasında mühüm hadisəyə imza atır. Azərbaycan artıq neft ölkəsindən qaz
ölkəsinə keçid alır. Azərbaycan bundan sonra da etibarlı qaz təchizatçısı
olacaqdır”. Onu qeyd edək ki, Azərbaycan Prezidenti
SOCAR-da 9 il şirkətin vitse-prezidenti kimi xarici əlaqələrə rəhbərlik etmiş və
əsas kontraktların hazırlanmasında, imzalanmasında fəal rol oynamışdır. Müsahibə
zamanı bu barədə fikirlərini bölüşən dövlətimizin başçısı bildirib ki: "Mən hər
zaman fəxr etmişəm ki, həyatımın 9 ili Dövlət Neft Şirkətində keçib. O illərdə əldə
etdiyim təcrübə mənim üçün çox qiymətlidir”. Ölkə başçısı vurğulayıb ki: "İlk kontraktın
uğursuzluğuna baxmayaraq Azərbaycan tərəfinin inandırıcılığı sayəsində yeni
kontrakt imzalandı, "Total” şirkəti ilə SOCAR-ın əməkdaşlığı nəticəsində böyük
qaz-kondensat yatağı aşkarlandı. Bu yataqda ilkin proqnoza görə 350-360 milyard
kubmetr qaz ehtiyatları vardır. Artan daxili tələbatı ödəmək məqsədilə "Abşeron”un
birinci mərhələsində çıxarılacaq qaz daxili tələbatlara istiqamətləndiriləcək. Yataqda
100 milyon ton kondensatın olması neft hasilatını və ixracını sabit saxlamağa
imkan verir”. Müsahibə
zamanı neft-qaz sektorunda ölkəmizdə həyata keçirilən layihələrin icra vəziyyəti
haqqında fikirlərini bildirən ölkə rəhbəri qeyd edib ki: "Təqribən
7 milyard dollar dəyəri olan "Mərkəzi-Şərqi Azəri” adlanan yeni layihənin
icrası nəticəsində yeni mənbələrdən hasilat artacaq. TANAP xətti ilə Türkiyəyə
ötürülən qazın həcmi ildən-ilə artır. Əgər bir il bundan əvvəl Türkiyə
bazarında Azərbaycan qazı 4-cü, 5-ci yerdə idisə, hazırda birinci yerdəyik və
bu, həm bizim üçün, həm də Türkiyə üçün çox önəmlidir. "Abşeron” yatağında
ikinci fazadan çıxarılacaq qaz da TANAP xətti ilə Türkiyəyə ötürüləcək və digər
bazarlara ötürülə bilər. "Əsrin kontraktı”nın imzalandığı 1994-cü ildən 26 il
keçib və o vaxtdan bu günə qədər bir çox kontraktlar imzalanıb, amma Azərbaycanın
neft potensialına dünyada maraq azalmır, əksinə artır”. Ölkə başçısı neftçi peşəsi haqqında fikirlərini
bölüşərək bildirib ki: ""Abşeron” yatağının həm kəşfi azərbaycanlı mütəxəssis
Xoşbəxt Yusifzadə tərəfindən edilib, həm də istifadə edilən bütün qurğular Azərbaycanda
istehsal olunub. Beləliklə, Azərbaycan sadəcə xammal hasilatı ilə kifayətlənmir,
neft-qaz kəşfiyyatında, karbohidrogen daşıyıcıları hasilatı üçün tələb olunan
texnika istehsalında da öz ənənələrini qoruyur və inkişaf etdirir”. Neftçilərimizin əməyini yüksək qiymətləndirən
dövlətimizin başçısı bildirib ki: "Neftçilərin əməyi əsl qəhrəmanlıqdır. Ölkəmizin
uğurlu inkişafında neftçilərin çox böyük rolu vardır. Ölkəmizin uğurlu gələcəyi
də neftçilərin peşəsindən, onların nailiyyətlərindən böyük dərəcədə asılı
olacaqdır. "Abşeron”, "Qarabağ” və digər layihələrin icrası bundan sonra da
neft-qaz amilini öndə saxlayacaq. Azərbaycanın Qurban Abbasov, Xoşbəxt Yusifzadə
kimi əfsanəvi neftçiləri həmişə xatırlanmalı, yeni nəsillərə onların nümunəvi həyatı
təbliğ olunmalıdır. Neftçi Qurban dünyada bir nömrəli neftçi sayılmalıdır. Xoşbəxt
Yusifzadə bizim əfsanəvi neftçi-geoloqdur. "Abşeron” yatağının işlənməsində
onun çox böyük rolu var”. Müsahibə zamanı tarixi plan və müstəqilliyin
rolu haqqında fikirlərini bölüşən ölkə Prezidenti vurğulayıb ki: "Müstəqillik
dövrünə qədər çıxarılan neft Azərbaycan xalqının maraqlarına xidmət etmirdi.
Biz o vaxt müstəqil ölkə olsaydıq, Azərbaycan dünyanın ən zəngin ölkəsinə
çevrilə bilərdi. Düzdür, o vaxt zəngin neft maqnatları, onlar əldə etdikləri gəlirlərin
bir hissəsini xeyriyyəçiliyə sərf edirdilər, xüsusilə Hacı Zeynalabdin Tağıyev,
Muxtarov, Əsədullayev. Tağıyev, bildiyiniz kimi, Bakıya Şollar su kəmərini çəkdirmişdir,
eyni zamanda, təhsilə böyük əhəmiyyət verirdi. Çünki görürdü ki, Azərbaycan gəncləri
təhsildən kənarda qalırlar və beləliklə, gələcəkdə onların inkişafı və yüksək
yerlərə çıxması problemli ola bilər. Ona görə hesab edirəm ki, Azərbaycanın
neft maqnatları arasında onun xüsusi rolu vardır. Bizim ailəyə də onun köməyi dəymişdir.
Mənim babam Əziz Əliyev qədim Azərbaycan torpağı olan İrəvan xanlığı ərazisində
kasıb ailədə doğulmuşdu və oxumaq istəyirdi. Ancaq oxumaq üçün pulu yox idi. O
vaxt o, Hacı Zeynalabdin Tağıyevə məktub ünvanlamışdı və xahiş etmişdi ki, ona
maddi kömək göstərsin. O, həkim olmaq istəyirdi. Təbii ki, Tağıyev onu
tanımırdı, ancaq bir vətənpərvər, xeyirxah insan kimi ona pul göndərdi və o pul
hesabına Əziz Əliyev Sankt-Peterburq Hərbi Tibb Akademiyasına daxil oldu, orada
oxudu, gözəl həkim, görkəmli dövlət xadimi oldu. Onu da bildirməliyəm ki,
İkinci Dünya müharibəsi zamanında o, Dağıstana birinci katib vəzifəsinə göndərilmişdir
və müharibə illərində Dağıstana rəhbərlik etmişdir. O vaxt dağıstanlıları da
digər Qafqaz xalqları kimi sürgün etmək üçün planlar var idi. Demək olar ki, bu
qərar artıq sovet rəhbərliyi tərəfindən verilmişdi. Məhz Əziz Əliyevin fəaliyyəti,
onun çox cəsarətli addımları nəticəsində dağıstanlılar bu bəladan xilas ola
bildilər. Bu gün onun xatirəsi Dağıstanda yaşayır, onun şərəfinə abidə ucaldılıb”. Ölkə Prezidenti qeyd edib ki: "İkinci Dünya
müharibəsində sovet ordusunun Qələbəsində Azərbaycan neftçilərinin xüsusi, müstəsna
əməyi vardır. Çünki o vaxt Sovet İttifaqında yanacağın 80 faizi, sürtkü
yağlarının 90 faizi Azərbaycan tərəfindən təmin edilirdi, Azərbaycanda hərbi
texnika istehsal olunurdu. Bu müharibədə 300 mindən çox Azərbaycan nümayəndəsi
həlak oldu. Ancaq görün, Sovet İttifaqı dağılanda biz hansı vəziyyətlə üzləşmişdik:
dağılmış neft infrastrukturu. Bu gün mənə edilən təqdimatda göstərilir ki,
"Neft Daşları”na yeni həyat veriləcək. Çünki "Abşeron” yatağı "Neft Daşları” ilə
bağlı olacaq. Amma "Neft Daşları” hansı vəziyyətdə idi o vaxt. Mən
xatırlayıram, "Neft Daşları”na Prezident kimi ilk dəfə 2004-cü ildə gedəndə
ağır vəziyyət idi. Bütün platformalar çürümüşdü, dağılmışdı. Burada işləmək
böyük çətinlik, böyük təhlükə yaradırdı. Bunu biz əldə etdik. Neft hasilatı
aşağı düşmüşdü, faktiki olaraq qaz hasilatı ölkəmizin tələbatını ödəmirdi.
Bakının yarısı qazsız qalmışdı, o ki qaldı, rayonlara, orada ümumiyyətlə, qaz
deyilən şey yox idi. Deməli, iqtisadi vəziyyət ağır idi”. Ölkə başçısı müsahibəsində II dünya müharibəsində
faşizm üzərində qələbənin əldə edilməsində azərbaycanlıların və Azərbaycanın
rolunun lazımınca qiymətləndirilmədiyini də bildirib. Müstəqilliyin üstünlüklərindən danışan dövlətimizin
başçısı bildirib ki: "Bu gün Azərbaycan nefti, təbii resurslar tam şəkildə Azərbaycan
xalqının maraqlarına xidmət edir. İndi Azərbaycan bütün reytinqlərdə ən
qabaqcıl yerlərdədir. Bu gün biz infrastruktur layihələrinin təhlilinə verilən
qiymətə görə dünyada qabaqcıl yerlərdəyik”. Ölkə rəhbərinin də qeyd etdiyi kimi, neft gəlirləri
qorunur, düzgün idarə olunur, ölkənin abdadlaşdırılması, infrastrukturun təzələnməsi,
xalqın rifahının yüksəldilməsi və ordunun gücləndirilməsi üçün istifadə
olunur. Cənab Prezident onu da qeyd edib ki: "Davos
Forumu avianəqliyyat, dəmir yolu nəqliyyatı sahələrində Azərbaycanı 11-12-ci
yerlərə layiq görüb. Yol infrastrukturunun keyfiyyətinə görə dünyada 27-ci yerdəyik.
Bizim digər sosial infrastruktur layihələrimiz - müstəqillik dövründə 3700 məktəb
tikilib və təmir edilib. 700-dən çox xəstəxana tikilib və ən müasir avadanlıqla
təchiz edilib. Biz kosmik dövlətə çevrildik, biz nəhəng neft-qaz layihələri
icra edirik. Təkcə iqtisadiyyat və sənaye sahəsində yox, baxın, idman sahəsində,
Olimpiya Oyunlarında medalların sayına görə 14-cü yerdəyik. Sovet dövründə bunu
təsəvvür etmək mümkün deyildi. Biz azad, müstəqil ölkədə yaşayırıq, öz
taleyimizin sahibiyik. Əgər kimsə hansısa nostalgiyaya görə keçmiş dövrləri məhəbbətlə
xatırlayırsa, biz o adamlara tutarlı cavablar verməliyik. Müstəqilliyə qarşı
çıxan və onu aşağılamağa çalışan hər bir fərd dövlətimizə xəyanət edir. Müstəqillik
bizim əsas dəyərimizdir və biz nə qədər güclü olsaq, nə qədər qüdrətli olsaq,
müstəqilliyimiz o qədər də möhkəm olacaqdır”. Ölkəmizdə
ekoloji vəziyyətin yaxşılaşdırılması və ətraf mühitin qorunması istiqamətində həyata
keçirilən genişmiqyaslı işlərdən danışan dövlət başçısı qeyd edib ki: "O vaxt
Bakı, Abşeron yarımadası, Sumqayıt şəhəri ekoloji fəlakət zonaları kimi təqdim
edilirdi və faktiki olaraq ekoloji fəlakət mövcud idi. İndi bir çox hadisələr
yaddan çıxır. Ancaq bizim neftlə ən çox çirklənmiş ərazimiz Bibiheybət buxtası
idi. İndi Bibiheybət buxtası gözəl parklar, istirahət zonalarına çevrilib.
Bibiheybət qəsəbəsi indi faktiki olaraq yenidən qurulub. Digər ekoloji fəlakət
zonası Balaxanı və onun neft mədənləri idi. İndi baxın, Balaxanı gözəl bir qəsəbəyə
çevrilibdir və orada işlər artıq tamamlanmaq üzrədir. İndi Qara şəhəri yadımıza
salaq. Artıq o anlayış yoxdur, onun yerində Ağ şəhər var. Bakının bütün qəsəbələri
abadlaşdırılmalıdır, orada insanlar üçün daha yaxşı şərait yaradılmalıdır,
insanları narahat edən bütün problemlər həll olunmalıdır və bu qəsəbələr
estetik cəhətdən müasir səviyyəyə uyğun olmalıdır. Qəsəbələrdə bütün tarixi
abidələr bərpa edilməlidir və biz bu qəsəbələrə yeni həyat verəcəyik”. Dövlət başçısı vurğulayıb ki: "Sumqayıt bu
gün ən təmiz şəhərlərdən biridir. İki ildən sonra Heydər Əliyev neftayırma
zavodunda yenidənqurma başa çatacaq, "Avro-5” benzin istehsal olunacaq. "Azərneftyağ”
neft emalı zavodu söküləcək. Bütün o rezervuarlar, qurğular söküləcək, ora
böyük park olacaq”. Ölkə rəhbəri qeyd edib ki: "Ekologiyanın
sağlamlaşdırılması üçün atılan addımlar xalqın, gələcək nəslin sağlamlığı
üçündür. Ekoloji layihələr hələ davam edir. Abşeron yarımadasında neft gölməçələrinin
təmizlənməsi işi gedir. Amma çar Rusiyası dövründə, sovet dövründə buna fikir
verilirdimi? Xeyr. Ancaq plan, ancaq hasilat, ancaq istismar, neft ver, qaz
ver. Bəs insanların həyatı, onların yaşayışı, onların sağlamlığı? Ona görə
bizim üçün bu, ön plandadır. Mən Prezident seçiləndən sonra demişdim, ilk bəyanatlardan
biri idi ki, "qara qızıl”ı insan kapitalına çevirməliyik, insanlara xidmət etməliyik.
Biz bu sahədə, ilk növbədə, insan amilini nəzərə almalıyıq. Çünki neft bizim
üçün məqsəd deyil, daha yaxşı həyat yaratmaq, daha yaxşı ölkə qurmaq, daha
yaxşı şərait yaratmaq üçün vasitədir və bunu edirik. Biz
ekoloji fəlakət zonalarını ekoloji cənnət zonalarına çevirməliyik, bunu edirik
və edəcəyik”. GOYEZEN.AZ
Facebook-da paylaş